呢排真係比個金價玩死！
話說尋日收市價係 7820，相比起一朝早嘅 7720 升多咗 100，不過我哋係去到金舖門口先知~ 媽咪知道後，我都有問佢仲買唔買，但係佢話一場嚟到，雖然個價升咗 100，不過都可以買少少。既然佢覺得冇問題，我當然樂意去揀款啦！媽咪話今次嘅目標係龍鳳鈪，不過我又唔想買太多／太重住，話晒都仲有可能會跌架嘛，加上上次喺 7900 時都買咗大部份，所以我今次都只係揀咗一對普普通通就算。
其實尋日睇中咗另一對龍鳳鈪架，咁媽咪就信口開河話：「嗱，如果金價跌到去 75xx，我就再買多對比你啦！」聽見媽咪咁講當然好開心啦，不過個心就十五十六，今日唔知聽日事，話唔定聽日就升返呢...... 況且 75xx 好似奢似咗 d 喎，所以我都冇放喺心，仲以為未必有機會買埋嗰對龍鳳鈪。
誰不知，我今日上 esdlife，見到個飾金價 7590！！！
吓？咁我嗰對鈪咪有機會囉？我就即刻打比媽咪話比佢知，佢話既然真係跌到去 75xx，佢就肯買多對比我。所以收線後佢都打去佢相熟嘅金舖，叫個 sales 幫我哋 hold 起尋晚睇中嗰對鈪，不過就要放工之後先可以去找數，但媽咪就要求佢做返宜家 7590 呢個價...... 好在...... 朝中有人好辦事，因為嗰個 sales 係我媽咪個朋友，正常嚟講係唔可以咁樣做，不過呢個 sales 會幫我落住 1/3 訂先，到我放工後再去碌咭比返錢，咁可以儲積分之餘， 又可以 hold 實 7590 呢個價，總算一舉兩得！
好嘢，我今晚就可以帶呢對鈪返屋企啦！Yeah！
講返個金價，呢排真係搞到人籮籮攣，一時狂升，一時狂跌，都唔知幾時先係入貨好時機。其實我覺得仲有成年先結婚，或者都可以再等吓嘅！不過反而心急嗰個係媽咪而唔係我...... 咁都好嘅...... 買埋呢對龍鳳鈪之後，我總算買晒所有嘅金器，以後個金價升定跌都唔係太關我事 lu！我諗..... 呢件係好事嚟嘅！
最近既金價上上落落, 好睇過股市好多
回覆刪除[版主回覆09/13/2008 10:53:00]而且仲緊張過股市好多添呀, hahahaha
umum, 一般黎講，要買幾多件金，買咩金做嫁妝架?? 因為我見大家既媽媽都買好多...
回覆刪除[版主回覆09/13/2008 10:55:00]其實我諗冇一套定律嘅, 不過有 d 金就一定唔會少, e.g. 龍鳳鈪!
其實我諗你 d 長輩都會買比你戴嘅, 不過我媽咪買開, 又驚 d 長輩唔會買比我 (因為我 d 長輩大部份都係好新潮嗰 d), 所以佢就買埋耳環, 頸鍊, 戒指比我啫!