入正題。。。
2013 年 9 月 14 日 (星期六)
@ 39W0D
已經放咗一星期產假，一直都好想快 D 生得，咁之後就可以有多啲時間陪 BB。點知佢真係好乖女喎。。。
今朝如常訓到 11 點多起身，去個小便時一抺發現見紅，當時除咗見紅外咩作動反應都冇。之前上網睇過，淨係見紅入院的話，如果仍然冇咩生產跡像，係會比醫院踢走，所以我都唔緊張住，打算睇下晏少少點先再算，但係就已經即刻打比老公同埋媽咪通知聲佢哋。
隔咗一個鐘再去小便，仍然抺到有血喎，再打比老公，老公叫我不如入院，有咩事都有人睇住，最壞嘅結果都係食詐糊啫。我見連續兩次小便都抺到有血，入院就入院啦。之前一早夾好咗，萬一我作動，歐陽生返咗工的話就由媽咪陪我入院。我打咗比媽咪，佢話即刻上我屋企，我就叫佢買埋個飯盒比我。收咗線後就先去沖個涼洗埋頭 (穿水的話就唔好洗頭，因為會有機會細菌感染架)，媽咪上埋嚟食埋個飯就搭的士向屯門醫院出發，當時大約中午一點啦。
去到醫院我可以直上產前房，辦好入院手續我就開始做一大輪檢查。由於過咗探病時間，媽咪送到我去產前房之後就要離開啦，要等下午 5:30 再可以過嚟。可能緊張啦，做檢查時度到我血壓偏高，要度兩次先合格。驗小便又驗到有問題，姑娘一望到張試紙就問我係咪啱啱食過嘢，可能因為咁影響咗個測驗結果，幾小時後要再驗多次。其實我有啲擔心架，因為陀 B 咁耐，我血壓同埋小便一向都冇事嘅。
安頓好我張病床後先駁機聽胎心跳，姑娘話我一度都未開，其實我都預咗，點會咁快有反應吖。聽胎心聽咗足足一小時，因為駁晒機，期間唔可以落床，其實都幾悶。一小時過去後又要我驗多次小便，好彩今次冇問題。
其實一直都有小小肚痛，不過一啲都唔規律，有時 10 分鐘痛一次，每次 30 秒，有時就半個鐘都唔痛喎。如是者捱到 5:30 探病時間，老公同埋媽咪都嚟探我，不過我仍然咩動靜都未有，醫生話宜家唯有等，因為幾時生得唔係我話事，係肚裡面嗰個話事。當晚，老公知道我會好驚，因為咁大個女第一次訓醫院，所以佢全晚喺產房走廊等消息，而我就不斷同佢 whatsapp 解悶。第一晚其實都唔係好訓到，因為隔離床有個媽媽作動，佢成晚喺度好大聲咁嗌，加上我又八卦想睇下作動要點樣應付，所以我根本冇覺好訓。朝早一搭正 7 點我可以離開病房時，我即刻出去搵老公，同佢傾咗陣叫佢返屋企訓，因為我仍然只得不規律陣痛同埋見紅，自知應該唔會今日生得。
第一日住院就咁過去。。。
~~ 待續 ~~
