呢一個禮拜過得有少少寂寞。
男朋友尋晚（星期六）要加班，我起初都唔知情，仲特登放棄去做 facial 而去買餸煮飯及煲湯過佢飲。嗰煲湯煲咗兩個鐘，到大約 7 點幾先收到佢電話話今晚返唔到嚟陪我食飯，仲可能遲返添，結果我就食咗一盒朱古力餅乾就做咗我是晚晚餐啦！
今日（星期日），男朋友一早就要起身返工，我雖然繼續搵咗郭富城陪我渡日，不過都好似特別寂寞。下午 6 點幾，再次收到男朋友電話今晚仍然返唔到嚟食飯，仲唔知幾點先放得工，叫我唔洗等佢門添，咁耐以嚟呢 d 情況真係少之有少。既然係咁，所以尋日買落兩個節瓜加三個蕃茄，仲浸咗 d 粉絲，醃咗 d 瘦肉，睇嚟要繼續留過夜，留到嚟緊嘅 1/10 假期先食咗佢啦，希望到時未變壞啦！
*************************************************************
前日臨收工之前收到 fans msn 通知，Aaron 隻演唱會 DVD 將會喺下個星期二（30/9）上市啦！而且仲將 2007 及 2008 兩個演唱會分開出，實在太好啦！
由於實在太希望快 d 到 30/9，而且呢幾日又不斷聽住演唱會嘅 CD，簡直就係郭富城上腦，所以尋日卒之忍唔住返到屋企之後拎咗隻 2000/2001 Live on Stage Concert 嚟睇，之後喺沖涼前及上床後又繼續聽我嘅戀愛 1/2，真係超超超鐘意呢個廣播劇！
第二朝早訓醒，第一件事係熄冷氣，第二件事就係拎部 ipod 出嚟又繼續聽，Aaron 喺套劇入面真係好深情，把聲又好聽，哈！
宜家已經係 3:17，不過我打算繼續要郭富城充塞住我，所以我一陣會睇碟！暫時未決定睇 d 咩好，睇一變傾城演唱會？睇 2004/2005 嗰個舞林寶典演唱會？睇佢拍嘅戲 DVD？唔知，總之係 Aaron 就得，鬼叫男朋友今日要返工咩！
所以我封咗呢兩日叫做我嘅郭富城日，哈！
如果真係喺 30/9 出演唱會 DVD，咁 30/9 就係買碟日，而 1/10 並唔係國慶日，係煲碟日！正如 Rachel 話齋，人哋 1/10 就煙花耀國慶，而我哋呢班 fans 就 Aaron 耀屋企！
沒有留言:
張貼留言