落實大肚相 @ Fab Studio

其實一開始我已經打算影大肚相，幸好歐陽生一向都唔反對。
拎到 approval 後，喺我大約 20W 左右就開始搵資料。
其實搵埋搵埋都有好多選擇，但係就唔諗團購啦。
影大肚相唔同影 pre-wedding，sell 嘅都係溫情、善良嘅一面。
我好想搵 D 好 warm 好 warm 嘅感覺，同埋最好包服裝。
因為我唔想買幾條大肚裙影完相之後又被我打入冷宮，太浪費啦。
徘徊喺 Fab Studio 同埋 House Warming Photo 之間，上網睇埋佢哋 d demo 相，同埋得知 Fab Studio 係包服裝後，就扑鎚咗 Fab Studio lu。

同佢哋溝通過後，有 3 個 packages，我只係列出重點：

(1) $1,800／28 張相／室內 studio 拍攝
(2) $2,200／37 張相／室內 studio 拍攝
(3) $3,800／所有相／包黃金海岸酒店房拍攝 3 小時連 outdoor，亦可選擇返回 Studio 拍攝

歐陽氏夫婦一致決定唔會考慮 package (1)，估唔到歐陽生話 package (3)。
佢話我一生人可能只會大一次肚，倒不如去盡 d，影靚 d。
Well~ 我同意我可能只會生一個，但我冇佢咁豪氣捨得一擲 $3,800 出嚟影相。D 相影完返嚟好大可能又會放埋一邊，所以都係揀 pacakge (2) 好 d。

Studio 建議 32 - 34W 去影，一嚟個肚夠大有睇頭，二嚟個人冇咁腫脹。
但我今日 31W 都仲係 35" 肚，冇嘢睇呀!!!
不過因為之前一早 book 咗 7 月 28 日 (32W) 星期日去影，
距離影相時間仲有一星期左右咋，又唔想因為要影大肚相而特登谷肥個肚，代價好大架!!!

近排加緊搜羅各式各樣嘅道具。完成後下一篇揭曉 =)。

*** 及後知道原來 Fab Studio 由兩位女士負責，我諗著咁少布，影起上嚟會 feel comfortable d。
唔知我夠唔夠膽嚟幾張 nude photo 呢？(大前提：喺繼續冇爆肚紋 and 不太肥嘅情況底下。。。)

Fab Studio：
http://fab-studio.kachaa.com/
https://www.facebook.com/pages/Fab-Studio/160891673941684

驗血糖 + 產檢 @ 28W6D

2013 年 7 月 5 日 (星期五)

又到咗每個月一次嘅會面時間，每次去照 BB 都好雀躍，唔知阿 B 又長大成點呢？

今次要驗埋血糖，其實黃醫生一直都話我唔洗驗。我同佢講過我爺爺係糖尿病過世，宜家有一個伯父有糖尿。而歐陽生嘅 grandma 又係有糖尿病，但係無論私家醫生定係健康院都好，話我唔係高齡產婦，直系親屬亦冇糖尿病，所以我唔係高危 case，就一直就唔洗我驗血糖。不過自己知自己事，自從 Bingo 以嚟我只係初初係威係勢戒過甜食，3 個月後知道 BB 比較穩定，就故態復萌，直至今日我都仍然袋住朱古力喺手袋，所以我一直都擔心自己中咗招都唔知。同醫生及健康院反映過，佢哋只係拋低一句：咁你食少 D 啦！唓，鬼唔知咩.... 就係忍唔到口。後來不斷同黃醫生講，佢就免為其難咁講：如果你真係咁擔心，下次返嚟產檢幫你抽一支血驗下啦。搞到我好似迫佢同我抽血拎去化驗，XD！

今次睇醫生嘅時間係 12:15，我專登喺見醫生前幾日仍然 keep 住自己食零食嘅習慣，務求得出最準確嘅結果。不過好衰唔衰，當日因為我請咗上午假，自然訓到好晏先起身，見睇醫生時間係 12:15，可以先食一隻烚蛋 + 一包奶，睇完醫生就食 lunch。醫生話我今朝食咁少嘢就去抽血，一定 pass！咁就真係好 on 居，無啦啦 side 咗個機會添！

到咗照 BB 時間，阿 B  時大時細....
記得上兩次去照超聲波，因為嗰排狂食芝士 (雞蛋同奶仍然繼續），BB 大咗 3-4 日。
對上一次去照，因為食晒 D 芝士冇再入貨，BB 細咗兩日。
到今次.... 又食返芝士，醫生幫我哋度咗阿 B 嘅頭圍、肚圍、脾圍，普遍都比正常週數大咗一日。
唔通芝士有助長胎？

後來醫生又話 BB 屬中碼偏細，排名 5X <--- 呢個排名唔知係咩意思，有經驗媽媽請指教

雖然話佢中碼偏細，不過我又好樂觀...... 細，代表我易生 D，痛嘅時間應該會短 D，好嘢！其實 so far 我只係 34" 肚，人哋媽媽 7 個月，我又係 7 個月，但係我個肚真係偏細。不過我覺得細有細好，起碼我宜家仲健步如飛，一條肚紋都未有 (連嗰條妊娠中線都未有)，希望可以 keep 到生都未有任何一條紋！

到咗照 4D 時間，BB 又一次好合作可以影到佢嘅大頭寫真，^^

照嘅時候咁啱阿 B 喺度食緊右腳腳趾...... -_-"

連黃醫生都好興奮，其實我未見過一個醫生照超聲波照得咁 hyper，佢仲 hyper 過我哋做家長嘅.... 佢話：
「嘩，你睇下，乜有 BB 咁嘅 pose 嘅？」(因為當時阿 B 成個身對摺咗)
「嘩，食腳趾喎，o雪一聲食咗喎，你哋見唔見到呀？咦呀～～～」
「嘩，你哋睇下，呢個角度影到晒佢個樣，睇下，幾清楚！」

我知。。。。我睇到。。。。搵佢做產檢真係好好笑！

BB，我哋一個月後先再見面啦，你暫時乖乖地繼續住喺我個肚入面先啦！

離開咗診所，再去護協買咗少量用品，包括棉花球、思詩樂濕巾、爽身粉等等。再去超市買埋 huggies 濕紙巾，所有嘢都預備得 8899 啦！

*************************************************************************************************************
2013 年 7 月 11 日 (星期四)

收到黃醫生診所電話，講返個血糖結果比我知。果然不出我所料，以我當日所食過嘅嘢，血糖指數又點會高吖？

正常 range：3.5 - 7.2
我嘅指數：4.9

以我平時咁樣食甜嘢法，根本冇可能咁低囉...... 唉，算啦~ 仲有兩個月，加油努力戒口吧啦！