2009 年 6 月 21 日（星期日）
父親節當日我做咗乖女，留咗喺屋企訓，仲同阿爸阿媽去咗食 lunch 行街添。自從買咗新屋之後，呢個情景已經少之有少，真不孝！
當日去咗屯門吉之島行街，主要都係同阿爸睇吓衫褲鞋袜。同阿爸睇完之後，我就被媽咪拉咗去睇龍鳳被。咁啱得咁橋吉之島床上用品部做緊展銷，又撞啱父親節係 double 感謝日，折咗之後再有 95 折，見有得平就去睇吓。
本來想去睇雅芳婷，不過好多人，雖然未至於插針都插唔入，但係已經唔想再慢慢搵，而且雅芳婷個 sales 又串串貢好似唔憂做咁，所以打算睇埋 casablanca 先再決定。
去到 casablanca 後，個 sales 好 nice，即時覺得自己真係一個 potential customer 囉！雖然佢哋 d 款冇雅芳婷咁靚，不過我覺得都 ok，而且都係我同老公訓啫，過到自己嗰關就 ok 啦！
對於龍鳳被，我從來都覺得唔需要有龍有鳳、大紅大紫嗰 d，總之我買張啱 feel 嘅返嚟，我話佢係龍鳳被就龍鳳被。本來睇中呢款，可惜呢隻冇做特價之餘原來針數唔高，咁都係算啦～
呢張係我 2nd choice，貪佢多心心得嚟又 modern 返 d。不過 sales 話呢隻買床單就有折，要買埋被芯嗰隻 set 裝就冇折，妖...... 咁麻煩架！
之後媽咪就幫我手睇吓 d 款，佢心思思想我買返 d 喜慶 feel 嘅被，其實我唔抗拒嘅，如果係靚的話我都 OK，所以 sales 就介紹呢隻比我哋。
成套床單連被芯都只係賣 HK$670，加埋感謝日嘅 95 折又慳多幾十蚊，見媽咪好似好想我買呢 d 傳統款，而且針數都算高，有 570 針，雖然係大紅，但係我覺得個款紅得嚟都幾好，而且係之後都可以再用得返嗰隻，所以就扑鎚買咗呢款。
唔知係咪因為撞啱做床上用品展銷，佢話無晒貨要等送貨（免費喎），仲連聲唔好意思。但係我就心諗：「都不知幾好，唔洗我拎住咁大袋嘢周街走，直接送去我新屋仲好！」星期六仲已經收到貨添啦！
其實我最後買埋呢款粉紅色心心床單連被袋，因為真係覺得佢幾靚！雖然針數唔高，得 330 針，不過嗰一刻好想滿足自己，而且都只係加咗 HK$36x，就算數啦，偶然任性一下都幾開心！
