我公司有一個老細，好幾個高層......
其實我本身諗住到咗出年先話比佢哋聽我 11 月會結婚，不過今日喺毫無先兆嘅情況底吓已經通咗天 lu！到宜家我都唔知發生咩事架，自問一向喺工作時間睇結婚嘅嘢都睇得好低調，從來冇穿過煲，不過我懷疑今次應該係岑太漏咗口風比老細知囉！
話說有一日，我要拎份嘢比 Raymond check，之但係佢咁啱喺老細房同埋 Patrick 一共三人傾緊嘢，基於份文件都幾急架，所以我都照走入老細房比份文件 Raymond 睇。Raymond 睇緊，咁我就企喺側邊等佢 comments，全間房計埋我四條友唔知點解一齊 dead air。之後老細就問我：「Jenny，你幾時結婚呀？」
「er...... 吓？咩呀？」
「問你幾時結婚呀？」
「um...... 做咩呀？」
「冇，有人話比我知你出年結婚之嘛。」
「咁...... 有咩問題呀？」
「冇問題，問下你之嘛！」
Patrick 插咀串串貢：「Jenny 大個女啦！」
我問老細：「邊個話你知架？」
老細：「冇呀！出面 d 人講之嘛！」
我心諗：「老細，你咪當我傻婆啦，出面邊樹有人會同你講呢 d 呀？不過我自己會估應該係岑太同佢傾開計時講咗比佢知囉！」
咁都好嘅，一日之內老細，Raymond 及 Patrick 都知道我出年會結婚，咁我就唔洗諗點開口同佢哋講啦！只不過係比預期早咗 d 知道啫～
P.S. Raymond 知，等於 Brian 遲早都會知！
然後又有一個星期六......
我趁放咗工未走得時上法國婚紗個網頁睇衫，點知原來 Lawrence 喺我後面行過，佢行路都冇聲嘅...... 佢話：「咦，睇婚紗喎，幾時結婚呀？」
我嗰一刻逃避冇答佢個問題，只係反問佢：「你又知呢件係婚紗？」
佢反駁：「哦，咁你當我無知啦，唔通呢 d 係晚裝？定係普通去街衫，出街都著得呀？」
我就有 d 面懞懞咁 hea 過呢個 topic 就算！雖然我冇承認我將會結婚，不過見我睇得婚紗，都知我好事近啦，Oh...... 又一位仁兄知道呢個消息 lu ~
咁即係話暫時只有 Billy 仲未知...... 呢個易搞啦！咁就遲 d 先講佢知 lu！
沒有留言:
張貼留言