結婚一週年活動預告

睇住 blog 嗰條倒數 banner, 唔覺唔覺仲有一個月多 D 就係結婚一週年。呢一年嚟我可以話過得超快... 或者我簡短匯報一下呢一年嘅生活:

星期一至五要返工, 逢星期四、五夜晚學跳舞

老公例牌每晚放 10 點咁滯 (都唔明咩工做到隻積咁), 我一條友唔知食乜, 結果我唯有約朋友食飯 / 返娘家食飯, 返到自己屋企已經 11 點幾...

沖埋個涼, 執下嘢, 諗下聽日著咩衫, 上下 facebook, 話咁快就點幾兩點, 又係時候躝上床做豬...

星期六... 返半日, 放工通常要走返入屯門做 facial (我皮膚差嘛... 最長都只可以拖到 2 星期做 1 次), 一訓上床比人做... 咁又冇咗 3 粒鐘... 6 點幾返到屋企, 連湯都冇時間煲... 只夠時間煮飯...

星期日, 係就係唔洗再出街, 但係家務點都要有人做, 洗衫晾衫摺衫掃地吸塵拖地呢 d 工夫就係呢個時候做, 有時仲會煲埋湯, 煮埋夜晚餐飯, 咁又冇埋個假期... 我終於明白點解全職主婦下晝係唔會悶...

久不久仲會收到電話, 4 大長老投訴話好耐冇見過我哋, 唯一嘅假期都要出埋去, 咁就真係冇放過假啦!

所以話, 婚後嘅女人... 真係忙過做女好多~ 我徹底咁明白啦~~~~

好啦... 呻完, 日子都係要過... 係時候交待下一週年有乜搞... 11 月... 我哋將會到訪呢度:

有冇 bloggers 覺得熟口熟面?????

係咪已經估到啦?

我同老公將會入住嘅酒店:

其實只係沙巴是也!

今次個 trip 其實都 plan 得好突然... 話說之前都冇諗過去旅行, 只係會食餐好嘅就當慶祝, 不過我突然唔知痴咗邊條筋, 試探下老公肯唔肯去旅行慶祝, 點知佢又 ok 喎, 所以我要多謝我呢條筋痴得合時!

至於點解會揀沙巴... 我都唔知點解~ 一向陽光與海灘嘅地方都唔係我杯茶, 不過今次係我主動提議去... 或者我真係想去一個 relax trip 啦! 日本... honeymoon 時去過~ 台灣... 極有可能遲 d 同老爺奶奶去~ 新加坡 / 韓國暫時冇興趣, 其實好想去澳洲, 但係唔想 side 太多錢喺呢方面, 馬爾代夫一定冇我份, 所以一係泰國, 一係沙巴... 結果梗係揀一個未去過嘅地方啦, 當佢係一個 mini 版馬爾代夫都好吖~ 最終喺 7 / 8 月左右先開始 plan~

今次喺 CX holidays 買 package, 搭港龍航空, 早機去晚機返, 由於想住好 d, 所以揀咗間市中心嘅 5 星級酒店 The Sutera Hotel - Magellan Wing, 2 個人連稅後埋單要過 1 萬蚊~ 仲貴過我當初買 package 去日本 honeymoon 9 日 (今次去 5 日咋)... 我見朋友搭 air asia, 都係住 town 但住 3 星, 可以 $2,xxx 埋單... 開始覺得自己有 d on 居... 去旅行難度會日日留喺 resort? 如果只求一床, 係咪唔洗落咁重本呢? 不過是但啦~ 錢已經比咗, 去慶祝一週年都唔可以太慳架嘛, 就當對自己好 d 啦! 唔好睇小沙巴嘅吸引力, 當 CX holidays 出咗 promotion package 後, 我仲懶懶閒, 打算唔 book 住再格下價, 點知不出 2 星期, 見佢 D 酒店係咁 full, 我都不敢怠慢, 9 月中時出手 book 咗, 點知酒店嗰邊都要我入 waiting list, 幸好第二日就通知我 confirm 咗啦! 

5 日行程話咁快就 plan 好! 因為唔係太難吖... 上網一 search, 例牌都係玩嗰 d 嘢: 神山公園, 出島玩浮潛 / 餵魚 / 水上活動, 激流, 睇日落, spa, 食肉骨茶, 海鮮等等, 樣樣都有我份, 嘻嘻!

旅遊書話... 喺沙巴, 無論咩天氣, 佢嘅日落都好靚, 皆因地理位置好~ 就算你帶部傻瓜機去影日落, 影完出嚟都會變大師級作品~ 希望我都可以感受到~~~

唯一擔心嘅係 11 月係沙巴嘅雨季, 希望唔好掃我興啦... 我要玩架... 亦希望太陽唔好太猛烈... 我唔想變咗非洲土著咁返香港呀~

結婚相簿 - 主角

呢壇嘢, 真係搞咗好好好耐... 講到尾都係自己衰, 結咗婚咁耐都唔肯的起心肝揀相比攝影公司做, 到咗今年嘅 5 月, 人哋淡季啦, 要清舊債, 起勢催我哋交相, 催相嘅程度, 好比中級程度大耳窿, 個幾兩個禮拜催一次, 我先肯去 sort 相比人。

其實我 join 嘅 package 有 2 本相簿, 一本可以排 80 張, 另一本排 180 張, 同老公商討後, 決定 80 張嗰本主要放我哋兩個嘅相, 而 180 張嗰本主要放 snap shot。結果... 我都用咗 2 星期時間先揀好晒相, 細嗰本揀咗 7x 張, 大嗰本就直情當人冇到, 揀咗 25x 張出嚟... hehe~ 人哋唔鬧我都算偷笑!

好啦, 7x 張嗰本冇問題啦, 照排... 但係大嗰本人哋梗係 reject 啦, 自己返屋企再 cut 相, 已經好狠心咁 cut 到 23x 張, 再交相, 再 reject... 今次依然行 "搏大霧" 呢招, cut 淨 19x 張比佢排, 大約 2 星期前交咗相啦, 到今日都未收到回覆, 唔知係人哋旺季未得閒理我本相簿吖, 定係過咗骨呢? 人哋話頂龍 180 張架咋... 希望唔好再被人 reject... 我 cut 唔落手架啦!

講返細嗰本, 我第一次交相後人哋兩個星期內就排咗個 1st draft 比我, 雖然收到個排版, 但排出嚟都幾嘔血, 淨係個封面封底已經殺死我...

Well.... 想點呢? 紅噹噹咁即係算點? 可唔可以唔好咁 hea? 囍字係封面, 嗰幅合照係封底, sorry... 我接受唔到呢種排版, 當然勁改啦!

籌備婚禮時好艱辛咁 design 咗個 wedding logo, 我梗係會大派用場啦...

打算封面改做粉色, 放大我個 wedding logo, background 嗰 d 格格相.... sorry... 我唔要啦~

封底亦唔搞太多嘢, 合照可以慳返, 淨係會放入呢段文字:

I do, cherish you

For the rest of my life

You don't have to think twice

I will, love you still, from the depths of my soul

It's beyond my control

I've waited so long to say this to you

YES I DO

當然啦, 我英文能力邊樹係咁把炮, 呢段嘢唔係我作嘅, 只係抄歌詞, 而且呢首歌係我做即日剪片時註冊嗰 part 嘅 background 歌, 用喺呢度都好適合吖~ 至於底色襯返封面嗰隻粉色就足夠啦, 唔洗太多花臣嘢!

好, 封面封底改完, 睇內頁啦喎... 我其實唔係太識 design 呢家嘢, 好多 comments 都係由老公比, 佢都執到慶慶地... 我就硬係覺得怪怪地, 之但係又並非接受唔到囉嗰種感覺~ 下面呢張都好似冇乜大改, 只係 delete 咗嗰張 double 相就算, 另外幫 d 相加返底框, 唔好好似夾硬塞上去。

好, 再下一頁...

其實又係冇乜大改, 因為我都唔知點改好, 我淨係覺得佢排得冇乜誠意, 純粹將 d 有 "啦 lung" 嘅相排埋一齊就當做咗嘢??? 仲有... 呢張嘅左下角做咩事要同我留白邊? 改改佢, 將 d 相嘅次序調一調, 咁會順眼 d!

NEXT...

呢張都尚算 OK 啦, 又係加返少少框邊, 執執 d 位就比佢過關啦~ 排到我都唔想排~

外影呢張都 ok 嘅, 係我自己衰啫, 比咁多相人哋排, 好似好密麻麻咁~

渡海小輪呢版我會幾期待囉~ 排版上其實冇乜問題, 又係多咗張 double 相囉, 我唔明點解排版師父睇唔到嘅呢? 最後我決定將呢版所有相轉做懷舊 tone, 突然間覺得好襯我 "渡海小輪" 呢個主題... hahahaha! 不過攝影公司都好麻煩下, 明明已經燒晒 d 相比佢, 佢都唔肯同我轉 tone, 要我自己轉喎... 又話擔心轉錯相, 又話擔心轉錯 tone... 唉, 是但啦, 好彩唔係 d 咩艱辛工作... 而且佢哋間舖同我公司都好近啫~

呢版越睇越覺得奇怪, 點解好似張張相都好唔襯嘅? d 色根本都唔啱... 我都唔記得自己點改動佢呢個排版啦! 唉... 點解我入席前唔影多 d 單人 / 合照呢? 呢版好少相呀...

LAST PAGE...

呢張紫藍色嘅排版, 係我同老公最冇 comments 嘅一版, 只係將 "飲杯" 嗰幅相我咀角附近嗰 d 閃閃發光嘢移走, 咁就比佢過骨啦~

唉... 唔知點解, 硬係覺得本相簿排出嚟唔會靚得去邊, 不過是但啦... 呢本嘢都只係拎出去比四大長老 / 朋友睇下, 之後都應該長埋床下底架啦... 預祝相簿早日安息... 阿門~

撞鬼@追月夜 2010

2010 年 9 月 23 日 (星期四)

自從買咗部 Canon 500D 後都冇乜點攞佢出嚟用, 今晚就一於去冒下險, 影下 d 鬼魂邪神啦! 是晚為追月夜, 再次得到海洋公園哈佬喂免費 VIP 門票, 仲唔拿拿聲同老公兩個入去撞下鬼!

朋友問我點解成日都有海洋公園 free tickets, 其實我都唔係成日有, 只有佢哈佬喂時先有.... 過 2 次咁大把 (但係都夠晒啦)! 第一次有飛, 因為我老闆個仔係仁愛堂總理, 贊助費老馮要比架啦, 換嚟咪有幾十張 free tickets 囉, 所以益咗我呢 d 員工仔, 當時仲分配到 6 張, 叫埋老公 2 個細佬及佢哋 d 女朋友去。

今次有飛, 因為老闆一個好尊敬嘅朋友又係總理 (今趟係保良局), 佢哋一定比人揼心口架啦, 咪又有幾張 free tickets 回饋下, 又分配到 2 張返嚟!

好, 到達 Ocean Park, 當然要喺門前留返兩條腳毛啦... 當晚人唔太多, 好似因為只係啱啱舉行咗兩三晚, 好易就企到靚位。

旁邊擺咗幾檔嘢賣下飾物搞搞氣氛, 不過我今次好慳家, 冇上當喎~

一入門口, d 鬼先啱啱 warm up 緊, 喺一個特定嘅 area 跳緊舞... 我梗係唔會放過呢 d "餐屎" 啦, 眼金金咁望到實一實...

d 鬼個個都係 dancer, locking, popping, jazz, breaking 應有盡有, 頭盤已經好滿足! 最搞笑係佢哋跳完之後會整整齊齊排好條隊, 再有個 staff 一路搖住個金色鈴鈴帶佢哋出嚟。

係咁易行咗個 round, 山下冇咩嘢好玩, 所以就去搭纜車上山。

行兩行, 開始見到好多鬼屋! 呢個仲講明係抄荔園嘅恐龍屋添...

不過真係 so sorry, 我自認細膽, 所有鬼屋都冇入, 好彩係 free tickets, 否則我咁蝕, 真係唔會買飛入場, 仲浪費埋個 VIP 添呀 ( = 唔洗排隊)。結果全晚就係入館啦, 同埋玩機動遊戲囉!

我所講嘅 "機動遊戲" 都唔算十分刺激... 摩天輪....

迴旋海底世界

呢個 360 度旋轉嘅觀光塔 (想死未? 係咪好想柴我台?)

其實... 我仲玩咗 5 次海盜船架... 海盜船係我至愛嘅機動遊戲... 最鐘意去感受佢嗰種離心力... 有得揀, 我一定會坐最尾嗰排, 當架船 fing 到去最高時會高舉雙手嗰種...

至於過山車...

幾年前喺呢度玩過一次... 嗰次係我第一次玩過山車, 玩完後覺得冇乜特別, 因為全程你都會比嗰舊倒 U 型安全 cushion lock 實咗, 個頭唔可以郁只可以眼珠郁, 左 fing fing 右 fing fing, 幾時倒轉咗個人又唔知, 淨係見到 d 頭髮倒轉晒先知囉... 所以之後都冇咗衝動玩 lu...

展覽館方面, 由於都夜啦, 好多都休息啦, 唯一呢個水族館一定要入去。

以前對海洋一詞冇乜感覺, 但受老公影響 (佢係海洋愛好者), 漸漸覺得水中生物都好靚, 不知不覺間就成日都會留意, 所以都好期待我哋 11 月慶祝結婚一週年嘅沙巴之旅架!

估唔到咁就玩到 9 點幾 10 點, 臨走時搵咗幾隻鬼影相, 呢隻恐佈嗎? 老實講, 第一眼見到佢時都有 d 驚。唔知佢點呼吸 + 睇路呢?

呢隻唔知乜傢伙, 不過當佢自己一個企喺度時有 d 似假公仔。

仲有牛頭馬面嘅牛頭, 本來諗住搵埋馬面影相, 點知失咗蹤, 牛頭先生都話搵緊佢喎!

走啦, 見到氫氣球升咗上嚟喎, 再影多張先~

總括嚟講, 今年嘅海洋公園其實幾揼本, 佢個 music video 真係好有誠意囉! 全園嘅佈置有進步, 而且園方擔心 d 化妝人員比人襲擊, 佢哋都安排咗一個公園員工跟住一隻鬼, 化妝又真, 工作人員又搞笑, 只係我細膽冇入鬼屋啫, 否則應該仲好玩!

 

後記:

突然覺得自己好乖... 又 update 咗一篇 blog, 不過即管放長雙眼睇下自己 keep 到幾耐... 連自己都睇唔起自己, Jenny 你真係好無鬼用! =p

升呢日之《迎賓篇-晚裝》@ 我係歐陽家大少奶

對上一篇 blog 都唔知隔咗幾耐, 不過近來真係幾忙, 希望唔會脫軌脫得太厲害! 宜家繼續我嘅升呢之旅...

2009 年 11 月 21 日（星期六）

喺酒樓著褂只係著咗大半個鐘左右係咁斟茶斟茶，期間酒樓職員話係時候切蛋糕，否則夜少少就唔夠時間啦，所以見斟得七七八八，又衝入新娘房換返件迎賓晚裝出嚟。其實我好鐘意呢件晚裝呢，總係覺得有少少黑色好型啫！

呢個蛋糕，我只係切佢時見過佢一面，之後佢被人殲滅咗，我哋已經冇緣再見，想試下好唔好食都冇機會啦！蛋糕並非由酒樓提供，係我婚前兩日喺附近嘅東海堂訂，本來想訂其他餅店，可惜原來最近利舞台嘅... 只係得東海堂！但係賣相都唔差吖，味道就唔知啦！

影相、交杯、落刀、錫錫、餵對方食生果，全部都係指定動作，好在唔洗法式濕吻

我唔明點解新郎哥有時間食蛋糕囉

之後嘅節目其實都幾悶，因為只係佈景板活動，我都只係 post d d 出嚟就算啦！

多謝林氏夫婦、嘉芙蓮及緣美傳說嘅 Zita，佢哋唔知玩咩玩得咁開心呢！

我嘅闔家福，晒大咗掛喺媽咪屋企啦！

四大長老合照

在此亦要多謝陳氏夫婦出席，更多謝陳生特登走過嚟影相，佢當日要出席另一個婚禮呀，1121 果然人人都要去飲

熟口熟面都係呢班人啦，friend 吖嘛！

話時話，我成日喺 facebook / blog 講我公司 d 嘢，福利等等，其實大家係咪好想一睹蘆山真面目，見見我老細究竟乜頭乜路，好想了解下點解佢哋成日咁錫啲員工？登登登凳，老闆及老闆娘在此接受我哋敬茶，真係多謝佢哋收留咗我六年呢，我暫時都會視呢份工為我嘅長工，我打算做過世架啦，hahahaha！

順帶一提，本身佢哋話嗰晚要過澳門賭兩鋪，星期日先返香港，話唔嚟飲茶架啦，但最後又突然出現咗喎，不過就真係冇食飯。婚後第二晚我拆利是先發現，嗰封敬茶利是竟然係每封 HK$500，我唔知算唔算出手高，但係喺我心目中已經好高好高好高！