2008 年 9 月 30 日（星期二）
佢終於捨得出碟啦！！！！！
由演唱會延續篇完結嗰日開始直至今日，等小美工作室幫 Aaron 出 DVD 足足等咗 7 個月，呢一日終於蒞臨啦！我諗，我條頸足足長咗 n 吋......同期好多 artist 都已經出晒碟，但係偏偏 Aaron 呢隻要人等咁鬼耐，討厭！
呢一個男人，一個我鐘意咗 17 年嘅男人，我記得我第一次鐘意佢時係 1991 年，當時我只得 9 歲，讀緊小學三年級，由嗰時開始，我已經一路咁支持佢，直到今時今日。
我對我自己比佢嘅支持有少少執著，為咗證明我有幾咁支持佢，從來只有佢嘅演唱會我先會買飛入場睇（陪男朋友去睇 Kelly 除外），只有佢出嘅 CD 我先會買齊（真係由 1991 年開始齊晒架，錄音帶我都仲有幾餅喺屋企），佢拍嘅戲我一定會買飛入戲院睇然後再買 DVD 以表支持。
呢兩年間佢開咗一次演唱會，第一次叫做「郭富城舞林正傳演唱會」，舉行日期由 2007 年 11 月 16 日至 2007 年 11 月 24 日（共 9 場），然後喺 2008 年又開咗次延續篇，日期由 2008 年 2 月 14 日至 2008 年 2 月 17 及 21 至 23 日（共 7 場），我今次都破晒自己睇演唱會嘅紀錄啦！
2007 年佢開 9 場，我睇咗 3 場（唔算好誇張啫！）
2008 年佢開 7 場，我睇咗 6 場（殊，唔好話比媽咪知！）
鬼叫佢事先聲明開完呢次之後同類型嘅演唱會要等 4 年咩！不過我做得佢 fans 都知，其實今次好有可能係佢最後一次開演唱會！嗱，計一計啦！佢今年都 43 啦，過多 4 年佢都 47 咯，咁唔係即時話開就開架嘛，預多兩年比佢籌備，都 49 - 50 歲啦！雖然我唔會懷疑佢嘅體力，但點都不復當年勇，所以我今次先至咁訓身。況且今次佢自己都有個好大嘅突破，就係嗰個由 360 度增加至 450 度嘅旋轉舞台啦！我好榮幸有份成為其中一個見證人，去見證住 Aaron 呢個一舞台正式列入健力士世界紀錄，成為華人之光！
講返隻 DVD，頭先先話我喺 2008 年延續篇入面睇咗 6 場，而且場場都坐最貴嘅位，仲要每次都坐頭 10 行之內（當然係買黃牛啦）！而且佢今次個演唱會又史無例地玩水喎，我呢 d die hard fans 聯同其他 crazy fans 一齊組織咗一個水槍黨，同 Aaron 嚟個鴛鴦戲水，我哋去足咁多日，連 Aaron，Sunny Wong 及 Aaron d dancers 都認得我哋啦！而且我哋仲非常之唔錫身咁衝出去個台附近同 Aaron 玩水，撞正錄影嗰兩日都不顧儀態咁玩，有一日仲上埋報紙添！今次嘅 DVD 我一定要買，我諗我好多機會會入鏡囉！！！所以如果有興趣買呢隻碟嘅 bloggers，不妨留意吓會唔會見到我吖。
[節錄自 tom.com 新聞圖片]
大家有冇見到 4 支水槍？水槍黨成員總共有 5-6 個。最左手邊 fing 緊條白毛巾嗰個就係我啦！你睇我幾狼死，所以話唔好得罪女人喔，呵呵呵！
其實大家都已經豁咗出去，入得嚟同 Aaron 玩水就唔介意濕晒身走。我哋都已經做咗少少防水措施，就係四條友都著晒風褸，條拉鍊又拉到上喉嚨，不過唔濕少少身又唔過癮嘅...
每一晚 concert 完咗之後，我哋個個水槍黨成員都係咁樣濕住身返屋企！
某一晚同有男朋友陪我去睇，佢都有份玩水添，但大家請留意，佢係無任何嘅防水措拖，佢頂帽當晚係濕晒架！
你睇我哋坐得幾前，第 2 行！！！！！！！係用咗好高價錢向黃牛哥哥買架！
除咗呢 d 記憶之外，其實我仲有實際收獲架！因為喺演唱會中，Aaron 著咗呢件身上釘咗近 3,000 粒（唔知有冇記錯）施華洛世奇水晶嘅衫載歌載舞！
以佢咁樣係咁跳係咁跳嘅舞步，中途跌咗十零二十粒出嚟一 d 都唔出奇吖！由於我熟晒個場嘅位，玩水時周圍走，結果...... 我好有幸地執到兩粒水晶，哈！有賺啦喂！
尾場仲遇到 Sunny Wong，同佢嗲咗一輪，又套吓佢有關 Aaron 嘅資料。佢一見到我哋揸住支水槍就即刻認得我哋，仲問我哋點解日日開 show 都見到我哋添！嗰時真係犀利架！日日放工都仆到入到機場博覽館睇 Aaron，仲勤力過返工呀！支水槍又重，又要每人裝定一支水同 Aaron 玩，都咪話唔辛苦架！臨尾我哋仲恭喜 Sunny...... 因為遲 d 佢都會同佢個 model 女朋友結婚啦！又一位老襯......
沒有留言:
張貼留言