薑醋 project @ 35W0D

2013 年 8 月 17 日 (星期六)

@ 35W0D

喺 9 月嘅準媽媽群裡面，唔知我算唔算遲開始煲薑醋呢個大 project 呢?
話說我媽咪唔係好識煲，反而老爺奶奶有豐富嘅煲薑醋經驗，所以一早決定呢項重大工程就交比佢哋。

一踏入 8 月，我見好多準媽媽已經開始得如火如荼，咁我梗係問下奶奶佢哋嘅準備情況啦，點知佢哋完全未開始喎。其實我個心有少少急，因為上網成日睇返嚟都話要早兩個月煲先入味，但係拜託得佢幫我煲，我覺得又要信任人哋嗰套，所以都係靜觀其變。

突然上星期六奶奶吩咐我哋去買醋，我就知原來佢準備開始啦。本身對醋嘅牌子冇乜所謂，不過蒲得 BK 多，都八到原來好多準媽媽都會選擇「悅和」，連好多陪月都話「悅和」比較好食。既然係咁，就一於 target 呢個牌子。收到奶奶 order 之後就即刻搵個星期六叫歐陽生揸架車出去荃灣買，本來想一次過喺楊屋道街市買埋 d 老薑，不過原來老爺一早買好晒。仲諗住一次過喺荃灣連薑連醋車上沙田，點知原來老爺已經靜靜地起革命。

悅和甜醋 (10斤)　$238

當晚買完醋就順便喺荃灣同老爺奶奶食埋飯先返沙田。本來想搵日入去幫手批下薑皮，點知原來連呢個 step 都已經做埋，太感動啦。因為我知道要批薑皮，又要洗又要曬係好辛苦嘅工作，今次真係辛苦佢兩個。

佢哋幫我曬乾晒啲薑皮，仲細心到買埋魚袋比我用嚟煲水坐月時洗頭。因為奶奶後生時冇好好重視坐月，繼續掂生水，所以佢真係瀨咗嘢，宜家耐唔耐隻手會痺好幾個月，一翻發就要長期去做針疚。不過佢仍然好開通比我坐月時沖涼洗頭，但就一定要依足指示煲薑水，同埋吹乾淨個頭先可以踏出個浴室，反而我媽咪就唔係好想我洗頭。

至於沖涼嗰部份，原來係分開嘅，或者因為薑皮唔夠啦。
老爺奶奶買咗啲薑比我，佢話到時我要沖涼就搵個刷刷乾淨啲泥，拍一拍扁佢，然後拎去煲水沖涼，雖然啲薑已經擺到發晒芽，不過仍然用得。本來有諗過買薑皂雙管齊下，不過宜家有現成薑比我煲水，應該更有效啦。



我仲未有機會返去沙田，唔知宜家啲薑醋搞成點呢？其實我本身唔係太鐘意食薑醋，不過要補身就冇辦法焗住食。男女兩家一共煲 15 斤，應該夠派夠食啦啩？

大肚相 preview photo @ Fab Studio

其實呢 d preview photo 早於兩星期前已經收到啦。Fab Studio 真係講得出做得到，影完相剛剛一星期就收到晒所有相。其實如果唔介意像素較低 (約百多 KB 一張相) 、冇得執相、同埋有佢公司嘅 watermark 之外，基本上呢堆 preview photo 等於買晒所有相架啦。

收到相當然同歐陽生慢慢逐張 lun 下，幸好我未有肚紋，而且身形冇乜腫脹，所以要執嘅相唔多。結果我哋兩個一致同意所有相簿同埋大相全部唔要，寧願要多幾張相。或許，可能，有機會等 BB 出咗世之後會再同佢影一輯 new born baby photo。又或許，可能，有機會等 BB 大少少會一齊影 family photo，所以都係唔要咁多雜物啦。最終可以揀 45 張相。普遍我都覺得 D 相符合到我嘅要求，而 nude photo 都唔錯，都要咗幾張。以下就係我 45 張相大公開，當然啦，nude photo 我就唔放出嚟啦，唔想獻醜啦。。。。哈哈。

1) 白色背景 + 白色短裙仔露肚相

無錯，無論影相嗰日定係呢個 moment 都好，我仍然係 36" 肚！

2) 仍然係白色背景 + 換咗條長裙

我自己幾鐘意呢張，又自戀狂啦....



呢 D 都好鐘意..... 感覺好 sweet~

3) 飄紗  呢 part 其實係揀兩隻自己心儀顏色嘅紗，佢會幫你套喺 bra top 之上，再有人喺後面不斷揚呀揚而影返嚟

白色背景我揀咗用薰衣草色去襯，而黑色背景就用咗紅色紗。



4) 黑色背景 + 黑色短裙仔露肚相

5) 最後一個造型就係揀一件長裙，有晚裝有短裙有好多唔同嘅款。我之前講過我就係揀咗呢條藍色長裙啦。

先嚟 D 比較正經嘅 pose...

之後梗係唔少得一 d playful d 架啦

到最後我哋會揸住張黑色 cardboard，用嚟 key bb 張相落去。可以揀等 BB 出咗世先真正 key 落去，但係我等唔切啦，我揀咗放張 4D 超聲波相，不過仲未收到 Fab Studio 比返我嘅完成品。

我就係揀咗 key 呢張 4D 相啦，完成後將會成為歐陽家第一張嘅全家幅， ^^

執好嘅 final version 要等大概 3 - 4 個星期先會 send 返比我，我等唔切啦。希望大家唔好嫌有佢公司嘅水印，睇住先啦。

一個月倒數 @ 35W4D

2013 年 8 月 21 日 (星期三)

@ 35W4D

話咁快就到咗預產期前一個月啦，正式進入倒數階段。每日上 BK 都見到好多 9 月媽媽陸續報喜，我就知我嘅 due date 不遠矣！

呢一刻嘅心情真係好複雜，踏入 30W 已經開始唔捨得 BB 就快要離開我個肚嘅事實。所以每次佢郁我都會盡量放隻手喺自己肚皮上面，爭取機會再好好咁 feel 吓呢 D 咁 amazing 嘅胎動，有時真係可以傻到摸住自己個肚笑咗出嚟。但係當我覺得好辛苦，又恨不得佢快 d 出世。就好似早兩日咁，我一路返工就一路 feel 到佢係咁踢我胸骨同埋個胃，搞到我食 lunch 時望住 d 食物都冇胃口。感覺上阿 B 大咗好多，第一次有種感覺好想佢快 d 出世，唔好再阻住我正常生活。不過我知道自己講到尾一定會好唔捨得。

另外我其實都好想借呢個地方多謝一下歐陽先生。

由我 bingo 開始後佢一直都對我好好 (雖然未 bingo 前都對我好好 <-- 我知佢一定要我咁樣講)，佢陪我戒口，呢樣我真係好感激。對於一個好鐘意食嘢嘅人嚟講，要戒口 (仲要唔關佢事) 真係要好有恆心先得。唯獨是佢冇陪我一齊戒凍飲，不過我都好心足架啦，我知道好多男人都未必會陪老婆做呢 d 嘢。好多時媽咪都話：「陪佢戒口？洗唔洗呀？」不過我好欣賞佢話：「我唔止口頭上支持佢，我想行動上都陪佢一齊。」好好好開心呀，所以好多時雖然恨食呢樣恨飲嗰樣，但係諗起有人陪我一齊作戰又即刻冇咁大癮喎。7 - 8 個月左右開始，個肚越嚟越大，佢會主動問我洗唔洗幫我剪腳甲同埋幫我洗頭。

除此之外，佢真係包辦晒所有家頭細務，以往放假嘅日子就係我哋兩個一齊做家務嘅日子。呢 9 個月以嚟，我放假就真係放假，大爺咁款攤喺梳化度睇電視 + 食蛋 + 飲奶，而佢放假就繼續做家務，而且係零怨言。近呢幾個星期，可能因為個肚嘅重量大咗，好多時夜晚對腳都好酸軟，佢會自薦幫我做按摩機，我可以選擇「天王式按摩」，只係冇機會變做劉華..... -_-

老公，多謝你，13 年前我就知道自己冇揀錯 Mr. Right！

另外要多謝嘅就係自己媽咪。「世上只有媽媽好」呢句說話真係一 D 都冇錯。最最最深印象就係剛剛入院嗰次，生女唔知女心肝，佢完全明白到我一個人入院有幾咁驚，加上我有大有細.... 佢即刻請假再飛奔嚟醫院陪我，我超感動。而且佢真係幫咗我好多，淨係陀 B 時每晚返去食飯，佢為咗煮 D 咩餸而頭痕我已經好多謝佢。大肚婆飲食上真係有好多要戒口，雖然佢都唔係只係就我一個，不過晚晚咁諗法真係人都癲。以後 BB 出咗世仲要交比媽咪湊，真係一家大細靠晒佢啦！

最後就要多謝未出世嘅 BB。我知佢不嬲都好錫我，所以我一直以嚟完全零害喜，連歐陽生都話開頭唔覺我 bingo，因為我完全冇唔舒服。BB 又冇令我胃口改變，我食得訓得。我外表上亦都冇好明顯嘅腫脹，touchwood 仲叫做 fit，亦未出現肚紋。BB 咁你要繼續錫住我。呢排我同歐陽生已經晚晚同佢傾計，叫佢滿咗 38W 加兩日先出嚟，因為我 38W 先開始放產假，比我自由兩日就出世，時間啱啱好。千祈唔好過期居留，要催生仲痛呀。而且叫 BB 唔好要我陣痛咁耐先開足 10 度，4 個鐘左右好啦，wakakaka。

數數下原來返多兩星期工就開始放產假，唉..... 真係好擔心，唔知輪到自己嘅時候會係點呢？

好。緊。張。呀。

走佬袋 is ready @ 35W0Ｄ

2013 年 8 月 10 日 (星期六)

@ 35W0D

經過尋日冇啦啦要入院一事，我就覺得要開始準備個走佬袋啦。之前一直都懶懶閒，甚至有諗過放產假時先執，不過尋日喺健康院個姑娘都叫我好開始執定啦。

上網睇過好多人嘅 comments，其實間間醫院嘅要求都唔同。就算同一間醫院，唔同嘅助產士／嬸嬸都有唔同嘅做法。只係知道大致上可分為兩袋：入院用 + 出院用。

記得之前喺吉之島／一田有 d 單張教媽媽買 BB 嘢，其中包括走佬袋所需物品。我用咗呢個 list 再加自己上網睇完各媽媽嘅意見後整合咗一個出嚟，其實要帶嘅嘢都好多：



1) 自己身份證 (已隨身袋住) + 丈夫身份證 (準備咗一份副本，萬一唔係佢同我入院都有得交比醫院）
2) 陪產信
3) 孕婦衞生巾 (各有各醫院要求不同，為免麻煩，有扣及冇扣都各預備一包）
4) 網褲 (一包 6 條)
5) 孕婦床墊 (其實之前醫院話會提供，不過既然買咗又唔想到時麻煩人，都係自備一包）
6) 沖洗傷口瓶
7) 束腹帶 (其實好似話醫院唔多建議用，不過都係嗰句，既然有喺度就帶埋去）
8) 個人衛生用品 (即牙膏，牙刷，沖涼液及洗頭水 <-- 其實有可能唔會喺醫院沖涼，不過我又驚到時生完成身汗而且會污糟，帶埋啦）
9) 鎖頭一個 (醫院個 locker 係要自備鎖頭架)
10) 初生 BB 尿片一包
11) 盒裝紙巾 (有人建議帶廚房紙，用嚟洗會陰傷口，不過我個人試驗過呢隻維達紙巾質地同 tempo 有得揮，所以帶盒裝紙巾算啦，還掂住院期間都要用紙巾）
12) 一大一小毛巾 (大毛巾用嚟比自己沖涼抹身用，細毛巾係健康院話要帶比 BB 用.... 但唔知點解）
13) 嬰兒濕紙巾 (聽講座拎埋拎埋好多贈品，用鬼咗佢）
14) 乳墊 (我只係帶咗兩對咁大把，我估自己生完未咁快上奶，都係以防萬一架咋）
15) 思詩樂濕棉 10 包 (都係不同講座嘅贈品，由於我會餵人奶，點都要用嚟抹下乳頭先比阿 B 啜)
16) 保溫杯 (用嚟生完後焗炒米茶代替清水，但係炒米茶未開工炒）
17) 膠袋 (做垃圾袋)

仲有就係拖鞋，到時會著住去，萬一真係出出下街要入院生仔，最多就著住波鞋頂住先，再叫屋企人拎嚟醫院比我。

執完之後好大袋呀，不過好彩一袋可以裝得晒。



搞完呢袋之後，仲要預備多一袋係 for BB 出院用嘅，因為住院時醫院會提供晒所有 BB 嘅衣物，出院就要自己預備啦：



1) 初生 BB 和尚袍
2) 初生 BB 長袖夾衣
3) 帽仔
4) 手套
5) 腳套
6) 包被

↑　以上全部都係講座／媽媽會嘅贈品，阿 B 出院嗰日幫各大公司賣下廣告啦！

7) 自己嘅出院衫，都未知到時咩天氣，但穩陣起見我會入面著一件背心，出面著一件長袖外套，legging + 波鞋，到時再帶多頂帽，包保唔會攝親啦啩。雖然好似好多衫咁，但係基本上一出院就上車直接返到屋企樓下，忍耐一陣啦。而且個身體係自己嘅，好好保護唔好冷親，咁到咗老 D 都唔會怪自己生完時冇聽老人家話啦。

冇啦啦入咗院 @ 34W6D

 

 

2013 年 8 月 9 日 (星期五)

@ 34W5D

咁大個女，第一次要入院！

事綠呢日係要返健康院做 regular 檢查，例牌都係驗小便，磅重，見姑娘聽 BB 心跳，然後見助產士傾下計，走得。今日都以為一切順利，點知去到見姑娘聽胎心嗰 part 就出事啦！

姑娘一擺部機埋我個肚到，佢冇出聲，嗰陣我都仲以為乜事都冇。隔咗幾秒，佢見到部機嘅心跳係咁升，之後佢仲索性遞部機比我睇。我一睇，讀數係 165。姑娘話阿 B 嘅心跳偏快，佢仲同我講正常要 within 120 - 160/min，佢話佢一開始放部機埋我個肚時個讀數已經係 158，係臨介點啦。所以今次安排我去見醫生，等醫生親自聽心跳。健康院嘅政策係如果冇咩特別嘢就只需要見姑娘，今次要見醫生我個心都沉一沉。

出去大堂等嗌名，入到醫生房由醫生親自再幫我聽多次。聽嘅時候我感覺到阿 B 係咁郁，醫生個樣好 cool，佢問我今日有冇飲咖啡奶茶，梗係冇啦，我其實戒咗口好耐啦。醫生索性遞部機比我睇，我一睇，嘩，讀數係 17X，比起頭先姑娘聽嗰時仲高咗，我仲睇住部機由 17X 升到去 188。

醫生：你睇，17X 呀！
我：唔係呀，188 添啦！

醫生都好緊張接返部機嚟睇，然後我話：死啦，咁點算？

醫生話：唔洗驚，唔洗死。BB 心跳快有好多原因嘅，啱啱佢又郁咗幾下做咗幾下運動，都有關係架。你緊張都會影響到佢緊張。

落床後佢立即寫咗轉介信比我入屯門醫院。佢話健康院最多同你聽幾分鐘，但入院會有部機搏住同你 check ，點都穩陣 D！仲叫我即刻上產前房，唔洗去急症。



我接過張入院轉介信後一望，入院時間係「儘快」。當時都唔識驚，我仲喺度諗，我咩行李都冇帶，要住一晚的話我都唔知點算。仲開口問醫生係咪要宜家即刻過去，醫生話你有權夜晚甚至凌晨先入院，不過我建議你儘快囉。

離開健康院後，以為自己好冷靜，不停向住個肚講：阿 B 你唔好有事。

打比歐陽生同佢交代晒成件事時 D 眼淚就係咁流，一路流一路搵的士。第一次為人父母真係咩都唔識，加上我成日都覺得一個人如果心跳過快係好嚴重嘅一件事。幾經辛苦終於截到一架的士，喺車上再打埋比媽咪話佢知我要入院。世上永遠都係媽媽好，佢本來嗰日要收 6 點，佢知道我咁大個女未曾試過住院，佢同公司講咗話知道我一個人一定會好驚，想宜家即走，幸好佢公司都批准。

半個鐘頭車程後我到咗屯門醫院直上產前病房，點知姑娘話我宜家冇見紅、穿水、陣痛就要我返落地下嗰層搞入院手續。個心已經擔心阿 B 有事，又頻頻撲撲上上落落，都唔知死咗幾多細胞。媽咪再打比我話佢宜家即刻走得，我就叫佢直接上 7 樓產前房搵我。我幫自己搞完入院手續後上返產前房，有個姑娘叫我咗入一間房，幫我探熱，聽胎心，量血壓。唔知係咪我太頻撲，而且撞啱 12:00，烈日當空都有 D 熱，姑娘話我探熱有 37.9 度，微燒。而且血壓都唔靚仔，佢叫我放鬆 D，仲問我係咪第一胎。佢安慰我話入得嚟醫院就唔洗擔心，大把人會睇實我。安慰咗一陣再量血壓先靚好多，至於阿 B 嘅心跳又跌返去 156，我呢個時候先鬆咗一口氣 (其實我仍然覺得偏高)。

姑娘要我換衫，驗尿，再安排我訓上床搏住機聽心跳。個肚搏咗部機就唔郁得，期間又唔可以食嘢或者飲水。嗰陣咁啱係送午飯時間，大約 15 分鐘左右媽咪都嚟到，所以可以入嚟病房陪咗我一陣。得一個鐘頭送飯時間，因為我未食 lunch，佢臨走前買咗個麵包比我就要走啦。



聽胎心差不多聽咗一個鐘，途中有好多姑娘定時定候 (大約 10 分鐘左右) 就嚟 check 一次機，感覺都幾好吖。其實只要你聽聽話話，唔好成日煩 D 姑娘，佢哋都好好人架。一個鐘後終於可以拆咗部機，但係姑娘都冇話返比我知讀數係幾多，淨係叫我等見醫生，佢會話我知今晚洗唔洗留院。拆機後我就拿拿臨食嘢，其實住院真係好悶架，電視又唔啱睇，又唔可以明目張膽玩電話，訓又訓唔著，因為歐陽生話返緊入嚟睇我，所以我等緊佢電話，雖然未到探病時間，但係我可以出病房見佢嘛。

其實宜家諗返轉頭，有一次住產前房嘅經驗都唔錯。一來可以見識下 D 姑娘同埋醫生，其實都冇坊間講到佢哋咁惡啫。有時好自然同佢哋講聲唔該，佢哋會答返你一句唔洗客氣。二來同房有兩個媽媽穿水及開刀，我完全感受到佢哋陣痛時有幾痛，開始亂諗..... 有 D 淆底點解一開始唔決定去私家開刀生，好驚輪到自己時會唔知點算。

等了又等，大約三點幾終於有醫生嚟，佢話阿 B 心跳冇乜問題， BB 心跳時快時慢係好正常，唔洗留院，只係健康院大驚小怪，不過要一個星期後返去健康院覆診。我堂當安樂晒，等佢幫我搞埋 D 出院文件，再等埋老公嚟到我就可以換衫返屋企。

**********************************************************************************
2013 年 8 月 16 日 (星期五)

@ 35W6D

今日又要返健康院覆診，好驚阿 B 嘅心跳又過快，所以呢個一星期我得閒就同 BB 傾計，叫佢要乖，心跳唔准太快亦唔准太慢。

唔知 BB 係咪真係識聽呢？今日返去健康院覆診時阿 B 心跳最低 145 最高 148 咋，原來佢真聽到我同佢傾計。

BB 你真係要乖呀，唔好再嚇媽咪同埋爸爸啦！

我係咪過輕？ @ 32W 及 33W 產檢

2013 年 7 月 26 日 (星期五)

@ 31W6D 健康院產檢

踏入 30W 以後，健康院規定每隔兩星期就返去檢查一次。
原本以為今次都係好 hea，見完姑娘就閃得，點知因為體重輕得太少而被安排去見醫生。

話說今次同平時一樣，去到先磅重，驗小便，量血壓，見姑娘聽 BB 心跳 + 度肚圍，再見另一個姑娘了解下呢兩個星期嘅懷孕情況，然後就走得。

點知今次一上磅，58.9kg，我望一望枱面上自己個報告，兩星期前嘅磅數係 58.7kg，咁即係話我只係重咗 0.2kg。姑娘話要我磅多次，唉，但係磅多次咁又點，仍然係得 58.7kg。不過姑娘話我只係重咗 0.1kg，其實明明 58.9 - 58.7 係 0.2，佢係都要話我重咗 0.1kg。

結果我以為可以過關走得之時，有個姑娘跑出嚟同我講：你重得太少啦，要去見醫生，見完醫生先走得。平時如果冇咩問題係唔需要見醫生，估唔到今次因為體重問題要第一次被安排見醫生。

入到去醫生房，佢就問我自己估唔估到咩原因重得咁少。我好老實咁答佢，由我懷孕以嚟，我胃口冇特別增加得勁咗，食量仍然同未有 BB 前差不多。而且我冇任何害喜反應，一直都食到嘢，就係唔知點解唔係重好多。醫生話每個孕婦每兩星期返嚟覆診要重 1kg，而我只係重 0.1kg，係人哋正常嘅十份一，宜家冇嘢驚，只係驚個 BB 唔吸收，出世會比較輕磅，到時要訓加護箱。咁我梗係問 BB 宜家 size 正唔正常啦，醫生話政府冇得照，唔知 BB size，佢哋只係度子宮 size，每次返去覆診子宮比之前大 1cm，我今次啱啱好大咗 1cm，所以醫生話 BB size 係「可接受範圍內」。唓，咁即係要我出私家照啦。之後醫生話叫我每日加一餐下午茶，但唔好加宵夜，因為宵夜好容易肥晒喺媽媽度。之後佢仲好凝重咁同我講：只要你當日唔係飽到嘔，都唔該你加返餐下午茶。下午茶可以食芝士，生果，乳酪，梳打餅等等。<-- 其實呢 d 嘢我耐唔耐都有食下當 tea，不過就硬係唔算重好多，我問醫生萬一我跟住做，但係兩星期後返嚟都係重得唔多，咁點算？醫生話咁冇辦法，或者你真係唔長肉，如果其他方面都一切正常，咁就無問題。

離開健康院後我有 D 唔開心，係咪因為我真係平時食得太少而令 BB 唔長肉？但係我由始至終冇去 keep fit，每一餐我真係食到有飽我先收手架！

下星期五就輪到去私家覆診，呢次好關鍵，因為可以知道究竟係 BB 唔吸收，定係母女都唔吸收。



2013 年 8 月 2 日 (星期五)

@ 32W6D    私家產檢

今次去私家好緊張呀，因為即將開估 BB size 正唔正常。

我記得睇過 d BB 會資訊，我呢個週數 BB 應該要有 4 lbs 或以上。

今日見到黃醫生時同佢講晒健康院所發生嘅事，佢叫我唔好擔心，其實我 BB 嘅 size 一向都係中碼 B，唔洗刻意谷肥佢。

安慰完我就去照超聲波，黃醫生幫佢度晒頭圍，肚圍等等等等，叫我唔洗擔心，因為 BB 有 4 磅 12 安士，佢有長大到呀，所以叫我放心，仍然係中碼 B 一個。我順便問埋黃醫生如果推測落去，BB出世會大約幾重，醫生話估計有 3.3kg，即係 7 磅 2 左右。OH!!!! 我其實好希望 BB 出世唔好過 7 lbs，咁樣我會易生 d。雖然我明白私家嘅數據未必 100% 準確，但係我估冇十足都有 8 成啦，所以我終於放下心頭大石。而且我怕 BB 太大舊，決定今日開始隔日食烚蛋，隔日飲鮮奶。視乎下一次返私家覆診就知有冇成效。yeah! 我可以開始慢慢遠離日日食烚蛋 + 鮮奶嘅日子啦！

BB 請你繼續乖乖，每一次見醫生都要有體重增長，咁先係我嘅乖女！

大肚相拍攝日 @ Fab Studio (32W1D)

2013 年 7 月 28 日 (星期日)

@ 32W1D

終於嚟到拍攝大肚相嘅日子啦，尋晚再度一度個肚圍，唉，都仲係細.... 得 35.5"，不過可幸就係無論身型同埋個樣都係同未有 BB 時一樣，冇腫冇脹，所以個肚細少少都可以接受。

先介紹一下我帶咗 D 咩道具去影相先：

(1) 黑白 Bra Top 各一



呢 D 係街邊貨，one size，諗住實無死啦。點知買完返屋企之後一試上身，嘩，唔通真係第二度發育？好緊好緊，直情有著唔落嘅感覺。結果都係帶定去影相，但係就著由 Studio 提供嘅 bra top。不過為咗衞生關係，我裡面都著咗私伙嘅 bra bra。

(2) BB 鞋仔 x 2

正確嚟講其實呢兩對係袜仔而唔係鞋仔。
左邊嗰度係朋友 Y 送，右邊嗰對係我買比 BB。收到朋友 Y 呢對鞋仔時我覺得好 cute，嗰陣已經打算帶去影大肚相啦。而右邊嗰對係我無心插柳下買返嚟，同樣覺得好 cute 好 cute，二揀一揀唔到情況下，兩對帶晒去！好彩 Fab Studio 嘅攝影師好好人，兩對都有份上鏡，無浪費到！

(3) Speech Bubble

 

Speech bubbles 都係上網做 research 時先有呢個 idea。Dad To Be 同埋 Mom To Be 一定係唔少得嘅字眼，而 coming soon 就係臨時加落去，亦要多謝我嘅靚靚弟婦幫我上網搵到個搖鈴，我覺得好靚呀，所以諗都冇諗就決定同埋個搖鈴。

我嘅 speech bubble 做法好簡單，只係用 A3 紙 print 出嚟，然後去文具店買幾塊 card board，當然要厚少少啦。然後一輪剪剪貼貼嘅功夫，都係小手工。雖然手勢就麻麻，見到好多膠水痕.... 剪口又唔齊，不過相信影出嚟唔覺眼啩。

(4) Mc Donald 新年生肖公仔

呢三隻公仔對我好有意義。
話說當我知道我 bingo 時就係農曆年前。當時同歐陽生講我有咗 BB，我記得佢嘅反應並不是太大，當然呢個亦係我預期之內，因為佢係無論任何時候都可以保持同一個樣，-_-"
點知有一日我一起身，見到枱面上出現咗呢三個生肖公仔，再收到歐陽生嘅 whatsapp，佢話呢三個公仔係代表我哋一家三口，唔知點解嗰刻我覺得好 warm 好 sweet 呀。從此以後歐陽家就多咗一條蛇啦，^^
咁 sweet 嘅記憶，點可以唔帶埋呢三個公仔去？雖然影相時好似幫 Mc Donald 賣廣告咁，不過我一 D 都唔介意。

講完道具，就講返當日拍攝嘅花絮。

記得去到之後攝影師先同我哋粗略講解一下大致會影 D 咩相。我記得攝影師講咗幾次話影「老土相」，我好奇怪點解會咁樣向客人 present？原來.... 佢係講緊「露肚相」，只不過當時環境有輕音樂，加上女攝影師嘛，講嘢唔係粗聲粗氣嗰種。

輕輕介紹完後就 show 比佢睇我哋帶咗咩道具，然後我就先去揀衫，化妝及整頭。妝容方面一定以簡單為主，由於我幾輯婚紗相都係曲髮，所以今次大肚相我想用直髮。服裝方面就先影白色 bra top + 白色短裙仔，爸爸就著淨白色恤衫。

影到咁上下，有一個環節係爸爸喺媽媽個肚皮上畫畫，當然啦，冇 idea 可以選擇唔畫。我一早知道有呢個環節，所以早於 book 影相時已經同歐陽生單聲。佢一直都話想畫一對腳板仔...

影咗幾幅後，攝影師好好人。佢話要抺走啦，如果想留念就用手機影低，所以我哋就影低咗（雖然未至於凸肚臍，但係我覺得唔美觀，所以歐陽生幫我遮住）。

之後就換返條白色長裙，上身不變。
下一個造型就係黑色。我仍然揀咗黑色 bra top + 黑色短裙，爸爸就換黑色衫襯返。
再下一個造型就係玩飄紗啦，媽媽可以揀兩種顏色嘅紗，我揀咗薰衣草色 (配白色 backgroud) 及紅色 (配黑色 background)。呢個時候歐陽生開始同人玩熟咗就喺度搞搞震無時停，我已經冇佢咁好氣！！！仲拎埋人哋條紗嚟玩！



影影下紗，歐陽生突然出聲問我：你唔係話想影 sexy 相咩？其實呢件事我一直都記得，不過見攝影師冇問，唔知點解我又怕醜冇講喎。好在歐陽生出咗聲，攝影師聽到就問我：媽媽你係咪想影 D sexy 相？我就梗係扮傻啦：係喎，唔記得咗講添。。。

其實所謂嘅 nude photo 只係 nude 上身。攝影師教我擺咗幾個 pose，喺黑色 background 前影咗幾張。最感動就係連歐陽爸爸都自動除咗上身衫陪我一齊豁出去，突然好有朱茵同埋阿 paul 嘅 feel，XD！

影完 nude photo 後就係最後一個造型啦。攝影師比咗好多好多裙我揀，有長有短，有 casual 有晚裝款，大大話話有十幾二十套。呢 D 選擇問題當然由歐陽生幫我話事，佢揀咗以下呢三件比我試，每件都有偷影一張：

 

結果我仍然揀咗藍色，雖然我知道我 d 婚紗相已經有好多藍色晚裝，而我擺酒當日都係以藍色晚裝嚟送客，不過藍色好似真係特別襯我....

影埋呢條藍色裙後，當日嘅相已經全部影晒啦。攝影師話一星期左右會收到所有相嘅 preview，短短 1.5 小時已經影咗 18X 幅。到時可以上網慢慢揀相，收到相後再 share 出嚟啦。

對 Fab Studio 結論及影後感：

無論化妝師及攝影師都好後生，雖然佢兩個把口都話自己唔細... 而且環境舒服，佢哋亦好照顧大肚媽咪，全程有講有笑。好似歐陽生呢 d 咁搗蛋嘅客人想點影點影都有商有量。而且提供嘅服裝都算唔錯，只要唔好介意唔係全新同埋倒模式制作，基本上真係帶個人出現就可以完成一輯相。

至於佢嘅收費，我知道坊間仲有好多比 Fab Studio 更平嘅攝影公司，不過有時講求 feel 嘅，我個人認為 Fab Studio 係我想搵嘅 feel。

另外有一個極大嘅遺憾就係。。。。。。。。。。。。。。。。。。。

歐陽生當日唔記得戴結婚戒指！！！！