禮品總匯 @ 美麗佳人

美麗佳人個 plan 包咗以下嘅禮品，為免將來拗數（當然唔想發生啦，不過美麗佳人係有前科架....），所以我想一一節錄低佢哋......

1) 24x30 油畫一張

未來奶奶問點解唔搵張望鏡頭嘅相做油畫，不過我同男朋友又覺得望唔望鏡頭冇咩所謂，最緊要有 mood 同埋著住婚紗...... 講到要有 mood，呢個景嘅相一定走唔甩......

2) 10x12 相連水晶框一張

我對婚紗有一種莫名嘅執著！！！晒得做大相，即係比較重要嘅相，所以我一定會偏向揀張著住婚紗嘅嚟晒，咁先叫「婚紗相」！我認...... 我嘅思想係比較古老......

3) 8x10 相連木框一張

呢張係男朋友指定要晒，不過我想叫美麗佳人幫我執執個包包面，連我自己都接受唔到！

4) 8x10 散相兩張

呢張相超型，兩個人頭再加埋個花球，好似成串魚蛋咁呀！

唔知點解，我比較鐘意 d 唔望鏡頭嘅 pose，通常我都會照單全收，加上呢張都幾有 feel 吖，所以呢張都要晒做 8x10 ！

5) 5x7 相連木框兩張

男朋友話會將兩張 5x7 放喺公司喎，一人一張...... 要我放相喺公司唔係問題，不過男人老狗，我唔想比人誤會係我迫佢放囉...... 冤柱呀包大人！！！

6) 50" 海報一張

之前個 package 只係 36" 海報，宜家 upgrade 到 50"，咁大張我都唔知要嚟做咩！不過啱啱諗到，就係放喺註冊地點門口，當然唔少得就係酒樓門口啦！有油畫，有海報，相映成趣！！！

7) 提名冊一張（可放兩張相）

呢兩張相到時會一左一右咁擺，我哋兩個人個樣咁細，希望到時唔好有人畫花我哋個粉樣啦！

8) 謝咭 100 張（可放一張相）

講到明係做謝咭，意思就係要多謝 d 賓客出席我哋嘅婚宴啦，所以又點少得同 d 賓客飲杯呢？故此，我特登揀咗呢張做謝咭，各位親友，Cheers！！！

9) 謝咭 boxset 一盒約 300 張（可放一張封面相，三張細相）

封面：

背面三張細相：

因為想個主題連貫 d，所以專登揀咗同一個景點，同一件衫嘅相做呢個謝咭 boxset！

宜家約咗 6/10 去睇第一次執相，希望到時唔好有太大嘅難題發生，因為有部份 join 咗美麗佳人嘅網友都話由睇執相開始就係勞氣嘅開始！