揀相日 @ 美麗佳人

2008 年 9 月 2 日（星期二）

今日放咗工之後去咗美麗佳人睇相。原本約咗 6:30 去到，不過因為撞正放工時間，地鐵站真係超多超多人，結果 6:45 先去到，遲咗 15 分鐘添！（又遲！）

講返揀相，坐低後有位叫阿 Mag 嘅女 sales serve 我哋，一如我所料，美麗佳人都係用電腦揀相，不過因為有之前喺緣美傳說揀相嘅經驗，宜家用電腦揀相都已經可以好好咁掌握 lu！我望一望，原來當日影咗 244 張相，咁阿 Mag 就等我哋由頭睇一次 d 相先，等我哋有個大約嘅 idea 邊 d 會買，邊 d 唔要咁！我哋一路睇就一路笑，因為大家當時嘅表情好好笑呀！男朋友又喺側邊配音配旁白......睇完晒 d 相之後就開始揀相！由於今次同美麗佳人最熟嗰個 sales 放假，變咗唔會好似喺緣美傳說揀相咁就住就住（因為好似有少少唔好意思不斷 cut 相嘛），所以今次 cut 得好 free 呀！睇完第一 round，原來我哋只係要咗 69 張相...... 嘩，我同男朋友都覺得勁，竟然可以 cut 咗咁多！其實又唔可以話佢哋水準唔得，我同男朋友其實都覺得佢哋影嘅相質素屬於中上架，不過可能因為個攝影師唔係太掌握到我想要咩 mood 咩 style，所以真係好想好想買嘅相都唔算太多！見揀咗 69 張相，咁最後揀多一張諗住齊頭 70 張，整個過程都只不過係一個半鐘頭左右！

其實我哋一路揀緊相時仲有另外一 pair 準新人喺我哋前面又揀相，不過人哋揀得快過我哋，所以阿 Mag 就去咗 serve 佢哋先！咁其他職員又要 serve walk-in 嘅客，serve 試衫嘅客，喺呢個時候，我哋附近嘅範圍竟然屬真空狀態，我梗係把握呢個機會，攞部手機出嚟係咁偷影，卒之影咗 21 張相返嚟呀，hohoho，有賺！

之後阿 Mag serve 完嗰 pair 新人，又見我哋揀得 7788，就走埋叫我哋揀相整油畫！唉，其實我哋真係好難喺嗰 70 張相入面揀一張做油畫，因為真係冇一張令我哋好有衝動一定要放大做油畫...... 後來都揀到嘅，揀咗一張日落嘅景（之前已經講過好鐘意日落／晚霞景）。之後再揀 1 張晒做 10x12，3 張 8x10，2 張 5x7，揀 2 張相做簽名布，1 張相做 36" 海報，1 張相做 100 張謝咭。嘩，淨係揀呢 d 嘢都揀咗我哋好耐，因為又要衡量吓個 mood 啱唔啱，有 d 相又只可以揀打直或者打橫，又要兼顧唔好只著重某件衫咁......好啦，揀好晒之後就開始講油畫框！我都知個 sales 實想我哋 upgrade 架啦！之前我真係冇諗過要 upgrade 油畫框，因為諗住佢通常都係幼邊啫，幼邊咪幼邊囉，照要！點知阿 Mag 一 show 比我哋睇本身包嗰個油畫框之後，真係立即決定要 upgrade，因為真係太核突啦！我哋例牌問吓唔同款式嘅油畫框收幾多錢啦，點知阿 Mag 唔肯講，仲叫我哋揀咗先，呢個時候我都估到佢梗係仲有其他嘢 sell，到時一筆 lum sum 計，所以我都毫不客氣咁揀咗最粗嗰款框。好啦，連油畫框都決定埋之後，就開始入正題，講價錢啦！

阿 Mag 1st offer $14,000：

包 upgrade 油畫框 + 2 個 8x10 相架連裱功 + 2 個 5x7 相架連裱功 + 30 張相入晒相簿 + 娘家本連 uv coating（本身冇包 coating）

No way！$14,000 咁貴，睬你都傻...... 之後阿 Mag 自動減價...... 

阿 Mag 2nd offer $12,000：

包 upgrade 油畫框 + 30 張相入晒相簿 + 娘家本連 uv coating。

No way again，我要咁多個相架做咩？周屋都冇位擺啦，而且嗰本娘家本冇 uv 都唔緊要，因為聽人講就算冇 uv 都擺到幾年！所以我堅持只係買 30 張相入相簿及 upgrade 油畫框！

阿 Mag 3rd offer $11,000：

包 upgrade 油畫框 + 30 張相入晒相簿。

我計一計... 其實佢都唔係平咗好多比我咋喎（30張相 x $350 入相簿價錢 = $10,500，油畫框佢只收我 $500），可能因為我買得少相啦，因為一般 join 咗佢哋嘅人都會額外買 9x-1xx 張相架，所以我嘅優惠冇人咁多都合理嘅！不過我都知阿 Mag 唔肯死心架啦，我又揀得咁少相，又唔肯加嘢，佢點向公司交待呢？所以佢再搵其他嘢 sell 我，就係本娘家本啦！其實嗰本娘家本真係唔算太靚，好衰唔衰佢偏偏 sell 呢樣嘢，好，即管聽聽有咩優惠啦！點知喺呢個時候男朋友話想要兩張 5x7 相架連裱功，佢話還掂 5x7 唔算大，攞返公司擺喎！所以......

阿 Mag 4th offer $13,400：

包 upgrade 油框 + 30 張相入晒相簿 + 娘家本改成 2 本水晶封面掌中本（每本 20 張相）+ upgrade 海報到 50" + 送多 1 盒謝咭 boxset + 一隻 urgent CD + 2 個 5x7 相架連裱功

原本都嫌貴架，不過真係唔想要嗰本娘家本，因為實在太老土啦，寧願加錢要兩本水晶封面掌中本，加上我有 $2,400 可以扣（因為之前喺 expo 喺未睇過佢哋 d 衫嘅情況之下 join 咗外租 package，仲落咗 $2,400 訂，好在當時喺張單度寫明可以轉做買相啫）。見扣咗之後 $11,000，又多咗咁多嘢，都 ok 嘅，所以就成交啦！望一望錶，嘩，原來已經 11:45 架！打搞咗美麗佳人咁耐真係唔好意思啦！暫定約咗大約 2/10 睇第一次執相，如果滿意執相的話，3 個月之後就可以收相啦！

講咗咁耐，又係時候睇吓我偷影嘅相啦，不過由於 d 相係偷影返嚟，各位 join 咗美麗佳人嘅朋友仔請高抬貴手，唔好篤我出嚟呀，否則我每張要比返 $350 佢哋，條數都幾襟計......^^

d 相係對住個電腦 mon 影架，所以質素係差少少，將就吓啦 ^^

~~~~~ 美麗佳人 studio ~~~~~

睇嚟睇去都覺得呢一張好似雜誌入面 d 廣告幫人 sell 緊個花球 -_-"

~~~~~ 中環石板街 ~~~~~

~~~~~ 石澳 ~~~~~

~~~~~ 大潭 ~~~~~

~~~~~ 聖士提反 xxx (唔係好知實際個名叫乜) ~~~~~

之後換咗套紅色晚裝影多少少所謂嘅「晚霞」先離開聖士提反，再出發去赤柱。

~~~~~ 赤柱夜景 ~~~~~

呢張做咗謝咭 boxset 嘅封面

總括嚟講，其實美麗佳人 d 相係 OK 嘅，只不過佢影唔到我想要嘅 mood & style，所以我先揀咗咁少相啫！其實....... 成日話自己買得少相，30 張都算 ok 多啦喎！仲有，到現時為止，我都仲好滿意佢哋嘅服務態度，不過好多人都話佢哋喺執相嘅階段出事，睇嚟我都唔好太樂觀住...... 一切等收晒相先 comment！