2013 年 4 月 20 日 (星期六)
某日喺 Baby Kingdom Forum 游走時見到有準媽媽介紹呢個食譜，好啱孕婦飲。見佢個食譜唔算太難，而且桑寄生好容易買到，唔知邊度嚟嘅決心就嘗試下煲比自己飲。
中期懷孕
（４～７個月）桑寄生蛋茶材料：
桑寄生１両，雞蛋２隻。
做法：
將５碗水放入瓦煲，放入連蛋殼雞蛋先煮半小時，剝殼取肉，再將雞蛋放回煲內，和桑寄生一併再煮至約１碗湯（可加冰糖少許）。隔去藥渣，將湯和蛋盡吃，每天吃一次，有需要可連服１００天。
功效：
此療方適合任何時間食用，但對於中期胎兒不穩、有流產現象特別有效。桑寄生主腰痛，安胎充肌膚，堅髮齒、長鬚眉、補肝、補腎。雞蛋連殼煮可取蛋殼的鈣質，是古方製法，但個人建議煮前先把蛋殼洗一洗，以防禽流感。
(我就唔會連飲 100 日啦，一星期飲一次就會)
有好多媽媽都係喺藥房買桑寄生，我就參照另一位媽媽建議，去咗余仁生買，我估大公司出品有 d 保證啩 (純綷自我安慰)。
一包 4 兩 ($20)，可煲 4 次
由於我唔係用瓦煲，亦缺乏煲藥經驗，唔清楚咩叫做 5 碗水煲埋 1 碗水，所以上網自行搵咗另一個簡易版食譜。只需要用普通煲湯嘅煲，用 10 碗水煲 1 小時，加片糖調味就飲得。<-- 呢 d 簡易版真係啱晒我 ^^
見網友話桑寄生本身煲出嚟會偏甘，所以余仁生嘅 staff 都叫我放 10 粒蓮子 + 10 粒紅棗，可以幫助帶 d 甜味出嚟，仲提醒我如果怕燥熱，蓮子 + 紅棗要先去核。
登登..... 哪來嘅勇氣就煲咗出嚟啦~
不過我就唔太滿意，因為見 10 碗水好似好少，仲擔心要煲成個鐘會乾水，所以我應該合共用咗 13 - 15 碗水去煲，結果煲出嚟極之淡味，下次都係聽返食譜講好了！
學精咗啦 ~ 為咗易於清理煲完嘅桑寄生，我仲買咗個魚袋，下次煲時將 d 桑寄生放晒入魚袋就唔洗咁麻煩啦。
