揀衫篇 @ 法國婚紗相

唔經唔覺我已經影咗兩輯婚紗相，宜家要準備最後一輯啦！諗起都覺得自己有 d 過份，婚期明明係出年 11 月，但係今年我已經會影晒婚紗相，而且仲要 3 輯都堆埋一齊影！不過咁都好，起碼可以一次過修身，唔洗我修完身、肥返、又修身咁！

嚟緊今個星期五我約咗法國婚紗揀衫影相。其實我會喺 10 月 20 日先影，不過因為年年嘅 9 月都係公司最忙嘅月份之一，法國婚紗嗰邊又一定要我提早一個月揀衫，所以惟有將揀衫日期提前到 9 月初...... 希望我今個星期五試完衫之後，身材唔會有太大嘅走樣啦！

今次係用酒樓嘅 coupon + $2,880 join 嘅，我有 3 個造型，而男朋友就有 2 個。原本諗住其中兩個造型著婚紗（一件著鋼紗，另一件著 A-line），第 3 個造型就著晚裝。不過啱啱上咗法國婚紗個網站睇佢哋 for 影相嘅晚裝...... 真係 O 晒咀...... d 款好唔得！佢總共有 50 件晚裝比我揀，好可惜我只揀到一件，仲要唔算係好好好鐘意嗰種。所以我都諗定後路比自己，萬一嗰件晚裝著咗上身唔靚，又冇其他款可以揀的話，咁我三個造型都著晒婚紗算啦！反正婚紗先代表係「新娘子」，晚裝...... 唯有睇吓遲 d 去 Annual Dinner 嗰 d 有冇得著啦！

今次寫呢篇 blog 其實想各位 blogger 比 d 意見我！我一向都鐘意釘工重嘅婚紗，不過自己影咗兩輯婚紗相後，慢慢意識到其實影相應該揀 d 有層次嘅婚紗，咁影出嚟嘅相先會好睇，唔會白濛濛一遍，而且有層次嘅婚紗其實都幾靚吖！不過我明白無論件婚紗幾靚都好，睇相同自己著上身係會有分別嘅......

我暫時就喺網上面揀咗以吓呢幾件到時試上身。

~~~~~~~~~~~~~~~~~~~ 婚紗 --- 鋼紗型 (10 件揀 1 件) ~~~~~~~~~~~~~~~~~~~

#3804

暫時我揀咗呢件做我嘅首選，貪佢下身夠多層次，不過點都要睇睇實物先知，因為見件衫個背面好件有好大塊嘢咁，有 d 怪怪地！

#3808

次選就係呢件，其實我揀咗嗰 d 全部都係下身有層次。

#3722

#3792

#3791

#3707

#3696

#3615

#3618

#3620

~~~~~~~~~~~~~~~~~~~ 婚紗 --- A-line 型 (7 件揀 1 件) ~~~~~~~~~~~~~~~~~~~

A-line 方面，其實 #3817 同埋 #3717 我都好鐘意，前者又係著重層次，後者係著重 cutting。其實我曾經諗過影婚紗相就著 #3817，結婚當日就著 #3717，不過好衰唔衰又比我見到 d 新款嘅婚紗，多心嘅我又想改變主意，所以我宜家好難做決定呀！

#3817

#3717

唔知係咪 model 問題，我覺得呢件衫好優雅，好靚呀！不過著嚟影相好似會浪費咗件衫，不過...... 還掂都係試吓上身之嘛，又冇限我試幾多件，咁我揀咗先，到時試咗上身再諗。

#3826

Again...... 唔知又係咪 model 問題，cutting 好靚，不過略嫌白雪雪咗 d，影相會冇嘢睇！咁...... 定係留返結婚當日先著好呢？唔理三七廿一，試咗上身先算！

#9043

呢件都 ok，不過相比起上面嗰 d，呢件好似失色咗少少喎。

#3835

以下呢 3 件都係 cutting 多於款式，我諗比較適宜結婚當日先著，不過試吓冇蝕底嘅，哈哈！

#3813

#3818

~~~~~~~~~~~~~~~~~~~~~~~ 晚裝 (3 件揀 1 件) ~~~~~~~~~~~~~~~~~~~~~~~

晚裝呢一 part 真係慘不忍睹，我只係睇中咗一件，萬一如果嗰件著上身後唔好睇，我諗我整輯婚紗相會清一式著晒婚紗算數！好在佢外租嘅晚裝靚好多好多倍，否則我真係唔會 join 佢租衫！

#2721

晚裝我淨係鐘意呢件紫色咋...... 不過其實都唔算係好好好鐘意嗰種。而且紫色影出嚟唔知會唔會唔夠 sharp 呢？

#2722

呢件好一般...... 我諗都多數都唔會揀，可能到時連試都唔會試！

#2752

呢件更加唔洗講，中間好似比人熨平咗咁！好在嗰幅細嘅全身圖靚返少少，不過我估自己最後都未必會揀呢件！

睇完晒 20 件衫，其實當中有冇話邊 d 款好 d，邊 d 款又切忌揀呢？