2010 年 11 月 18 日（星期四）
我嘅結婚一週年沙巴之旅正式展開啦！
由於買咗港龍早機去晚機返嘅 package，呢一日倒塔咁早（即係 04:30）就要起身，05:10 左右要出門口，先坐的士落元朗，再轉 E 車去機場... 因為我哋飛嘅時間係 08:10 呀！不過去旅行就冇所謂，返工要我咁早起身，我啋佢都傻！
捱咗一個鐘頭有多嘅車程後，大約六點幾就到咗香港機場，check in 後又係閒 hea 嘅時間。本來諗住去食個 M 記早餐（太掛住 D 熱香餅），可惜搵勻成個禁區 + 非禁區都冇 M 記，有就有一間，但未開始營業，仍然裝修中... 唯有等食飛機餐啦！
我哋搭嗰架係港龍細機，地勤人員都預早通知咗我哋閘口較遠，要坐無人駕駛列車先可以去到。印象中好似係第 2 次搭... 但感覺仍然好似第 1 次搭咁新鮮，^^
到閘口啦，開始超級緊張 + 期待！
上到機坐定後，又係自拍時間，XP
飛啦飛啦！雲呀～ 雖然好低 B，但係我都好鐘意影！始終今次只係我咁大個女第三次出國咋！
起飛後，其實個肚已經好唔聽話咁嘈咗幾次，好快我就殲滅晒佢哋！最好食竟然係條腸仔，嘻嘻！
食飽後唯一嘅活動就係訓。由香港飛沙巴大約三個鐘頭左右，我已經感受到嚟緊幾日會過一 D 豬嘅生活！XP
訓醒後，見到啦... 開始見到 d 島啦，成個人都醒晒！
到埗啦，搞完一輪過關手續，開始等拎行李。
其實沙巴人都幾嘆，工作節奏果然慢好多，我哋兩個等咗 15 mins 左右先開始有行李運上輸送帶～ 又自拍... 唔知擺咩 pose 好，一於就跟住後面個廣告擺啦，我嘅人生果然好無聊，^^
搞掂晒後，就要向機場 lobby 出發！
出發前喺香港 book 好晒 local tour，仲送埋 pick up service，慳返去酒店嘅車錢，嘻！嗱，呢班就係嚟接機嘅 tour guide 啦，連件制服都有特色過人，幾馬來亞風情！
我哋係第一 pair 人報到，同機原來仲有 2 pairs，所以要等埋佢哋先可以上車。好在大家仲未放低香港嘅急速節奏，好快已經齊人，上車 lu，向酒店進發！
沿途風景好靚呀，同日本係兩個 feel～ 一路見到好多椰子樹，令我諗起麥兜嗰句... 「椰林樹影，水清沙幼」，XP
海灘呀海灘呀，唔知點解嚟到沙巴後見到海灘特別雀躍，又唔係未見過...
我哋 book 嗰間酒店同機場好近，所以 15 mins 左右已經到達啦 -- The Sutera Harbour Resort - The Magellan Wing！
嚟緊其中兩日就係跟呢間 local tour 玩架啦 --- 《Perfect Holidays 完美假期》，唔錯喎，幾有責任心兼冇濫收費，大家去沙巴都可以考慮下！
間酒店好大吖，渡假感覺即刻湧晒出嚟，^^，個 lobby 超巨~~~
行入去，就有個本地人玩緊音樂，聽個 melody 係 d welcome song 咁上下，佢都好識做望下鏡頭交戲架！
玩完啦，要 check in 攞房，我連 receiption 都唔放過，又影一張！
連 d staff 嘅制服都有馬來 feel，又影！估唔到佢又望鏡頭，哈！
行李已經交低咗比 bell boy，我哋一落車佢哋已經推架車埋嚟接收晒我哋 d 行李，一陣會直接送上房，唔洗自己拉餐懞。
等 lift 都有海景... 嘩.... 好正呀！
呢間就係我哋住咗 5 日 4 夜嘅房啦！我 book 時特登話自己係 honeymooner，又呃咗 d decoration 返嚟，好嘢，今晚有得浸玫瑰花浴；露台 --- 我係唔會放過你架，呵呵～
我 book 嘅係 Deluxe Garden View，不過都有一截係海景，賺咗，^^
擺低晒 d 嘢，換返件短袖衫，搽埋防後，係時候出 town 醫下五臟廟啦！點幾鐘，要食飯啦！酒店每小時有 shuttle bus 來回市中心，方便嘅就係唔洗 side 錢搭的士，唔方便嘅就係限時限刻，佢哋 d 車係超準時架！
見未夠鐘上車，又對住個海影下相先～
酒店大門口，我間房嘅門口景
醫肚第一站：味雅海南雞飯
帶咗兩本旅遊書，兩本都話呢間係好嘢，好啦，一於第一間就揀呢度啦！
沙巴人做生意比較穩陣，唔會有太多花款，係賣雞就賣雞，最多只係雙拼（即海南雞 + 叉燒），無其他款架啦！
於沙巴消費實在係平，原來佢哋人均收入只有 6 - 7 千一個月，一碟雞飯都只係 RM5.5（1:2.5）只係港幣 13.75。
一人一碟雞飯，再要多個芽菜 + 2 杯極受歡迎嘅桔仔冰，埋單只係 RM20 多 dd！桔仔冰可能比人吹捧得太犀利，我覺得冇想像中好飲（不過唔係差），用嚟消暑解渴確係一流。
醫完肚就周圍行下，歐陽生係時候撻著佢嘅「認路 mode」，我就留意下有冇手信／特色嘢買住先。沙巴市中心其實好細，最多嘢行相信只係得 3 個大 shopping mall，好快就行完。無乜特別地方指定要去，除咗呢個艾京生鐘樓，老公出發前已經講咗幾次話想嚟架啦！
途經一個欣賞日落好好好出名嘅地方 --- The Waterfront，停低影少少相，一陣日落時必定返嚟！
再揭開本旅遊書，發現另一間極受歡迎嘅食店喺附近，先前嘅雞飯未消化得晒，已經想試第二間嘅美食！
醫肚第二站 ：富源茶餐室
富源出名食咖央多士，我都唔輸蝕 order 一份試下先。其實完全唔知咖央係乜東東，不過一場嚟到，叫咗先算！由於老公唔太鐘意食咖央，佢就夾咗其他小食。飲品就叫咗兩杯芒果汁。佢哋嘅芒果汁同香港嘅好唔同，可能因為佢哋用嘅係青芒，冇香港咁甜，不過係 ok 好飲！
果然係名不虛傳，佢哋生意好好，大家都慕名而來！聽聞有幾位巨星如劉德華，劉青雲去到沙巴都一定會幫襯佢哋。
食完咖央多士後，再周圍行下，諗住去買 d 小食拎返酒店個露台度食，幾經辛苦跟住旅遊書指示搵到呢間 Big Apple Donuts，Donut 呀...... 雙眼發光！！！旅遊書嘅相已經夠吸引，見到實物實在係忍唔住流緊口水...
不過忽然醒起天氣咁熱，又未咁快返酒店，買乜鬼呀，溶晒都未返到房，唯有再恨下先，過幾日再嚟食過！
行多陣，見差不多開始日落，係時候出返戶外欣賞無敵日落景色。沿途經過一間 spa 舖頭，恕我孤陋寡聞，原來真係有 fish spa，我以為賣廣告嘅橋段咋！咁啱有一 pair 人做緊 fish spa，要 d 魚仔食腳皮，d 魚仔好慘啫...
O 咀過後，我哋就行返去 The Waterfront。The Waterfront 好似海濱長廊咁，成條街都開咗好多食肆，比人客一路欣賞日落，一邊飲下杯中物。本來我都想成為客人之一，但係啱啱先食完咖央，個胃實在無辦法再容納其他食物，都係影下相先，過幾日先再嚟幫襯啦，嗰一刻只憎恨自己個胃點解得咁細！
睇住個天由藍天白雲變成火燒天，再變成紫色，突然覺得自己好渺小，平時喺香港都冇乜點留意大自然景色。
影完一輪相後，話題又走回「食」。仲唔係豬嘅生活？一日食咁多餐，係咪癲架？個肚仲未發警告比我喎... 所以提議老公不如先去另一個出名食嘅地方 --- 菲律賓夜市，睇睇咩環境先啦！
菲律賓夜市場係一個露天街市，擺賣生果，調味料，小食，甚至炒粉炒飯等等。旅遊書 + 網友都話要必試燒雞翼，我一定唔會比自己後悔！唔行由自何，一踏入夜市，炭燒雞翼好香呀... 好多海鮮呀！本來計劃今日係去食海鮮餐，但係見個天好似唔會落雨（因為我哋呢段時間係雨季），就決定今晚先喺菲律賓夜市食咗先，聽晚先去食海鮮餐啦！
醫肚第三站：菲律賓夜市
我哋 order 咗 5 隻燒雞翼（RM12）+ 1 條東星斑（RM25）+ 6 串雞肉串燒（RM1／串）+ 1 隻老虎蝦（RM35）+ 1 串燒墨魚（RM? 已經唔記得幾錢）
加多個椰青濕濕口（只係 RM3 咋）！睇下條魚，有我隻手臂咁長，啱晒我呢個食魚怪！老虎蝦都唔弱呀，都去到手腕有長... 唔好以為全部都係海鮮濕濕碎，我同老公都食唔晒！
其實一坐低，要自己 serve 自己，我見到有呢個茶壺...
初初仲同老公估緊係咪比人自斟自飲？但係又唔見有杯喎，呢個壺係做咩嘅呢？咁啱有個當地人食完嘢拎起個壺喎... 個壺裡面的確係茶，但係原來比人洗手架，因為佢哋都係用手拎食物架！好彩啫，唔係比人笑到面都黃！
喺條街度暴飲暴食完，行埋個 supermarket 買 d 零食後，係時候 join 返酒店尾班 shuttle bus。夜晚酒店個 lobby 又另一番景象...
上到房，發覺原來做 honeymooner 除咗多咗 d 靚靚 decoration 外，仲比我呃多咗一個 cheesecake + 一盒朱古力添。
唉，又食.... 好在酒店送嘅 cheesecake 唔甜，要 K.O. 佢都唔算太難！全日食咗咁多嘢，本來諗住喺酒店行下，當飯後運動都好，點知開始落雨啦，唯有乖乖地留喺房啦！
Plan 好咗第二日出島浮潛 + 玩水上活動，最好今晚落晒 d 雨，我要聽日陽光普照！
