呢 d 係咩同事?

2008 年 8 月 28 日（星期四）

話說公司今年有新動作，就係做批股，即係 Open offer！成間公司得我一個係 co. sec.，正常嚟講乜叉都要我做晒架啦！本來都已經夠晒忙架啦，點知 Belinda 又嚟激一激我，好似驚死我唔識發火咁！

啱啱請咗假影完婚紗相返嚟，其實已經有好多公司文件堆積晒要我去做，d 電話又響個不停，根本都冇自己時間去做嘢，我連 msn 同埋上網都停玩咗幾日呀！喺好忙好忙之際，電話響...... 係 Belinda 嘅 internal call，我 pick up 咗個電話之後，聽佢講咗一連串嘅開場白後，佢問我：「你有冇 d 咩公司嘅 stock code 佢哋都係做 open offer 而又有 prospectus sample 睇架？」

我：「冇喎，今次份 circular 同埋份 prospectus 都唔洗我 draft，係由 Assess Capital 同埋 P.C. Woo 負責吖嘛，所以我都冇做 research！」

Belinda：「哦...... 咁呀...... 因為 Mandy 要做 d 嘢交比人呀，咁佢又想搵 d prospectus sample 參考吓，所以想問吓你有冇幾個 stock code no. 可以比佢啫。咁...... 好啦，我問吓 Deloitte 有冇啦，咁你問吓 Access Capital 嗰邊有冇呢類 no. 可以比我哋呀。」（補充：言語間 Belinda 嘅態度係好老馮嗰隻，仲好似命令我一定要幫佢打電話問咁！完全唔會講：咁你可唔可以幫我 xxxxx 之類嘅說話。）

我開始有 d 唔耐煩，宜家算點啫？命令我做嘢呀？你邊位呀？打電話問人之嘛，點解唔可以自己打呢？我幾時做咗你嘅秘書？又幾時做咗公司嘅公關 PR 呀？之後我答佢：「吓？點解你哋唔自己打電話去問呀？」

我講完呢句說話後，好明顯聽得出 Belinda 有 d O 咀，或者佢估唔到一向淋善嘅我竟然會反抗！佢有少少口窒，然後竟然答咗一個令我笑爆咀嘅答案：「咁...... Mandy 忙吖嘛！」

嘩...... 真係慶到爆呀！難道你認為我呢排好得閒？難道全公司得 Mandy 一個忙緊？你哋個 department 乜都係最重要／最緊要，其他 department 就係配襯！！！

所以我都不甘示弱咁答佢：「Me too 啦，我都好忙喎！」

之後 Belinda 就答：「咁我哋冇同 Access Capital 聯絡開吖嘛！」

我聽到呢個答案之後，我仲激氣...... 我忽然明白啦，oh...... 原來冇聯絡開陌生人的話，係可以搵其他同事幫手做嘅，咁即係話自己永遠都唔需要有第一次，踏出第一步去搵人啦！咁做 sales 的話死得啦，做 cold call 嗰 d 都死得啦？

不過最後我都幫咗佢呢個忙打電話比 Access Capital 問嘢，但係我今次咁明顯地反抗係好想話比佢知，全公司上下其實都為今次嘅 open offer 忙緊，雖然我明白你哋會計部對於一間公司嚟講係好重要，但我認為相比起我嘅 company secretarial department，我都唔輸蝕囉！你試吓我幾日唔返工吖啦，睇吓你哋 d 嘢喺邊度搵返出嚟？我嘅 department 就好似一個圖書館咁，我所有文件都齊晒咁滯，d 董事簽過乜我都有 copy，連同我唔太 "啦更" 嘅 shipping documents 唔知點解我都要 keep！好明顯全公司當咗我係水魚，所有文件都比一個 copy 我，咁有人問起上嚟或者發生起事上嚟都仲有我做後備。

其實我今次反抗當然唔係衝住 Mandy 而嚟，我當然唔會怪 Mandy 啦，成件事跟本唔關佢事，係 Belinda 無端端惹起我把火...... 每次講起佢我就火都嚟埋！

真係搞笑，咩叫「無聯絡開」？咁係咪如果有一日我辭職唔做的話，因為你哋冇同某某公司聯絡開，就特登要我幫你打個電話？凡事都有第一次架啦！烚吓烚吓！況且...... 我係公司嘅秘書，而唔係你哋任何一個人嘅秘書囉，唔係搵董事簽個名，打個電話都要我幫你呀？咁洗唔洗要我同你 r 埋腳趾呀？發神經！

不過 Belinda 依然唔憤氣！！！食 lunch 時佢睇到 d 過期報紙報導奧運閉幕，於是佢就問我：「宜家冇奧運睇你會唔會好失落呀？」

我：「吓，無喎，呢個星期都冇時間睇電視！」

今次輪到佢不甘示弱：「唓，你都係呢兩日忙啫！有冇咁誇張呀？」

我都唔輸蝕咁話：「哼！我預計成個 9 月都仲要忙喎。」

Belinda（顯示唔相信嘅表情）：「有冇咁耐呀？乜唔係過埋呢兩日就忙完咩？」

我：「你真係唔知啦...... 出完 circular  之後仲要有好多文件及手尾要 follow。」

佢覺得我作大，所以叫我舉例。我理直氣壯：「過埋呢兩日後仲要做 prospectus，要寄 EAL，PAL，要搞退票比股東，要申請新股上市，要做文件註冊，要開股東特別大會，要執 verification notes，要做會議紀錄，仲有中期業績我掂都未掂過。」當然仲有數之不盡嘅濕碎嘢我冇講出嚟啦！之後 Belinda 梗係冇聲出啦，大佬，我唔係作大架，呢 d 嘢真係要做架！結果 dead air 咗一陣...... 呢個時候公司電話響，係 董事之一 Lawrence 搵我，問我攞返數個月之前出比中國銀行嘅一封信（嗱，我都話我個 department 係圖書館嚟架啦，寄過乜信我都有 copy），ok，食完飯之後就比個 copy Lawrence 啦！之後 Mandy 就問我：「係咪 Lawrence 呀？佢問你攞中國銀行封信呀？」

我點頭。

Mandy：「頭先佢搵過你架，不過你個電話不停響，都駁唔到比你聽，後來佢搵咗我，講低咗叫我幫佢問你攞，但係我見你一路都好忙，都唔敢問你攞住。」

我聽到 Mandy 咁講，個心即刻諗：「Belinda，see？Can you hear what does Mandy say？等你仲以為我好似好得閒，仲以為得你一個最忙吖啦，連 Mandy 都知我忙呀！」其實 Mandy 咁講係冇心架，因為佢根本唔知我今朝咁樣反抗 Belinda，所以 Mandy 呢句說話真係夠晒殺傷力，足以令 Belinda 冇再出聲啦！

有時真係覺得自己唔好再太淋善，尤其是對住佢！！！我要銘記於心！