郭富城舞林正傳演唱會 3 CD @ 出咗啦！

2008 年 9 月 19 日（星期五）

晨早收到風話 Aaron 隻演唱會 CD 會喺今日上市，原本都唔信架，因為小美工作室嘅消息都唔係太準，成日都有遲冇早！見今日咁啱出旺角食飯，就即管去睇睇，點知真係出咗喎！今次咁準時嘅，跌眼鏡添！

嘩，真係超靚！仲有雙封面添！初時以為佢兩個封面都出，點知原來係底面封面唔一樣咋喎！咁仲好，有買嘅 fans 可以擁有晒兩個樣嘅 Aaron！

之不過，我就冇買到呢隻 CD 啦！因為我成日都覺得買 CD 好似冇咩意思，又冇畫面睇，唔足以滿足到我喎！我嘅 target 係 DVD，所以我死都要忍手等 DVD 出咗先仆去買！有 fans 等唔切已經打咗電話去大國文化問隻 DVD 幾時出，大國文化話 9 月尾喎！好，又再等吓先，等佢出碟都等咗半年啦，都唔爭在嗰幾日啦！

唉，不過我唔買 CD 都不特止，仲做咗一樣好衰女嘅事！最衰都係古裝囉！無啦啦引人，話比我知佢 download 咗成隻碟嘅 mp3，又問我要唔要（佢同我都一樣 target 買 DVD）！唉，見討論區個個都開始講呢隻碟，加上心急嘅我點可以忍到 say no 吖，所以用咗一日嘅時間就收晒古裝 send 比我嘅 mp3 files，sorry 呀 Aaron！我知道對你係唔可以咁做架，所以我宜家已經好積極咁諗緊究竟買唔買返隻 CD 好！不過我可以向你保證，d mp3 我一定唔會再 send 比第二個，我要保護你嘅收入來源架嘛！

今日收晒 d mp3 已經忍唔住成晚開住部電腦嚟聽，一路聽，d 畫面就一路浮現返出嚟！諗起當時我哋點樣尖叫，點樣為你歡呼，點樣好失儀地嗌你個名，點樣同你玩水等等，真係好好好想快 d 出 DVD，等我可以望埋你個樣！

聽到最尾，個人好 down 呀！因為你不斷強調你要 4 年之後先再開演唱會，唉！喺 last show 完 show 之後，我哋個個 fans 都唔願走，要你 2nd encore 呀！今次嘅 encore 我真係超級深印象！因為係我睇完林憶蓮一篇演唱會報道，話佢 d fans 都好唔捨得佢完 show，留低嗌返佢出嚟！我當時純粹諗住睇吓可唔可以安排到一模一樣嘅事發生喺你個演唱會上面，結果就喺香港討論區阿皇國入面集合 fans 嘅力量，雖然大家當晚都坐得好散吓，不過大家都好盡力叫返你出嚟，我真係超超超開心！因為我知道如果你唔出返嚟，我哋就真真正正睇住你由舞台退落嚟，好唔捨得架嘛！估唔到你真係出返嚟，仲唱多三首歌，當時嘅我已經喊到豬頭咁啦！2008 年嘅延續篇仲衰，本來已經改咗唔唱臨行，變咗首中板歌這夜心情做閉幕曲，我嘅心情應該容易 handle 好多，不過尾場 2nd encore 時你又再唱返臨行，臨行呢首歌一向係我嘅死穴，你一唱，我一定喊！結果我不負眾望吖，我啦，samantha 啦，jojo 啦，sumsum 啦，個個都喊，你開心啦？

頭先聽到呢一段，又想喊......

原來當初 Aaron 冇諗住完 show 後出返嚟架！係我哋不斷歡呼吶喊佢先再上台！係我哋改變咗佢嘅諗法！而呢個行動係我諗出嚟架！真係超級值得紀念！

老公，多謝你教曉我，當我鐘意佢時就要把握時間多 d 去支持佢，否則第時要後悔就太遲啦！亦都好多謝你咁支持我去支持佢～ 起碼唔會覺得我仲好似細路女咁迷偶像！若果唔係因為你嘅支持，我諗我呢一生人入面唔會有呢 d 片段，唔會同 Aaron 一齊有呢 d 回憶！唔會記得原來我係一次無心嘅 fans 集合行動中，竟然叫得返 Aaron 出嚟 2nd encore！