2008 年 8 月 30 日（星期六）
一早收到歌迷會通知 Aaron 會喺呢一日去到澳門威尼斯人酒店開始巡迴演唱會第一站。比著以前嘅我，我真係唔會點理會，因為我以前冇咁瘋狂架！但係自從 2005 年再次迷上佢之後，再加上識咗好多好多歌迷會內內外外嘅瘋狂 fans，感染埋我添！見澳門咁近，加上岑太又係威尼斯人 VIP，就試吓搵佢搭路，睇吓拎唔拎到靚位都好吖！點知，上天咁眷顧我喎，竟然有靚位（第六行），岑太仲包埋我同男朋友威尼斯人酒店房一晚加去程船飛添，今次係個天叫我要去，我當然唔會逆天而行啦！所以就約埋阿 Pat 及男朋友出發啦！
當晚個 show 話就話 7:30 開始，我都知佢唔會咁準時架啦！不過因為未試過去澳門睇 show，唔知佢哋係咪真係咁準時開始，避免 miss 咗一分一秒，我同阿 Pat 梗係超超準時入場等睇 show 啦！仲準時過平時返工添呀！
其實個 show 都冇乜特別，基本上個 rundown 同香港嘅係一模一樣咁滯，又一樣係四面台咁，不過就算佢完全一樣都好，我呢個 die hard fans 都會去支持佢架！
講開 rundown，唔知係咪因為有好多豪客喺威尼斯人睇 show，怕得罪佢哋，所以 cut 咗水花舞林一幕！呢一 part 基本上係全個 show 嘅重心，好 cut 唔 cut 偏偏 cut 咗呢 part，唉，算啦，喺香港都玩咗咁多場，放過你啦！
最最最美中不足嘅就係喺 Aaron 玩鋼架嗰 part 時，做一個類似湯馬斯盤旋嘅動作時失手，好在佢有一對強而有力嘅臂彎，咁先冇跌落地咋！我同 Pat + Vi + Emily 當堂尖叫咗出嚟，仲差 d 想衝上台扶佢咁滯呀！好在佢最後都冇咩大礙啫！
今次坐第六行，雖然唔係正面台，不過佢個場嘅保安就非常之鬆懈啦！佢個場每五行就有一條闊少少嘅走廊位！我哋坐第六行，咁啱就係新一個 section 嘅開始，我同阿 Vi 呢類 fans 當然會好好運用呢條走廊啦！由於我哋已經背熟晒佢個 rundown，當晚有咩 e 郁，我哋都即刻衝出去 T 字台嗰邊狂影相，仲可以近距離咁見到 Aaron 添！而且我仲握到手添呀！今次真係要多謝岑太比個咁前嘅位我，Yeah！
呢間房就係我哋住嗰間威尼斯人酒店房啦！地方係超超超大！
不過我雖然睇得好開心，但係都真係難為咗男朋友，佢冇得睇 show 之餘仲要自己一個孤零零消磨時間，佢仲好好咁買咗好多朱古力比我食，超抵讚！！！
有 surprise，男朋友偷偷地買嘅朱古力，賣成 $3xx 架！
仲有一條好巨型嘅三角朱古力
第二日仲去咗食聞名澳門嘅豬扒飽，葡撻，買埋手信，去咗漁人碼頭等等！全個旅程滿載而歸！
沒有留言:
張貼留言