我係咪真係似水魚啫?

日期：都唔記得邊日 lu

事發地點：公司

涉案人物：Belinda 與我

案件編號 1

我諗，我唔係真係咁似一條水魚吓嘛？否則，點解 Belinda 成日老點我呢？

話說我之前收到中國銀行寄嚟嘅一張發票，要收我哋公司 HK$300，原因係幫我哋出咗張 audit confirmation。不過奇就奇在唔知點解封信係 attention 比我同埋 Raymond，咁 receiptionist Angie 就好自然將封信交比我而唔交比 Raymond，咁呢樣我都明白嘅，因為 Angie 一向怕 Raymond。

我拆開封信見到係 audit 嘅嘢，我就知道根本係中銀嗰邊寫錯咗收信人，呢 d audit 嘅嘢同我跟開嘅 syn. loan 都冇關係，不過算啦，我唔拆都拆咗，嗰一刻咁啱又要入 Raymond 房搵佢，咪諗住順便拎張單入去比佢簽名 approve 囉！

我拎咗入去講晒我要講嘅嘢之後，就拎張單比 Raymond 簽，其實佢都唔係太知道成件事 exactly 係點，不過 Raymond 話都係收我哋 HK$300 啫，比佢啦...... 所以佢即刻簽咗個名 approve 咗張單。咁我就如常咁將張 approve 咗嘅單交比 Belinda 等佢找數，其實我做到呢一步已經好仁至義盡，因為呢 d 嘢唔應該係我跟...... 點解？因為我點知佢係咪真係做咗張 audit confirmation 出嚟啫？我點知實際收費係咪 HK$300 一張啫？我係順便架咋！！！Belinda 收到張單之後，開始出招......

佢同我講：「Jenny 呀，呢度寫住話如果簽咗名之後要 fax 返比佢架喎，你 fax 咗未呀？」

「未喎！」

「咁你哋平時係點做開架？我見你哋平時係打多句 I hereby authorize you to debit our bank account numbered xxxxx，之後先比 Raymond approve 架喎！」

「係呀，我哋平時係咁做！不過 Raymond 呢個簽名唔係 approve 中銀扣我哋錢呀，佢只係 approve 呢張單，然後你要去找數呀！」

Belinda 開始懷疑，覺得我應該要寫埋呢句落去先比 Raymond 簽名，佢淨係 file 張 invoice 就 OK。」

我其實憑佢嘅表情及語氣已經知呢個就係佢嘅目的，不過我唔會咁易妥協，所以我重覆返以上嘅說話一次。

佢再扮傻，扮唔明我講咩，如是者佢扮咗兩次傻！

好，你扮傻，我都唔怕煩，你唔明咪解釋到你明囉，要我解釋一萬次都好，我都唔會幫你打埋呢句嘢上去，以前就你都就得多啦，我今次唔會咁易上當！明明今次係你哋會計部 audit 嘅事，張單寫比我收已經係一個問題，我主動幫你拎埋張單比 Raymond approve 已經幫到你好盡，你宜家仲想我幫你做埋嗰 d 手尾？平時又唔見你好主動咁比埋你份糧我？

我精佢都唔蠢，佢依然扮唔明，覺得我要打埋嗰句嘢上去！OK，我嗰一刻好忙，唔同你嘈，不過我堅持唔幫你寫，問問吓唔知佢自己係咪都亂亂地，佢問我：「哦...... 係咪將單一開始已經比咗 Raymond，你都唔知，咁 Raymond 就手快快簽完名之後扔返出嚟比你呀？」我見佢已經諗好晒成件事嘅來龍去脈，所以我選擇咗向佢講大話，我話：「係呀！」之後佢就返埋自己位，乖乖地咁找咗張單。

我嘅堅持總算冇白費！

案件編號 2

話說我哋每個 department 都有一部 printer，由於我係一人部門，部 printer 係我一人獨享，而 Belinda & Mandy 同屬會計部，所以佢哋部 printer 要共用。

今日，當我做緊紅牌阿姑時（即係好忙好忙，個個都搵我做嘢嗰陣），我講緊電話，而 Belinda 就 send email 比我，信裡面只係 attach 咗一份文件，而標題係 printer。我啱啱見到呢封 email，都未得閒打開之際，佢已經走埋嚟我個位（注意，我當時係講緊電話），佢手指指，指一指我個 outlook，又指一指我部 printer，當時我同人講緊電話，聽緊對方講咩，都冇理 Belinda 究竟想點，之後佢就自己走埋去我部 printer "zip" 紙入去，喺呢個時候，我都咁啱講完電話收線。佢向我表示佢部 printer 今日唔知做咩鬼一時 print 到一時 print 唔到，佢已經 re-boot 佢部電腦，不過都係冇用，相信原因係喺 Mandy 部電腦度，但係見 Mandy 又用緊電腦，唔係好方便叫佢 re-boot，所以就想借我部 printer。其實講到呢度，我想講我一 d 都唔介意借部 printer 佢用，我嬲係嬲佢以下嘅一句說話！

Belinda：「我部 printer 今日神神地，我已經 re-boot 過部腦但係都冇用，應該係關 Mandy 事，不過我見佢忙緊，唔方便叫佢熄機。」

嗱嗱嗱！原來到咗今時今日佢仍然覺得我日日都好得閒，而忙就只有 Mandy 一個忙咋！真係唔明佢咩心態！！！講真，我借部 printer 比你用我一 d 都唔介意，部 printer 又唔係我嘅，你鐘意的話拎埋返屋企我都冇所謂添，但係咩叫做「見 Mandy 忙緊，所以要嚟滾搞你？」哼，我諗我真係要做 d 嘢等佢知道其實我唔係好得閒架，我唔係日日返工等出糧，白逗人工架！

宜家連老細都知我忙，佢今日同我講話想聽日過澳門簽嘢，想我今日做起某 d 文件比佢帶過去，不過我話我做唔切，佢都明白，所以佢自動將澳門個 appointment 延遲到下星期四，等我有多 d 時間預備所需嘅文件！

再者，有份匯豐銀行嘅文件要簽，我收到之後連續 3 日都唔得閒搞，連個信封拆都未拆，老細其實急急地想要呢份嘢，佢都自動幫我分擔咗工作，將呢個 file 比咗阿 Kim 跟，等我可以專注做 Open Offer 嘅嘢！

再再者，有一晚老細想我幫佢打電話比某某公司 make appointment，不過我嗰刻又係講緊電話，嗰個電話一講完，我個 headphone 一放低，第二個電話隨即就响，如是者連續要講三個電話，老細都等唔切叫咗其他人幫佢打呢個電話！我係咪得閒，我諗有眼睇......

我忙，係事實，連老細日日坐房／去會議室見客，都知道坐喺出面嘅我有 d 好重要嘅嘢要 follow，都唔想要我兼顧太多嘢！Belinda，你日日同我一齊返工，聽到我有好多電話响，見到我 d 嘢有幾趕，你唔好話我知你仍然覺得我日日都好得閒！