揀衫日 (A-line 型婚紗) @ 法國婚紗

2008 年 9 月 5 日（星期五）

由於我試衫時偷影咗 d 相，相片數目超過 20 張，所以我惟有分開幾篇 blog 出。

終於嚟到法國婚紗揀衫嘅日子啦！今日約咗 6:30 去到九龍塘 studio 試衫，我哋貫徹自己一般嘅作風 － 遲到！大約 6:40 先到！一入到去，sales 就安置好我哋坐低等，而佢就推咗兩車滿滿嘅衫出嚟比我，嗰刻覺得自己嘅排場好勁呀，呵呵～

叉開少少...... 其實法國婚紗嘅 sales 服務態度真係一流！可能因為佢哋係大公司，態度一定唔可以差！serve 我個 sales 叫 "阿 Kit"，我覺得佢好似林熙蕾，幾靚女架！

好，講返試衫！我好好彩呀，唔知係咪因為早去揀衫定咩原因呢，我喺網上揀嗰 20 件衫全部齊貨，可以試足 20 件，Yeah！一開始就試 a-line 先，等我逐件講吓：

#9043

第一件就試呢件！呢件其實幾靚，而且下身嘅層次感好強，影相應該唔錯！仲有，腰間嗰位修得好靚，連我自己都估唔到著出嚟幾好睇喎，有衝動想 confirm 呢件！

#3835

第二件試咗呢件！其實個感覺都還可以，不過呢件係低腰款，條裙係包埋個 pat pat 之後先開始有一層層紗！唔知係咪因為我成日凝住自己大 pat，我覺得自己著得一般啫！

#3813

第三件試呢件！好在...... 自己著出嚟同 Model 著出嚟差唔多，不過人哋多份斯文嘅氣質，我就好似......強行扮斯文嘅效果咁！

男朋友話呢件同第一件都 ok，不過第一件嘅層次出 d，呢件用嚟影相就稍嫌冇乜嘢睇！之後試邊件嘅次序都唔係好記得......

#3826

Model 真係 Model，佢著同嚟同我著出嚟係差天共地，人哋可以著得好優雅，我就好似著咗第二件衫咁，不過呢件反而男朋友 & sales 都覺得 OK！但我認為影相會冇嘢睇！

#3717

試呢件時真係冇諗過實物同相係有咁大差別！我一路試一路都諗緊：「乜我有揀呢件咩？咩嚟架？」不過 sales 話真係呢件喎...... 之前仲諗住呢件會租出去結婚當日著，宜家試咗啦.......... 結果我係著得一塌糊塗！！！諗都唔洗諗，即 foul！

#3817

之後就到我嘅首選！試出嚟都 OK，不過原來自己著上身冇 #9043 及 #3813 咁好睇。男朋友就對呢件 no comments，佢咁講得，即係 foul 得！

#3818

之後就到呢件啦！呢件起初個 sales 幫我加咗綱紗，我同男朋友都想睇吓唔加鋼紗嘅效果，結果...... a-line 好睇過鋼紗好多！男朋友話呢件唔錯喎（咦？咁即係可以 confirm？）不過又係啦...... 我稍嫌影相會冇咩嘢睇！

講埋鋼紗及晚裝後先講最後 confirm 咗邊件！