Jenny's Blog: 11月 2009

2009年11月29日星期日

初歸新抱成為新一份子了

2009 年 11 月 23 日（星期一）

是日為回門之日，回男家前已經擔心點樣開口叫一聲「奶奶」，叫 Auntie 叫咗 10 年，一下子要改口真係有 d 尷尬，之前亦曾經問過好多靚太，其實大家都係硬住頭皮去嗌... 唔知點解，我就硬係好擔心自己嘅表現。曾經有掙扎過，係咪嗌聲「媽咪」會順口 d 呢？不過規矩還規矩，好似嗌返「奶奶」點都好 d（況且之前奶奶冇表示過要嗌佢做「媽咪」）

嗰日返到男家，終於要開口了... 一 d 都唔似我，我嗰聲「奶奶」好似哽咗喺喉嚨頂咁... 超級細聲，細聲到好似我自己先聽到，不過大方嘅奶奶可能佢明白我心情啩，佢好正常咁應一應我，等我覺得自然 d... 人生中第一聲「奶奶」咁就誕生咗...

夜少少，歐陽生兩位細佬亦放工返到屋企，兩條友仔勁玩嘢，一開聲就阿嫂阿嫂，朋友嗌阿嫂就冇所謂，但出自兩位細佬口中，我覺得自己當堂老咗 10 年... 我希望佢哋嗌返我做 Jenny，hahahahaha～

再夜少少，連老爺都返到屋企啦！可能之前嗌「奶奶」時壯咗膽，呢句「老爺」嗌得順口咗好多，聲線都提高返！老爺就搞笑啦... 跟佢 d 仔嗌我做阿嫂... 嘩，大佬，我受唔起... 立即比兩個細佬糾正，應該嗌「家嫂」而唔係「阿嫂」... 隔一陣，佢又叫我做阿嫂... 最後奶奶出聲，命令佢叫返個我名算數，因為佢嗌到 d 稱呼亂晒籠...

2009 年 11 月 27 日（星期五）

如果有睇開我個 blog，相信都會記得我有一個潮奶奶。佢好興用 sms 溝通 rather than 直接打電話。

拍拖時，見佢 send sms 比歐陽生就多，今日... 終於輪到我都有份收到 sms 啦！

收到 sms 後，感覺好奇妙，原來我真係姓歐陽了... 原來我真係歐陽家一份子了...

題外話：

肥炳，我真係對你唔住，1/12 係你大婚日子，我真係好想去分享你喜悅，好衰唔衰撞咗日子... 宜家先通知你我哋兩公婆唔嚟得，soooooooooooooo sorry！曾經有諗過作反，叫歐陽生扮加班，咁大家可以去飲你嗰餐，不過今時唔同往日，就算話歐陽生加班，初歸新抱都應該要出席... 有時都會概嘆冇咗少少嘅自由.... 不過我話過，我會抽時間去你嘅註冊典禮，亦會上嚟酒樓同你影返張相！記得等我呀！先預祝你當晚順順利利！

2009年11月28日星期六

是時候揭盅了...

之前一路扮型，死都唔肯開估嘅小禮物，宜家係時候揭盅啦（差 d 將成件事忘記得一乾二淨）。。。

其實以上呢一堆全部都係茶包。

好耐之前，喺 blog 界四圍游走，唔記得喺邊度搵到呢款回禮小禮物，被佢嗰句 "We've found our cup of tea" 吸引，而且覺得得意又實用。我同歐陽生呢類懶型嘅人，都係鐘意玩食字...

及後搵到賣家個網站，發覺價錢 OK 喎，所以好快就決定咗用呢個茶包做我哋嘅回禮小禮物，總好過用朱古力吧... （雖然暗訝底真係幾想...）

內頁

包埋嘅 gift tag（唔要 gift tag 可減 $0.5）

從賣家嘅網站得知，茶包嘅製造商係國內福建一間大茶廠，嗰間茶廠係專做「道地」茶系列，不過呢層真係信不信由你！記得初初賣家有兩款茶可供選擇，(1) 茉莉，(2) 烏龍，後來唔知咩原因，到我要落 order 時只得返茉莉一種味...

講咗咁耐，都未話比大家聽售價... 賣家提供好多款 packing，我揀咗呢款只係 HK$5/個，絕對合符我 budget 之內，不過要留意，有 minimum order，落訂時最好 confirm 清楚，以下係賣家嘅 website，其實佢除咗茶包之外，仲有其他嘅小禮物：

http://www.mimigift.hk/page4.php

賣家服務好 OK，我不斷改佢個 tag 嘅 design，冇怨言之外真係做到我要求嘅一模一樣，而且覆 email 都好快。落單後佢話 4 weeks 起貨，最後當然係有早冇遲啦，佢哋包送貨，但只限於地鐵站，冇記錯的話... 好似係任何一個地鐵站。

2009年11月24日星期二

1121 之造型大揭秘 (新增酒樓褂頭)

自 post 完上一篇 blog 之後先醒覺原來大家冇我個 facebook，唔好意思，我太大意...

幸好陸陸續續收到各方好友嘅靚相，總算可以止一止渴，所以就 post 出嚟比大家睇下啦，不過仲未有時間逐一細說，唔好意思！

《早上褂頭 look》

出發啦，準備殺去男家... 左邊 2 位姊妹都著上羽絨...... 歐陽生都叫做有件西裝褸，阿伴娘都有件毛毛披肩吖...... 可憐嘅我...

《註冊 look》

我永遠都最受呢個造型，註冊又點可以唔用佢呢...

《酒樓褂頭 look》

唔知我 post 呢張相出嚟會唔會被呢位姊妹詛咒我呢？

《迎賓 look》

黃 + 黑呢條迎賓裙比老公個細佬激讚，其次就係送客嘅藍色晚裝。

(各方好友，唔好意思，要出賣你哋呢張相啦)

《進場 look》

《敬酒 look》

多謝陳陳廸幫我影咗後面...... 好鐘意呀...

《送客 look》

同 mua final trial 時都一致認為旋風頭原來好襯我... 所以繼續旋風落去...

呢件晚裝又係被激讚，好多人估我得 around 100 lbs，今勻真係歸功於呢件晚裝 (^^)

(唔好意思，又出賣咗小高 & 嘉芙蓮)

另外要感激 blogger 大寶寶嘅支持，抽空出席咗我嘅註冊典禮，仲幫我影咗好多靚相，詳情可以去睇睇佢篇 blog：

http://hk.myblog.yahoo.com/fatpofatpo

2009年11月23日星期一

婚後感

籌備咗整整 22 個月嘅升呢之旅終於完滿結束，其實真係需要多謝好多人！整個婚禮冇乜甩漏，亦無乜遺憾，因為我差不多可以同所有人影相，time control 做得唔錯，好難忘... 真係好難忘...

人... 固之然要多謝，但我最想多謝我嘅兄弟姊妹團，你哋嘅功勞真係功不可沒，非常有手尾地幫我哋執拾所有物資，我基乎可以換 casual wear 同賓客一齊離開酒樓 (笑)！我同老公都覺得冇搵錯人幫手，你哋個個都 very good！

完成咗婚禮，有好多嘢想講。不過首先我想話比各位待嫁新娘聽，新婚當晚要好好照顧自己老公，尤其是佢係飲酒一族... 1121 當晚我雖然 11:xx 就送完客，但最終要 2:xx 先離開酒樓。

(1) 老公貓咗...... 生產咗 5 袋嘔吐物，好在一早有準備... 隨身帶備咗 n 咁多個膠袋

(2) 我老豆仲勁，隊人之餘亦被人狂隊，又玩溝酒... 結果喺麒麟閣門口醉到訓著咗，最終要 3 位猛男親戚抬佢上車先返到屋企...

至於我... 返到屋企首先要照顧腳步浮浮嘅新任老公... 佢返到去淨係識得喺梳化攤屍... 到自己沖涼時最難搞就係個頭... MUA 實在太不吝嗇，同我狂噴定型水，結果我差不多用咗一小時，落咗 5 次護髮素 + 3 次洗頭水先洗乾淨個頭... 最終訓覺時已經係 4:xx...

聽日就要準備回門，回完門後我就會得閒好多，到時再同大家分享當晚盛況，稍後時間會送上即日剪片，大家要密切留意喔！

P.S. 想睇相止渴的話，可以先上小妹嘅 facebook，多謝老公 d friends 效率咁高 upload 咗部份相，裡面除咗朝早出門個褂 look 未有之外，基本上晚上所有 look 都齊哂架啦！

2009年11月21日星期六

等上頭 @ 倒數 5.5 小時

仲有大約 5.5 小時，化妝師就會進駐我屋企，展開我 1121 升呢之旅。

但係...... 呢一刻我仲等緊上頭... 歐陽生嘅上頭時間係 01:30，我就係咁易遲少少 01:45，距離宜家仲有 45 分鐘左右，所以我把握時間敷緊個保濕 mask！

今日做咗好多嘢，亦影咗好多花絮，稍後再同大家分享。

早兩日天氣好凍，姊妹 Anita 打比我問我好唔好 cancel 玩冰中夾麻雀呢個遊戲，我當然堅決反對啦，冬天唔玩，唔通等夏天先玩咩，我唔會咁便宜佢男子組嘅，hohoho！

到今日，依然仲有人問我緊唔緊張，講真我唔算太緊張，反而我覺得好好玩喎！

希望聽日唔好太凍，太陽伯伯要加油唔好偷懶呀！啱啱沖完涼出嚟，天寒地凍，著住件新睡衣真係好凍...

請各位祝福我...

2009年11月20日星期五

雜炒 @ 倒數 1 日

嘩嘩嘩...... 聽日就係本小姐升呢做歐陽太嘅大日子啦，好多人都問我緊唔緊張，其實講真，我唔算太緊張，因為係無時間比你緊張...... 呢幾日電話不停響，花車公司啦，化妝師啦，攝影公司啦，花球啦，姊妹啦，乜乜乜乜全部都打電話嚟 confirm 嘢；仲有幫自己扮靚啦，根本就冇時間去緊張...... 我緊張嘅時候，通常都係喺廁所辦緊公... 沖緊涼... 臨訓前... 訓醒後... 呢 d 時間，之後根本 d 時間就比其他嘢佔據晒！

以下係雜炒一則，有好多嘢要報告...

《走難咯》

之前有好多 blogger 都話我有 7 袋嘢好多，今日訓醒再望下自己間房，已經塞滿咗條路，又好似真係好誇喎，wakakakakaka

《閃得有道理》

為咗迎合自己升呢嘅大日子，當然有咁閃得咁閃啦！所以乜都唔洗諗就揀咗閃銀色底做 gel 甲，再痴咗 66 粒石 (當然係兩隻手加埋啦)，然後又 pat pat 痕叫美甲師雕咗 4 隻手指嘅花，諗住襯婚紗又得，襯晚裝又得嘛！歐陽生一見到就話：「好閃呀！」

《在寒冷的一天出嫁》

決定喺 11 月結婚，唔多唔少會預咗會凍凍地，但係勢估唔到會凍成咁架嘛！早兩日話 12-17 度，想死咩...... 尋晚再睇天氣報告， 13-18 度...... 都係嗰句，好凍呀！所以已經去掃咗 d 手揸暖包，亦買咗 d 貼上衣服嘅暖貼。不過我唔知點貼囉，上身著 nu bra，下身著裙...... 貼喺邊喎？

雖然已經借咗毛毛披肩，不過著唔著又另一件事，我其實就好想唔著，不過...... 有時真係要睇天氣，唯有聽天由命啦！尋日見太陽伯伯出嚟返工，希望佢聽日唔好請假！

《我的花球》

本來...... 我已經 confirm 咗呢個紫色花球

好可惜，尋日收到花店消息話 d 紫色風信子開得唔靚，而且亦偏藍色，佢話唔係好襯，建議我轉款。

偏偏牡丹花球嘅花材十分之齊全及開得十分之靚，結果我就 confirm 咗呢個做我嘅出嫁花球 lu～

冇得用紫白花球的確有少少可惜，不過唔緊要啦，就當係紀念我係一個 11 月嘅新娘子吧！

2009年11月19日星期四

北海道我嚟啦 @ 倒數 2 日

2009 年 9 月 17 日（星期四）

望穿秋水，終等到 ANA Sky Holiday 出咗 11 月嘅北海道 package 啦！是晚即刻同男朋友上網左 check 右 check 酒店，周邊環境等等，準備幾日後去 book 機票及酒店房。

到咗星期日，我哋落去元朗 book package，嗰幢大廈一層樓有三間旅行社，分別係新華，康泰及永安。由於只係新華冇乜客唔洗等，所以第一間就入咗去。表明來意後，個嬸嬸死都話 ANA 未出 11 月 package，我同佢講咗 N 次上網已經有，佢又唔理我，猛揭佢自己嗰個 file，口 up up 話冇話冇，又同我講佢今朝早已經 update 晒所有 package 資料。既然佢咁講，我同男朋友都廢事睬佢，我臨走仲送佢一句：「哦，你話冇就冇囉，咁算囉～」，之後就撇！

永安最多人排隊，所以入咗康泰先，同個哥哥仔講想 book ANA package，個哥哥仔話票務部逢星期日休息，Oh.... Shit..... 家下係咪市道太好唔想做生意？星期日票務部休息？？？佢比張紙仔我叫我打去熱線度問就得，大佬呀，我想 book 呀，唔係問資料呀，離開康泰我就立即掉咗張紙仔！

最後唯有入返去最多人嘅永安，排咗一陣後終於輪到我哋。經過一輪問答環節後好快就決定好出發及回程日期、航班班次等，然後乖乖地比資料人哋 book 機位。至於酒店，ANA package 有好幾間酒店比我哋揀，我哋好快就決定咗住邊間，但要試下有冇房先，所以先落住 HK$1,000 訂，等旅行社成功 book 到酒店房先交埋尾數。

2009 年 9 月 24 日（星期四）

今日永安打電話比我同我 confirm 成功 book 咗 Hotel Sunroute New Sapporo 3 日 2 夜房，叫我下個星期交埋尾數啦！呢幾日要努力上網做 searching，book 埋餘下嗰幾日嘅酒店房先！

2009 年 10 月 9 日（星期五）

終於都收到機票及酒店 voucher 啦！宜家嘅感覺好實在，得閒時就拎本旅遊書出嚟刨，不過好可惜宜家大部份時間都搞緊結婚嘢，好在唔係婚後立即出發，否則我會倒瀉籮蟹咁囉～

出發日期：15-12-2009 凌晨機（玩到好盡喔～～～）

回程日期：23-12-2009（返到 HK 就係平安夜啦！）

12 月 19 日前出發都唔會加收附加費，去到一定有雪落！我同男朋友都未見過落雪，期待 ^^！去程、回程停東京又唔收錢，正！本來諗住過埋白色聖誕先返，不過 check 極都冇機位返香港，最快要 2010 年 1 月 1 日，本來都諗得過，但要 stay over 2 weeks 喎，又好似過份咗 d，所以都係 23 號返嚟，喺香港過聖誕吧啦！

抵達地方：札幌、小樽、登別、旭川、定山溪、新宿、橫濱、池袋、上野、六本目

價錢：計晒 9 日 8 夜嘅酒店（其中一晚住溫泉酒店）+ 機票 + 稅項，兩條友暫時用咗 HK$14,247 <-- 要記住，呢個價錢係包晒 9 日 8 夜嘅機票、酒店、稅，我覺得簡直係超值！當然，仲有好乸利嘅車費及餐飲費未計算在內，而且我哋住嘅酒店都唔會好華麗，因為我哋兩條友都係鐘意留喺條街多過喺酒店房，就算出面冇街燈都會躝出街嗰種，所以我哋只係要求有張床比我哋訓一晚就足夠。

北海道，我來也喔！

2009年11月18日星期三

主花車花車佈置 @ 倒數 3 日

2009 年 11 月 5 日（星期四）

特別要多謝 yahoo blogger 小惠慷慨借出嘅心型嘅花車佈置！當日小惠病到五顏六色都要出嚟同我交收，真係唔好意思，希望你快 d 好返！

呢架就係我嘅婚車，當古董 MG 遇上心型花車佈置 = ......

好靚呀～到時加埋靚仔又靚女嘅 Snoopy 上去，掂晒！歡迎各位 1121 天水圍出門嘅新娘過嚟吖！

**********************************************************************************

同場加映

剛過去嘅星期日係結婚物資執拾日，我同歐陽生都好乖咁喺屋企不斷執，花咗一個下晝嘅時間就執咗 6-7 袋物資，加埋 d 禮服，我估 total 應該有 11 袋左右，兄弟們，當日辛苦你哋搬搬抬抬啦～

講到物資，要數最嚴重嘅當然係我哋 d 婚紗相簿，大大小小相簿總共有 1 喼 + 1 袋（仲要係紅白藍），希望唔好比人詛咒...... 淨係相架已經有 7 個，有 4-5 個已經放棄唔帶出去，我係咪過份咗 d？

以下就係經篩選後決定帶出去嗰 7 個，嗰 2 張散相已經打算唔帶。

2009年11月17日星期二

枱號咭 + Menu 完成篇 @ 倒數 4 日

一直都冇乜心機設計呢兩項 items，因為諗住做到就做，做唔到就用返酒樓嗰 d standard 款。不過前排突然想 design 一下，就開著個電腦，上網 search 下人哋外國 d 款就動手設計，估唔到大概兩個鐘左右就 K.O. 咗 table number card，至於 menu 牌，都係用咗大約兩個鐘左右啦，但係要自己加少少 DIY 添囉，歐陽生都好滿意！

TABLE　NUMBER　CARD

由於 foul 咗 4、14呢 d 個數字，所以圍數拖到 28。

近睇，其實我都覺得自己設計得......... 幾 hea 下！

MENU

Menu 叫做對得住自己少少，因為真係要 d 功夫剪剪貼貼。要預備嘅材料亦唔算多，只係絲帶，250g 嘅硬咭紙，及淺藍色嘅 menu 內容，只要襯好顏色就 ok！

宜家做得靚靚地，滿足感都大 d！用咗一個下午嘅時間都做唔晒，手腳真係慢咗少少...

歐陽生一見到就話「好靚喎」，希望係真說話啦！

2009年11月16日星期一

大雜燴 DIY @ 倒數 5 日

DIY items 實在太多太濕碎，冇時間逐篇介紹，惟有嚟個大雜燴！

DIY 簽名筆

男人有時真係唔到 deadline 唔上心，自從發生被遺棄事件後，歐陽生好似真係上心咗，唔知係因為時間上唔容許佢再拖，定係良心發現？Anyway，我都好開心同佢走過呢段路，唔開心時就當係籌備嘅必經階段，好快就睇化咗。

（撐到越嚟越遠）唔...... 其實點解無啦啦提起歐陽生呢，係因為呢盤花係佢一手一腳做架！我 DIY 呢類嘢真係唔得，所以由痴絲帶，整筆頭，到佈置成個筆筒都係佢一手一腳做，我淨係綁咗 5 個蝴蝶結同埋買咗 5 支簽名筆！當日就當係一盤花咁 show 喺 reception table 上（但相信一定會被摧殘）。

DIY 戒指枕

PN 送咗一個戒指枕比我，其實緣美傳說都有提供，不過我又手痕，見到有一對咁 Q 版嘅 Snoopy 結婚公仔，忍唔住想拮一拮佢屎忽，縫實佢哋喺戒指枕上面....... 但係當我打算落針時，發覺佢哋個 pat pat 原來裝假狗，有一塊好硬嘅底喺入面，結果改用雙面膠紙貼實，效果又出奇地穩陣喎！

完成後發覺呢對 Snoopy 同我個戒指枕好襯，算係我最滿意嘅 DIY 成品之一，另一個最滿意成品....... 見下項

DIY 愛的宣言

呢個真係超級滿意！唔知有冇新娘子好似我咁，連愛的宣言都要自己做。不過做完又真係好開心，我自己就比 100 分啦，連歐陽生都話 OK，成本仲唔洗 $20！

為咗唔比男主腳知道自己當日要讀乜，當然要將宣言內容打格仔啦！

　　　　　　　（正面）　　　　　　　　　　　　　　（背面）

DIY 襟花手花

呢個唔係本小姐出手啦，係我未來弟婦做比我嘅。佢真識做，貫徹我紫 + 白嘅 theme color，good！至於黃色嗰兩個就係 for 佢自己 & 我細佬。

2009年11月15日星期日

Welcome Board 完成篇 @ 倒數 6 日

之前喺 CWB 嗰間吉之島行過見到 $10 三腳木架........ 論 size 及價錢都啱，但冇買到，因為嗰陣覺得仲有時間，唔想咁快買完放喺屋企阻定。呢排想買返，去到吉之島，點之冇晒貨，得返 d 迷你 size...... 等咗差不多成個月都唔返貨，大鑊！結果趁某次喺元朗行街，走上元朗嘅吉之島，好在呢間分店有，買返！

HK$10 真係無得彈，之後可以再用！反正我有 d 大相架係冇 stand！