真係估佢唔到

2008 年 9 月 10 日（星期三）

今日有 d 事發生咗，一半開心，一半唔開心。

事緣我一直都冇諗過會收到男家嘅任何金器，原因有兩個：

1) 我／佢屋企都冇人辦過囍事，其實我都唔知男家知唔知要買金；

2) 聽豬 B 講佢媽咪一向都冇乜錢

所以我一路都唔抱有希望會收到佢哋送嘅任何金器，結果買金器呢個責任就交晒比媽咪，媽咪話如果金價理想的話，佢可以買三對龍鳳鈪比我，咁等我冇咁寒酸。

我見到今日飾金價係近幾年嚟跌到最低嘅一次，所以我就約埋媽咪放工去買龍鳳鈪。豬 B 就話幫我套佢媽咪口風睇吓佢有冇諗住買金比我，如果冇的話就算，有的話就提一提佢呢排金價跌，可以入貨。所以豬 B 就幫我打電話比佢媽咪，原來佢哋已經買咗金比我，真係估佢唔到（呢個係一半開心嘅原因）。不過，原來佢唔係買龍鳳鈪，只係買咗鍊。原因係覺得我將來冇機會戴返對鈪，反而會有機會帶鍊。呢個原因我係明白嘅...... 不過其實就算佢送鍊比我，我將來都唔會戴，而且，傳統上娶新抱係應該要送鈪。如果佢冇買比我，我又唔想我／佢哋比人講，話晒我當日係主角，身上幾多金器都會比人由頭到腳咁打量，而且斟茶時又會見到阿邊個送咩金器比我，咁佢哋身為主人家，冇一對龍鳳鈪好似唔係咁好，到時我只係帶住媽咪送比我嗰一對...... 好似又唔係好夠！不過，講到底，佢哋唔買都買咗，我又唔可以開聲叫佢買對鈪比我，因為我唔想搞到好似我 push 佢去買咁。所以我聽咗呢個消息之後，有一半唔開心。

後來聽返豬 B 講，原來佢都有建議佢阿媽買鈪會好 d，否則比人睇到的話有可能會比人話小器、唔夠大方得體咁，仲講埋比佢阿媽聽我媽咪都買咗隻龍戒指比佢。最後佢買唔買我就控制唔到啦！

不過...... 都有幾樣嘢令我覺得開心嘅：

1) 佢媽咪竟然主動問我哋幾時有結婚相睇

2) 原來佢父母一早已經買咗金器比我

講真，其實由我同豬 B 拍拖開始，我一路都唔覺得佢哋特別鐘意我／照顧我（咁當然我唔會覺得佢哋憎我嘅）。例如埋枱食飯，佢哋已經好耐冇叫我：Jenny，挾餸啦！你咁瘦，食多 d 啦！或者講一 d 比較「照顧性」嘅說話，好多時都係關心其餘兩個仔嘅女朋友多過我，講真吖，嗰一刻我係有少少 hard feeling，豬 B 又唔知我個心諗乜，如果我同豬 B 講，得出嚟嘅答案極有可能係：你唔成熟等等。所以我唔可以向佢呻，豬 B 幫我唔到，我惟有咁諗嚟令自己好過 d：可能係因為同豬 B 拍拖嘅日子越嚟越耐，佢哋都慢慢當咗我係屋企人咁，都唔洗點照顧啦！呢樣我係必需要明白嘅！

好啦，到之後我哋決定買樓，搞結婚，佢哋都好似不聞不問，一 d 都唔在意，所以我從來冇諗過原來佢兩老都為呢件事咁上心，呢樣嘢我真係幾 surprise 架！亦因為佢哋咁上心，今日我知道佢兩老私底下買咗金比我之後，我暗地裡同自己講：

原來我都幾幸福喎！

原來佢哋都有錫我架喎！

原來我做咗人哋新抱之後，日子應該都唔會太難過喎！

至於買唔買龍鳳鈪方面，唉，我真係唔知...... 算啦，佢哋唔買都買咗啦，收到就當 bonus，冇就冇囉，好過比期望自己吖！

P.S. 豬 B，我知你有可能識得 login 睇我呢篇 blog，不過我想重申，我咁寫出嚟唔係想同你發洩 d 乜，亦唔係想暗示／呻 d 乜，我只係純粹想喺一個屬於自己嘅地方寫一寫今日嘅感受。你唔好再誤會我啦，我同咗你一齊咁多年，希望你其實係認認真真咁了解我。