題外話：之前同某位朋友講過我唔會將呢件事寫上 blog，但越諗就越覺得今次係幾得意嘅一件事，所以都係決定寫上嚟，當做比自己嘅一個回憶。朋友仔，我知你會嚟睇我個 blog，希望你見到我呢篇 blog 唔好笑我五時花六時變呀，哈哈！
其實一直以嚟，我都覺得要向公司宣佈自己嘅囍事係一件好棘手嘅事。話說我公司有 4 個位高權重嘅重要人物，點都唔可以派帖時先比佢哋知道小妹要結婚架嘛，所以我一直都搵緊機會向佢哋暗示或者明示一吓。4 個位高權重人士包括 (1)老闆 (2) 老闆娘、(3) 地位屬「一人之下萬人之上」嘅董事總經理（連老闆娘都要俾面佢）我簡稱佢做 Mr. C、(4) 副總經理 Mr. S。
先講老闆娘。小妹嘅老闆娘出晒名對員工好好，尤如再生阿媽一樣，好多同事都會同佢傾心事，甚至女同事 period 遲咗嚟呢 d 咁私人嘅事都唔介意同佢研究研究，相信假以時日，連閨房事都會擺上枱同佢傾。對住呢個咁好嘅老闆娘，我嘅大囍之事第一個就同咗佢講，仲係唔洗兜圈，開門見山嗰隻。
之後講老闆。其實老闆對我哋呢 d 小職員都好好，不過始終礙於身份問題，唔會同佢傾太多嘢。點知有一次我入佢房幫佢做嘢時，佢問咗我一句：「聽講你下年結婚喎。」我心諗：點解你會知架呢？我當時冇直認亦冇否認，只係問老闆：「邊個話你知架？」細問之下先知道原來老闆娘喺屋企同佢傾開計時唔小心爆響口。結果老闆就係喺呢個我唔知情嘅情況底下知道咗小妹嘅囍事。
再嚟講副經理 Mr. S。話說我利用上班時間蒲 esdlife + 睇各位嘅 blog，螢幕上出現各位嘅婚照就少不免，不過 Mr. S 唔會出聲話我哋，因為佢自己都係咁，仲買埋個 Apple 喇叭返嚟播歌...... 你話喺呢 d 公司做嘢，唔秃廢先奇啦，哈！經過多次比佢發現我睇有關結婚嘅嘢，有一次佢終於忍唔住問我：「喂，點解你呢排成日睇結婚相嘅？你結婚啦？」我直認不諱，後來佢連聲恭喜，又問我婚期幾時，買咗樓未，婚後住邊度，去邊度 honeymoon 等下刪數百字...... 睇嚟對我件婚事最有興趣都係佢。
一路都覺得好順利地 4 個裡面已經知會咗 3 個，可惜剩返嗰個 Mr. C 正正係最難搞嘅一個。今日終於有一個大好機會，不過我又錯過咗......
今日我喺公司翻睇自己嘅結婚相（今次係放工之後用公司電腦睇），Mr. C 喺自己房走出嚟，突然喺我個位側邊出現（喂，大佬，點解你行路冇聲嘅？）我已經冇時間 click 走個視窗，螢幕上出現咗數張自己嘅婚紗相。Mr. C 望住個 mon 問我：「咦，你 d 結婚相喎，你結婚啦？」喺呢一刻，本應係絕佳時機向佢直認，點知自己竟然衝口而出：「唔係。」（好衰唔衰當時嘅語氣係講大話 feel）加上 Mr. C 冇花眼架嘛，睇住個電腦 mon show 緊我嘅婚紗相，仲想唔認？於是 Mr. C 就話：「唓，結婚之嘛，結咪結囉，唔洗『唔係』架（扮返我嘅講大話語氣 feel）。」我一時之間做唔切任何反應，由得個電腦 mon show 住我嘅婚紗相，但又冇再認自己真係就快結婚，結果呢個話題喺好尷尬情況下被扯開，之後嗲多兩句就結束埋添。
Mr. C 離開咗後我不斷諗返轉頭，覺得自己真係好蠢，大好機會擺在眼前，點解唔索性認咗佢呢？咁咪一天都光晒囉！！！於是我開始有 d 嬲自己，因為自己一直認為好惡搞嘅事本來有機會搞掂晒，點解要口快快否認咗啫？咁我宜家應該點做好？離開公司後向男朋友求救，佢就認為其實 Mr. C 都知我會結婚，不過我死口唔認佢都冇計，又冇理由當場篤爆我，不過佢認為為咗尊重呢位「一人之下萬人之上」嘅董事總經理先生，我點都走唔甩，點都唔可以派帖時先知會佢本人。
所以，我已經決定咗，我聽日會向佢自首架啦！連開場白都諗好咗，到時我會扮有份文件要比佢簽，簽完之後就會同佢講，希望可以一 take 過啦！
P.S. 或者會有朋友認為我將「向公司宣佈婚訊」呢個 task 睇得太嚴重，不過...... 一間公司唔知一間公司事，有 d 嘢真係唔係大家想像咁易搞，呢 4 位仁兄真係好需要「被尊重」架，所以點都要死一鋪！
請各位祝福我啦......
***********************************************************************
2008 年 12 月 30 日（星期二）
講咗啦，講咗啦，講咗啦！！！！！！！！
頭先趁老闆未返到公司，快快趣趣借 d 意去 Mr. C 間房搵佢簽文件，簽完我同佢講：「其實呢，我真係下年結婚嘅，不過見仲有成年，冇諗住咁快同你哋講，所以我尋晚冇認囉！不過諗諗吓，又覺得尊重你哋要比你哋知，所以......（呢句說話係用咗好耐時間去講，因為途中勁口窒！）」期間我望住 Mr. C，見佢都已經笑咗出口，其實我都知道整個過程一定會好順利，Mr. C 都一定唔會為難我，但係呢 d 嘢，我成日都覺得等人哋發現後問我，總好過我自己主動話比人知。
之後 Mr. C 就話：「咁你尋晚係咪睇緊婚紗相吖？」<-- 佢咁問得，我都知我尋晚當場否認令佢不服架啦，從而大家就知道佢嘅性格係點啦，好似要攞返個彩咁。我冇得避，所以答：「係！」Mr. C 話：「咁咪係囉！」之後我都唔知講咩好，唯有繼續以笑遮醜。之後 Mr. C 就話：「傻啦，大個女啦，結婚好正常，得架啦，我會做定人情架啦！」結果我就面紅耳熱咁返埋位，出返嚟之後成個人震震地，連手都震埋。唔知點解，對住呢位 Mr. C 我真係有 d 怕佢架！佢係有 d 威嚴嗰種，又或者佢嘅性格又真係有 d 似我阿爸啦，對佢真係會有幾分尊敬。我大膽講句，for me，我怕呢位 Mr. C 仲多過怕老闆架！
Anyway，呢件事算係告一段落，暫時都冇咩人係好惡搞。朋友方面，我基本上係毫無保留咁講，或者因為我朋友少，身邊嘅朋友全部都會請咁滯。至於親戚，話晒都係以父母名義請佢哋飲，呢 d 等我父母自行決定幾時講啦！
