再為籌備婚宴努力中....

好緊張, 啱啱搞完酒席以為可以休息一排先再煩其他婚宴上嘅細節, 但呢兩日上 esd life, 遇上同我同年同月同日結婚嘅網友, 佢哋都開始 book 緊其他嘢, 例如攝影, 化妝, 租衫等等..... 有個網友仲誇張, 佢心目中有一間攝錄公司打算打電話去預約, 點知竟然 fully booked. 真係有冇搞錯? 早成 2x 個月去 book 公司都 book 唔到, 睇嚟我真係低估咗同我同一日結婚嘅人數啦! 咁點算呢? 我係咪冇得休息, 要繼續努力搵公司呢? 同期我都見到有好幾個網友已經開始揀緊衫啦........會唔會真係快咗 d 呀? 好在我都唔弱, 我宜家都傾緊化妝師啦, 心目中都有一至兩個心水, 暫時佢哋都仲有期, 不過我頭痕嘅係, 咁快 book 化妝師, 我都未知道自己當日會著咩衫, 咁點決定 set 個咩髮型, 化個咩妝去襯衫呢? 其實係咪一般都係咁架...... 喺未知咩情況底下就會 book 咗先, 完全信晒個化妝師嘅功力? 有冇人可以話比我聽呀?

講開又講, 又有一樣挫折事情發生, 話說我哋打算 book 丘比特結婚禮堂行禮, 嗰度真係超靚, 不過一分錢一分貨, 租一個鐘要成萬蚊...... 咁我打去問吓 details 啦, 點知晴天霹靂, 丘比特嗰邊租約期滿, 租期只係去到 08 年 5 月底, 而且業主起勢加佢哋租, 佢哋都仲考慮緊究竟仲繼唔繼續做落去, 仲話起碼要到 4 月底先有結果...... 咁.......咁我點算? 等一個 50/50 嘅答案? 定係決定租 2 in 1 / 伊甸園? 定還是返去政府嗰 d 註冊署註冊? <--- 呢個係我 last choice, 我唔係咁想去返註冊署....

其實我都仲有好多嘢未搞:

酒席:     銅鑼灣利舞台麒麟閣

註冊:     家吓都唔知點算, 一係 2 in 1, 一係伊甸園

律師證婚:  希望註冊嗰度包埋

婚紗相: 美麗佳人 Marry Clarie

主花車:  阿達 (倫敦的士)

van 仔: 冇頭緒

帖:    酒樓送

租衫 / 褂 / 男禮 / 媽咪衫 / 奶奶衫:  冇頭緒

化妝師:  傾緊, 暫有1-2個心水化妝師

攝錄:  冇頭緒

花球:  未搞, 我諗住買現成, 應該好快啩

回禮小禮物:  有諗過吓, 但未實質去做

MC: 冇頭緒

餅咭 (西餅及唐餅): 未買, 但會揀美心及奇華 (應該唔難買啩, 到時唔好話我知冇貨)

花車佈置:  要自己搞掂, 冇人幫手

 

唉, 十九幾萬樣嘢都未搞, 估唔到要搞一個婚禮真係要咁長時間, 尤其是我揀咗個超超超旺日去結婚.....話時話, 揀呢一日結婚都唔知係好事定壞事, 好事 -- 呢一日一定係大吉日, 壞事 -- 籌備時咩都同人爭, 好煩....我不嬲都唔鐘意爭嘢!

......唉............有時候真係覺得有 d 孤軍作戰嘅感覺....我其實好想我哋兩口子可以共同完成一個100分嘅婚禮, 但係由一籌備開始到宜家, 好似每件事都係由我去搞, 或者真係要我迫你你先去做, 先去問....我知我咁諗唔係好啱, 或者你私底下都有諗過個婚禮係點, 我唔可以抹煞你嘅心機, 不過講真我唔係好 feel 到 ^ ^....其實....我都明白你份工同我份工差好遠, 你每日返工都好忙, 電話响個不停, 而我就可以對住部電腦, 得閒可以上吓網搜集吓資料, 所以...雖則感覺上好似我搞晒, 但係我暫時都冇咩怨氣.....遲 d 唔敢講啦 ~~ 或者你會話你都有幫手諗吓揀邊間, 幫手比意見, 但係每次都係我踏出第一步先, 揀完一輪先同你商量, 感覺上就好似下屬服侍老闆咁, 但往往最難嘅一步就係第一吓篩選嗰步...... 算啦, 發完蹹風, 又做返個緊張嘅平常人....... Yeah!

嚇死, 原來漏咗喺屋企!

呵呵! 我終於搵返嗰隻陪我出生入死嘅介子啦! 真係嚇死, 以為跌咗.....好彩搵得返, 原來係自己根本冇帶到出街!

尋晚返到屋企立即入房搵, 見到隻介子安然無恙, 個心終於定 d !!!

我真係超鐘意呢隻介子架!

極度沮喪的一天......

唉! 今日勁 down, 原因係擔心唔見咗隻鑽石介子~~~~~

今日匆匆忙忙咁出門口返工, 褸又未著, 頸巾又未 lam 咁行出門口, 平時我係臨出門口先戴耳環, 錶, 介子等等, 我以為一切都 ok........

上到村巴, 打算搽 hand cream, 一般我會除低 2 隻介子先搽, 點知我發覺原來我最最最鐘意嗰隻介子唔喺手指度.......... 吓? 點算? 唔通沿路跑去追車時跌咗都唔知? 我已經有前科架啦! 加上呢排個人好似瘦咗少少, 其實都發覺 2 隻介子都鬆鬆地..... 唉, 希望係自己唔記得帶, 漏咗喺屋企啦! 呢隻介子我真係幾鐘意, 唔係因為粒鑽石大等原因, 個款我自己本身都好鐘意, (當然粒石都 ok 大啦), 唉...... 呢隻介子陪咗我好耐架啦, 簡直係見證住我同男朋友咁多年嚟嘅感情, 宜家都唔知係咪跌咗添架.......超傷心!!!!!

郭富城演唱會後記

演唱會圓滿結束, 但換嚟嘅係一大堆工作要做, 我發覺好多 fans 都係咁, 呢個又係另一個 AK fans 通病! 之前嗰一至兩個星期, 個個 fans 都投入晒個演唱會中, 公司所有工作都放埋一邊, 返工時大家用 msn group chat, 放工好神心咁準時走, vivi 仲講大話向公司請假早走添, 個個 fans 為咗 Aaron 咩都做得出!

而我, 我一向都出名公司冇乜嘢比我做, 不過又唔可以講話完全冇嘢做, 濕碎嘢點都有嘅, 不過我一樣都係放埋一邊先, 繼續同 AK fans msn group chat, 話知佢啦! 加上我又未上次坐台上加位影咗相及 movies, 所以我都要花少少時間整理一下! 佢哋又話遲 d 3月8日去小欖 BBQ 喎, 到時再交換喺演唱會中影咗嘅相及片段。

等我總括吓今次呢個演唱會我坐咗咩位, 又買咗咩紀念品:

14-2-2008 (四)  --  HK$480 (x2) (經歌迷會訂飛) Block B H行 seat no. 1-2

15-2-2008 (五)  --  缺席冇去

16-2-2008 (六)  --  HK$480 (台上加位, 全靠 vivi 我先有得去) Block B S行 seat no. 21

17-2-2008 (日)  --  HK$650 (x2) (黃牛飛) Block C B行 seat no. 43-44

21-2-2008 (四)  --  HK$500 (x2) (Tom 幫我攞飛) Block C B行 seat no. 15-16

22-2-2008 (五)  --  HK$550 (黃牛飛) Block B D行 seat no. 19

23-2-2008 (六)  --  HK$650 (黃牛飛) Block B C行 seat no. 42

淨係買飛都買咗 HK$4,940, 頭兩場仲買咗紀念品, 分別買咗兩個 figures, 一個係 opening, 另一個係彈琴 (一個 HK$200, 一個 HK$230), 買咗07年款 tee + cap 帽 set (HK$180), 同埋買咗張 poster (HK$20), 其實張 poster 我本應買唔買都得, 但鬼叫佢今次張 poster 超靚, 又有閃粉, 簡直一見傾情, 所以係必買 item, 埋單咁就 HK$630, 全個演唱會用咗 HK$5,570, 都仲未計車錢! 講真, 來來回回博覽館都唔係平架, 頭嗰兩場又 on 居居咁搭機鐵, HK$49一程去到青衣, 仲要轉 263M / 68A, 大大話話用咗成 HK$60車錢一日, 好在之後識得搭禮賓專線, 唔洗錢, 淨係去車站時嗰一程要錢啫! 不過車錢都我嚟講都唔係問題, 而且我都覺得今次用喺個演唱會上嘅錢都用得好有價值! 錢用咗可以再搵過, 最多咪慳 d 洗, 但 Aaron 嘅演出, 錯過咗就冇, 宜家雖則話等 4 年, 都唔知係咪真嘅, 所以.... 錢財身外物! 好在我都唔執輸, 執到由 Aaron 身上跌出嚟嘅施華洛世奇水晶兩大粒! 有 AK fans 話我分分鐘有賺喎! hehe

Remark：

Samantha send 咗張相比我睇，原來我哋水槍黨竟然比記者影咗相喎！不過咁都好嘅，當係同 Aaron 嘅一個回憶囉！

終於訂咗婚宴場地啦 -- 銅鑼灣利舞台廣場22樓麒麟閣酒家

尋日好緊張, 因為係我同男朋友雙方父母見面嘅日子, 之前其實都叫咗佢哋見到面唔洗傾 d 禮金, 酒席圍數等等嘅敏感話題, 所以全程都唔算有尷尬情況出現, 尚算順利! 佢哋好搞笑, 或者可能係第一次見面, 所以互相稱呼大家做 "歐陽生, 歐陽太" 及 "趙生, 趙太", 哈哈! 不過最尾 say goodbye 時, 我聽到我阿爸同佢父母講 "遲 d 約出嚟飲茶!" 哈, 真係會嗎?

尋晚帶咗佢哋去佐敦迎囍睇場先, 佢哋話嫌迎囍燈光較暗, 又沉色, 媽咪就話迎囍衰在係 L 型廳, 不過一切都唔緊要, 迎囍只係我第二選擇啫! 之後再帶佢哋去我哋嘅心水酒樓麒麟閣睇場, 無可否認, 迎囍地方闊 d, 樓底又高 d, 不過其實我貪麒麟閣四四方方, 頂多只有兩條柱, 加上經理話我擺 20 圍, 有辦法可以幫我避得過兩條柱位, 又可以有麻雀娛樂區, 到時唔洗執枱, 咁就唔會怕得失 d 客人啦! 雖然麒麟閣 d 菜式冇迎囍咁靚, 不過佢周邊 d 設備其實好照顧周到, 學個經理話齋, 基本上我帶幾副啤牌去, 其實已經可以擺酒, 可想而知佢係包 d 嘢包到好足! 最緊要係我可以隨時將翅改做蟹肉燕窩而唔洗加錢, 有幾圍想一個侍應服侍一圍又唔洗特別加錢, 就算全部一人服侍一圍, 都只係加 HK$100, (有冇平 d 呀?) 出面間間酒樓至少都要加 HK$150, 呢間酒樓真係唔話得! 希望我冇揀錯!

[25-2-2008 蘋果日報] 城城淚別個唱 恭迎黛林探訪

郭富城前晚在亞洲博覽館舉行尾場演唱會後，要隔四年才會再辦個唱，他自言在台上不捨得眼濕濕。其經理人小美比他更眼淺，於慶功宴上拿起咪即哭了出來，大讚城城是好歌手。城城坦言熊黛林有傳短訊給他，但沒入後台，不過他歡迎所有緋聞中的女人探訪他。

郭富城在亞洲博覽館舉行的七場「郭富城舞林正傳演唱會延續篇2008」前晚結束，當城城穿以一萬粒水晶鑲造的戰士服飾時，可能過於投入跳舞，以致兩度跌耳機，幸好他及時執生，拿耳機繼續又跳又唱，然後趁機將之放入褲袋。

籌備音樂劇
因為尾場關係，城城應觀眾歡呼大叫出場 encore，他穿浴袍出場感謝觀眾，他說：「再隔四年先有演唱會，呢四年盡快有屬於郭富城音樂劇，事業上有另一突破，四年後再見。」最後眾舞蹈員出場將城城拋起才完場。

慶功宴上，城城逐一請有份出力的幕後功臣上台接受獻花，輪到小美上台，她甫拿起咪即哭了起來，然後說：「做呢個 concert 有好多無名英雄都病晒，成個 panel 位都係藥，呢半年個個同事不眠不休，我流嘅係開心眼淚，好辛苦但好滿足，最緊要係有一個好好歌手去演繹呢個演唱會。」

環顧整個演唱會，城城坦言自彈自唱環節每晚提心吊膽，「唱歌跳舞是十拿九穩，但彈琴是困難事，我每晚也提心吊膽，告訴自己不可彈錯。幸好尾場沒有出錯，很完美」。城城再次感謝捉著他手教彈琴的音樂總監褚鎮東，令一度想放棄的他最終完成演出。

後來城城接受訪問表示，他在台上唱《 臨行 》時，想起隔四年才再有個唱，他也唱至眼濕濕，他說：「好彩平復到心情，一唱完歌就諗起嚟緊嘅工作，因為我已經成熟。」城城透露欲演愛情音樂劇，女主角是內地女星，他謂：「一日同小美開會，見個女仔電視出現，幾 OK，佢拍過劇，我哋未見過面。」問他會否找模特兒演出，城城說：「一定要識唱歌、演戲同跳舞，同我合作，跳舞要有番咁上下，外形要合襯。」

談到緋聞女友熊黛林三度到紅館及博覽館捧場，城城謂熊黛林沒有入後台，門票也不是他贈送，城城說：「我做演唱會時好專注，今日得陳木勝入後台，之前有古巨基同桑蘭。」

「恭喜佢啦」
其後城城突然煞有介事說：「其實我冇乜嘢，邊個入都好，好歡迎任何人士，包括緋聞中女子。」至於熊黛林謂打算 30 歲結婚，城城甜笑說：「恭喜佢啦。」問他是否準備好，城城故意看記者說：「Are you ready ？食舊燒賣先。」逃避回答。

城城每晚個唱都濕身演出，幸好沒有病倒，但很多幕後人員卻生病

城城於個唱尾段被舞蹈員拋起狂歡，他表示歡迎緋聞女友熊黛林探望他。

 

城城跳舞時太投入，耳機兩度跌下，幸他執生成功。

小美上台即哭說不少工作人員相繼病倒，並讚城城是好歌手。

郭富城舞林正傳演唱會2008延續篇第七場 (23-2-2008)

Last show 啦! 郭富城舞林正傳延續篇 2008 終於完滿結束啦! 好唔捨得 Aaron 呀!

尋晚唔夠第六場咁濕, 或者因為我哋唔夠其他人快, 霸唔到靚位玩水, 不過我竟然偷摸到 Aaron 隻手臂, hahaha, 心足啦! 其實尋晚氣氛唔錯架, 或者因為大家都知道今次真真正正係 Aaron concert 嘅尾場啦, 所以個個都好投入! 我哋亦都終於搞掂咗班實Q, 越唔比我哋企, 我哋越要企起身! 唱對你愛不完嗰陣個實Q猛咁叫我哋坐返低, 但個個都當佢透明, 況且係 Aaron 叫我哋識跳的話一齊跳, 咁我哋做 Fans 的, 一定好聽話架嘛, 咪彈晒起身囉, Samatha 仲同實Q講: 係 Aaron 叫我哋跳舞架, 佢係你老闆嚟架, 唔係連你老闆講嘅嘢你都唔聽呀?? 真係不得不服 Samatha, 而且Samatha 全晚都要同實Q理論, 真係辛苦佢! 當 Aaron 唱慢歌時, 我哋又舉高螢光棒 / pong pong 一齊 fing, 勁靚, 勁齊心, 希望 Aaron 自己見到啦!

尋晚坐 BLOCK B C行 SEAT NO. 41 嗰邊, 我哋呢個 Section 最 High, 最齊心! 因為原來後面幾行都係 Fans, 要齊心當然冇問題啦! 有一次 Aaron 原本望住 BLOCK 13 (即 Panel) 嗰邊講緊嘢, Samatha 仲叫我哋連同後一行幾個女仔數 1,2,3 大嗌 Aaron 個名, 當時個場都 OK 靜架 (因為 Aaron 講緊嘢嘛), 但係 Aaron 聽到我哋叫佢個名, 佢擰轉咗身向住我哋 Section 繼續講嘢, 仲同我哋揮手添, 真係超興奮啦! 連個實Q都話: 全場最 high 都係你哋啦! 高峰期時仲有5個實Q一齊管我哋呀, 你話係咪勁啦?

玩完水, 當然又有 mission 啦, 就係全場嗌 encore, 其實我一早覺得可以順利 encore, 因為有人有經驗, 雖然最後有大概 8 成人都留低, 但我相信有份嗌 encore 的只有5-6成左右, 或者佢哋已經假設一定有 encore! 不過最後都成功嗌返 Aaron 出嚟, 睇得出佢同小美都早有準備, 因為隊 live band 都冇走過, 而且嗌咗一陣之嘛, Aaron 都出返嚟, 今次連涼都未沖, 就咁換咗件閃爆嘅浴袍就出嚟啦! 唱多咗兩首歌 "臨行" (當然又係我嘅喊位啦) 及 "強", 我又賺咗兩首歌! 睇返淑儀個 blog, 原來佢哋成班 dancers 都有喺台底幫手嗌 encore 架, 佢哋同 Aaron 合作真係好開心! 佢哋都好尊重 Aaron, 相信只有 Aaron 呢個 artist 係佢哋最佩服! 

散場又撞到 Sunny, 同佢傾咗一陣及影咗相, 等我寫低我哋嘅對話先:

我 : 「Aaron 係咪真係要 4 年後先再開演唱會?」

Sunny : 「係呀!」

我 : 「可唔可以同佢講叫佢快 d 再開呀? 我哋個個都好唔捨得佢呀!」

Sunny : 「佢只不過暫時唔開呢類型演唱會啫, 佢仲會做音樂劇嘛!」

我 : 「咁 Aaron 做完音樂劇係咪真係會再開演唱會架?」

Sunny : 「都會嘅!」

Samantha : 「可唔可以幫我哋同佢講叫佢盡量快少少呀, 4年好耐呀!」

Sunny 笑一笑

Samantha : 「Sunny 我哋可唔可以同你影張相?」

Sunny : 「可以」

~~~ 不斷影相中 ~~~

我 : 「今日係咪錄影呀?」

Sunny : 「係呀! 錄咗兩場!」

我 : 「兩場? 乜唔係3場咩? 我見 21, 22, 23 號都有 Camera 喎!」

Sunny : 「第一日試錄之嘛! 正式錄係22, 23號!」

我 : 「咁知唔知係咪高清呀?」

Sunny : 「係呀!」

我 : 「咁就大煲啦! 都唔知買唔買好, 我哋咁醜樣!」

Sunny : 「唔會, 唔會!」

我 : 「其實你認唔認得我哋? 我哋好多都嚟足 6-7 場架!」

Sunny : 「認得認得」 (我心諗 :  係咪真係認得架?)

我 : 「我哋日日都帶水槍嚟玩架, 我哋都有射你架!」

Sunny : 「哦, 當我落台時我右手邊嗰班人?」 (都話你其實唔認得我哋架啦!)

(我拎支水槍出嚟比 Sunny 睇) 我 : 「真係認得? 呢支水槍喎!」

Sunny : 「哦, 呢支......就係你哋, 好多 dancers 都投訴比你哋射呀!」

我 : 「真係架?」

Sunny : 「講笑啫講笑啫」

我 : 「你跳得好好呀, 幫我同淑儀講佢都跳得好好呀, 你哋要繼續努力!」

Sunny : 「好! 好!」

我 : 「仲有 Cato 呀, 佢都跳得好好! 好抵死!」

Sunny : 「好! 好! 我幫你同佢哋講!」

我 : 「聽講你好似就快要結婚, 係咪?」

Sunny : 「係呀係呀, 吓, 你又知嘅?」

我 : 「我有睇報紙架嘛, 報紙有講」

Sunny : 「哈哈哈, 乜報紙有講架咩?」

我, Samantha, Jojo, 阿秀 : 「有有有, 恭喜晒恭喜晒, bye!」

**** 全個過程好似只有我, Samantha 同 Sunny 講嘢, 其實仲有 2 個朋友仔架 ****

突然間覺得好開心, 因為好似同 Aaron 身邊所識嘅朋友好似好 close 咁, 分別有 Sunny, 淑儀及 Cato, 個感覺好得意呀!

郭富城舞林正傳演唱會2008延續篇第六場 (22-2-2008)

唉....呢排真係好忙, 唔係工作上忙, 係去睇 Aaron 演唱會忙! 晚晚都去, 簡直仲去得多過返阿媽度呀.....我哋真係勁!

尋日係真真正正最濕嘅一日啦....... 但我哋其實一d都唔會介意由頭濕到落腳, 因為當今 d 演唱會真係冇乜邊個可以咁樣同 d 觀眾一齊玩! 氣氛超 high 囉!

我終於認到其中一個 dancer - 淑儀啦..... 我哋一齊嗌佢, 佢竟然偷偷地同我哋打招呼喎, 個感覺好奇妙, 亦都好開心, 仲有就係 Cato 啦! 講開 Cato, 最衰都係佢, 又係佢走埋嚟整濕我哋先! 或者因為我哋係水槍黨啦, 基本上 Aaron 自己, Cato 及淑儀都認得我哋, 梗係啦, 晚晚去同佢哋玩水, 晚晚都唔著雨褸, 佢哋個個都反抗呀, 不斷向我哋潑水.....包括 Aaron 在內! 今次真係要多謝 Samantha, 唔係因為佢買咗支咁 Sharp 嘅水槍, Aaron 都唔會認得我哋囉! Aaron 尋晚仲走埋嚟我哋水槍黨到潑水添呀! haha, 好開心可以同 Aaron 玩水! 原本我哋企第一排玩水, 後面有2-3排觀眾一齊唔著雨褸咁玩, 但當我哋惹到班 dancers 及 Aaron 過嚟, 又預著佢哋一齊反抗潑水, 後面班觀眾一齊散開, 走晒, 得返我哋 3 個水槍黨成員依然企第一行力抗 Aaron 及 dancers 們..... 我哋好勁好勇呀!

仲有呀, 尋晚又有錄影啦, 今晚都應該仲會再錄, 隻演唱會 DVD 肯定有我哋水槍黨所有成員份啦, 晚晚咁去, 咁 high, 入硬鏡呀! 希望隻碟唔好用高清製造, 係的話我都唔知買唔買好!

不過心情好失落呀, 今晚係尾場啦.....唔知 Aaron 幾時先會再開 concert, 話就話四年後, 但係佢講嘢不嬲都唔可信! 宜家越嚟越驚, 唔想佢咁快搞好舞台劇, 因為一搞好的話, 佢應該開始引退佢嘅音樂事業而轉攻拍戲, 咁就大煲啦! 一個跳舞跳得咁好嘅歌手轉去拍戲, 真係浪費! 佢真係好壓到台, 真係好有能力帶動觀眾動起來, Aaron 好勁呀! 不枉我跟咗你咁多年!

 

再一次有相為證, 今日係全濕.......我呢副少少防水嘅武裝最後都要更換咗先返到屋企!

 

郭富城舞林正傳演唱會2008延續篇第五場 (21-2-2008)

尋晚又去咗睇我嘅第四次郭富城演唱會.....Aaron 真係超級靚仔呀, 我從來未見過一個咁靚仔嘅人!!! 尋晚個位置超好, 坐 Block C B行, A行係一行 4 人嘅行政人員, 佢哋喺 opening 時已經著雨褸, 睇嚟佢哋好怕濕身, 或者因為佢哋套 suit 好貴啦.... 但係我哋話佢知唔洗咁早著定, 熱死都未到玩水啦.... 玩水時會再通知佢哋著架啦! 隔離兩個女仔又係咁, 鬼死咁驚濕身, 見到我哋幾個自備水槍同 3 公升水, 簡直比我哋嚇親, 哈!!!

Aaron 尋晚好聽話, 不斷行過嚟我哋 Block C 呢邊, 我全晚有好幾次近距離望到佢, 而且佢每次行過嚟, 我哋都會嗌佢名同揮手架!!! 唔知點解, 每次咁近距離見到 Aaron 時, 我覺得好感動, 好想喊, 尋晚真係眼濕濕添呀, 仲好醜怪咁比 SumSum 見到囉!!! 不過原來佢哋都係咁, 唓...... 又係另一種 fans 通病!

朝中有人好辦事.... 喺派帽嗰 part, 當兩個 dancers 出場時, 我哋大嗌 Cato , 因為 Sam 老公有個朋友識 Cato 架, 所以 Sam 尋日順利攞到 Aaron 親筆簽名 cap 帽囉! 羡慕死!!!

之後另一重點都係水戰, 今次玩得好無癮, d 保安嚴到死, 當 Aaron 走咗去對面台, 我哋同其他 fans 繼續潑水, 但有兩個保安即刻走埋嚟噤住我哋支水槍唔比玩喎, 嗰時仲同對面台 d fans 玩得興高采烈架嘛!!! 理由係: 我哋會整濕晒佢哋d椅......<-- 呢 d 都係理由咩??? 咩癮都即刻無晒, 搞錯!!! 所以我哋今日即刻聯署 send 咗封投訴信去 expo, 希望今晚及聽晚最後兩場可以玩得盡興!!

有相為證, 水戰前及水戰後 ~~~ 個個都濕晒, 而我, 好似賣完魚咁, 好濕好濕...

 

Aaron 親筆簽名 Cap 帽

銅鑼灣利舞台麒麟閣酒家 Part II

尋晚放工之後, 終於同男朋友踩上麒麟閣睇第一次場地! 其實利舞台廣場唔算難搵, 喺正 Times Square 後面, 出到 Lift, 個門面都 ok, 幾見得人...

個場四四方方, 有兩條柱, 但係經理會同我避到晒兩條柱, 不過稍嫌樓底矮咗少少, 又唔會話有咩好靚嘅水晶燈飾咁, 但整體感覺都好舒服! 到參觀新娘房時, 個房都算叫做幾大, 不過因為間隔問題, 新娘房裡面唔可以有獨立廁所, 如果新娘要用廁所, 就必須要出返去門口個獨立廁所! 其實嗰個係傷殘人士廁所, 佢攞咗嚟做新娘專用廁所啫, 而呢個殘廁隔離就係客廁, 如果當晚包唔到場, 飯客及我嘅賓客都要用同一個廁所啦! 不過呢d唔理得咁多, 至於我自己個廁所, 我認為問題不大嘅, 當日應該都冇乜時間去廁所啦, 留喺新娘房換衫及補妝轉髮型多...

個場其實唔洗搵人佈置都得, 因為大部份酒樓都包晒, 陳經理仲話其實佢哋係搵佈置公司做, 唔係酒樓自己做架....佢仲話宜家搵緊一d更加好嘅佈置公司, 將來個 backdrop 都會換吓, 務求保持新鮮感喎! 其實佢仲有一樣嘢令我好滿意, 佢哋個 backdrop 好清雅, exactly 係我想要嗰種, 而且西式 backdrop 會有兩個, 中式一個, 就算佢哋第時轉佈置公司整 backdrop, 都會保留返三款比客人揀, 而且轉 backdrop 係超方便, 只要拉開塊布就得啦! 超正!

其實呢間酒樓都算唔錯, 送嘅優惠好多都好實用, 不過我老豆話叫酒樓送結婚蛋糕, 但係酒樓話幾多圍都冇得送, 之不過入席前會有點心招呼賓客, 咁其實都足夠啦, 反正蛋糕都唔係人人啱食! 講開又講, 之前同我阿爸阿媽上網睇過麒麟閣個網頁, 睇過菜單及簡單嘅場地相, 佢哋都話呢間好過迎囍....所以我好有可能訂呢間啦!

宜家要做嘅...就係等星期日, 事關星期日我已經約咗我哋兩個父母一齊去睇多次個場地, 不過....宜家掙扎緊好唔好去睇埋迎囍, 因為我阿爸好似好滿意麒麟閣咁.....到時先算啦!

郭富城舞林正傳演唱會2008延續篇第四場 (17-2-2008)

犀利呀, 今次係我第三次睇呢個演唱會, 我都估唔到自己原來咁瘋狂, 不過今次真係一場好好睇嘅演唱會, 聽聞好多朋友仔都想買飛, 已經好難買啦! 好多時都係因為睇過一場之後覺得實在太好睇, 要睇第二次第三次等等! 嚟緊我仲會睇埋21-23/2, 佢開7場我就睇足6場, 淨係冇睇15/2嗰場咋! 最犀利都係今次!!! 冇計啦, 鬼叫我鐘意 Aaron, 又鬼叫佢開埋今次要隔4年先再開咩....乜都豁出去啦!

講返呢一場, 我哋一行8人去睇, 分別有 Samantha, Ken, JoJo, 我, 我男朋友, Pat, SumSum 及 SumSum 男友, 坐喺 Block B Row C, 即係第三行啦! 好開心囉, 因為我哋可以衝出去個台附近, 從未睇過一個演唱會咁 free, 條路實在太好衝啦... 都冇人阻止我哋, 當 Aaron 一走過嚟我哋附近, 我哋立刻企晒起身, 又尖叫, 又影相, 真係勁! 最難忘當然係玩水嗰 part 啦! 8 個人裡面有 Samantha, Ken, JoJo, 我, SumSum 帶咗水槍去玩, 個個都唔著雨褸諗住一鑊熟, 只有 SumSum 男友著雨褸咋... 結果我哋當然由頭濕到落腳, 亦由面濕到落底啦, 講真嗰句, 我真係連 Bra & Under 都濕咗, 搭車時唯有 up 住咁返屋企, 對腳亦都難幸免, 一樣袜同鞋都濕晒! 我男朋友就係最濕嗰個啦, 衫同褲都明顯變晒色, 勁!!!

最搞笑係玩水槍時有個 dancer (好似叫 Cato) 見到我哋玩得咁開心, 返上台唱"這夜心情"時仲張開個口, 示意我哋射水入佢個口添呀........其實 d dancers 都好 nice, 真羡慕佢哋可以同住 Aaron 咁耐! 而且 Aaron 都出名係錫 dancer, 或者因為佢自己都係 dancer 出身啦!

嚟緊仲會去睇 21 + 22 + 23 三場, 好期待尾場, 氣氛一定 high 爆啫! 今年都要繼續嗌 encore, 務求嗌到 Aaron 出嚟為止, 反正 24 號係星期日, 而且 23號之後, 唔知幾時再有機會見到 Aaron 開演唱會啦!

銅鑼灣利舞台麒麟閣酒家 Part I

尋日去咗會展行婚紗展, 原本打算入去睇花車或者花球 (因為打算7月影結婚相嘛), 再搜集吓註冊場地及佈置公司資料, 點知乜都冇結果, 但反而有另外收獲....

我哋見到麒麟閣有參展, 本身之前都打算去睇呢個場, 因為 Cody 都推薦過, 話間嘢d食物及服務都唔錯, 咁啱見佢個 counter 冇人, 咪走去八吓囉.....點知發現勁抵勁超值... 09年個菜單竟然加 $100 (只限頭兩個菜單) ??? 滿15圍仲送嘢, 出面一般酒樓都要去到20圍先開始有優惠, 呢間酒樓實在太好啦! 等我列出嚟先 (我記得嗰d):

滿15圍的話:

1) 席前任飲

2) 席間任飲啤酒, 汽水及果汁先生

3) 送回門乳豬

4) 送中西式禮堂佈置

5) 送每席一支 V.S.O.P.(只限堂飲) 及 每兩席一支紅酒 (出面好多酒席都只係2選1)

6) 已包加一酒水

淨係以上呢幾樣嘢已經符合晒我心水, 之後我哋要求唔用翅改用燕窩, 竟然唔洗加錢之餘, 仲可以任我哋加埋蟹肉入去等等, 全部都唔洗加錢!! 我打算用第2個菜單, 09年價都只係 $4998, 己經有蟹拑食啦, 不過條魚就一般啦, 好似係海斑, 不過到時再傾啦! 仲有就係帖方面, 真係有成百幾款比我哋揀, 原來佢同 Joy's Card 聯營, 所以佢會包一圍10套 $3.5/張的帖, 如果貴過 $3.5 就自己補錢, 不過我睇過佢 $3.5 嗰d都好靚, 基本上都唔會加錢啦, 反正有幾款我同男朋友都鐘意! 仲有....傾嗰時, 個經理仲要咁講: 如果係住港島區嘅, 應該都一定識我哋間酒樓啦!.......嘩, 好勁喎! 見咁筍, 即刻做咗 pencil mark 先, 不過陳淦生經理話只可 hold 4 日, 真係要盡快睇場, 宜家冇嘢驚, 最驚係未來老爺奶奶嫌銅鑼灣太遠唔制咋! 仲有就係驚個場會唔合心水, 又或者新娘房太細等等! 不過呢間酒樓 d offer 真係勁啱心水!

P.S. 返工時上網望望 esdlife d 姐妹點講, 原來個個對食物及服務都有讚冇彈, 有d仲啱啱擺完酒都勁讚, 麒麟閣真係咁出名喎, 信心即時 x 100000000000000000000000000000000000000000 !

郭富城舞林正傳演唱會2008延續篇第三場 (16-2-2008)

呢排嘅心情真係好激昂... 皆因我最鐘意嘅 Aaron 開演唱會~

16/2 呢場睇得成真係要多謝阿 Vi!!! 好開心, 16號嗰晚竟然可以坐上台, 即係加行嘅第3行, 基本上比成個水池包圍住! 超開心, 又對到應一應, 但嗰晚熊黛林嚟咗, 所以有少少覺得被破壞!

講返個位, 真係超正, 本身係 fansclub 飛嚟架, 己經算係內部飛啦, 點知原來仲係 committee 先有機會坐, 真係內部飛中嘅內部飛.....雖然只有我一個去睇 (因為得一張飛多出嚟), 不過都無損我支持 Aaron 嘅情緒! 一個人坐, 唯有影吓相, 拍吓片, 都識咗左右兩邊 d fans, 佢哋都好 nice.... 聽佢哋講仲話會濕身濕得好緊要! 原來係真架! 之前有個 fans 叫我最好除定鞋同袜, 因為真係會濕晒, 我都唔係太信, 點知.....玩水時......我著埋雨褸都頂唔到, 件雨褸去到膝頭哥左右, 但我膝頭哥以下嘅地方全部濕晒, 對鞋都真係入晒水, 果然唔係講笑! 雖然濕得咁緊要, 但都好開心, 因為好少機會可以咁樣同台上嘅人互動, 好難忘呀!

最唔開心係同 Aaron 握唔到, 雖然真係同佢坐到好近, 不過佢咁啱skip咗我嗰行....衰人! 唔緊要, 17/2 再去睇第三場, 到時要握手及玩水槍!

郭富城舞林正傳演唱會2008延續篇第一場 (14-2-2008)

 

一個字 "正"... 仲未試過睇 concert 好似啪咗丸仔咁 high, 成晚企起身咁滯, 最抵死係前後左右都係 friends / fans, 個個一齊 fing 螢光棒, 一齊企, 一齊跳, 一齊打 pong pong, high 到不得了! 最開心最有驚喜係呢兩首舊到七彩嘅經典快歌, 仲要打正旗號跳 original steps....嘩, 開心死!

期待 17號坐 b 行及 23號 (真正尾場) 坐 c行! 我會帶埋水槍架, Aaron, 你將會比我哋整到好濕.......................................................................... 

4-2-2008(一) 新海集團團年飯

尋日我公司舉行咗一年一度嘅團年飯...都係例牌喺富豪酒家啦, 因為老細要食煙呀嘛~~本來仲話喺萬圖酒店訂咗位食自助餐, 可惜老細唔鐘意...是但啦, 老細係大晒架啦!

講返餐飯, 食乜就唔講啦, 年年都係嗰d啫, 但係大抽獎真係勁爆, 係最開心嘅一年...加上今年d獎品係由我負責 (唔知點解行政部唔搞我去搞), 仲例牌比人屈埋做MC??? 真係唔明...

首先講講獎品清單先, 勁啦....先有11份獎品

大獎     Apple Mac Book 手提電腦                HK$8,600

二獎     Apple ipod touch (8GB)                       HK$2,400

三獎     任天堂 NDSL 白色行貨套裝            HK$1,800

四獎     Apple ipod nano (8GB)                        HK$1,550

五獎     Apple ipod nano (4GB)                        HK$1,150 (Patrick Cheng 見我咁可憐抽到鬚刨, 佢醒我嘅)

六獎     電子相架                                            HK$   980

七獎     Apple ipod shuffle (1GB)                      HK$   650

八獎     東芝牌記憶棒 (8GB)                          HK$   599

九獎     飛利浦電鬚刨                                     HK$   498 (竟然係我抽到)

十獎     飛利浦濾水器                                     HK$   388

十一獎  Oral B 電動牙刷                                 HK$   338

再嚟有11份現金獎, 現金獎嘅價錢係勁吸引!!!!!

HK$500       x   3份

HK$1,000    x   4份

HK$2,000    x   2份

HK$3,000    x   1份

HK$5,000    x   1份 (矚目大獎......得獎者係.......我呀, 真係發夢都估唔到)

雖然我抽到 HK$5,000 現金獎, 不過我唔係全晚抽到最多錢嗰個, 最多錢嗰個係 Mandy 呀,.....好好笑, 如果 d 現金獎抽到高層, d 高層唔准收之餘仲要 double 上, 結果有份現金獎 HK$2,000 先係抽到岑太, 岑太要 double 變 HK$4,000, 點知岑太抽到 Raymond, Raymond 要 double 變 HK$8,000, 之後嘅幸運兒就係 Mandy 啦!!! 恭喜佢啦!!!

第二個幸運兒就係珠姐, 佢原本抽到部 ipod touch (HK$2,400), 點知 Patrick Cheng 搞氣氛, 玩拍賣 (因為見好似有幾個高層都想要部嘢), 最後成交價竟然嗌到 HK$4,000, 珠姐就袋袋平安 HK$4,000 啦! 但仲未完喎, 戴生最後攞返部機出嚟再抽過, 點知....中獎者又係珠姐....係佢嘅真係佢嘅, 珠姐仲要中途已經中多封現金獎啦, 夾夾埋埋佢尋晚應該袋咗差不多一萬蚊返屋企! 所以話, 呢間公司咩都好, 員工福利又好, d 高層對我哋都好好, 大家又開心, 衰就衰在好多人食煙, 我遲早生肺癌 !!! 

 

其實我抽到鬚刨時個表情都唔係咁差啫, 點解好多人都話我面燶嘅?

 

進行緊抽 HK$5,000 現金獎, 睇吓大家幾緊張??? 尤其是右下角嘅 Mandy 啦!

 

得獎者係我呀, 真係估都估佢唔到啦!!! Yeah!!!