2008 年 9 月 22 日（星期日）
有冇覺得好奇怪，無端端點解會接受婚禮雜誌 Wedding More 嘅訪問呢？或者應該咁講，呢晚除咗接受雜誌訪問之外，仲係我哋一班 book 咗緣美傳說做證婚嘅網友仔第一次聚會添！
話說自從緣美傳說有個 promotion 免費幫佢哋嘅客仔影婚紗相後，好多 join 咗嘅人都大出血呀！點解大出血？因為佢哋真係影得好好，所以我哋成班 esdlife 嘅網友想約出嚟請緣美傳說上上下下嘅 staff 食嘢慰勞吓佢哋，結果就搞咗個「緣美飯局」啦！原本都冇諗住搞得咁急架（因為呢個 idea 只係上星期諗出嚟），不過緣美傳說嘅揸 fit 人 James 打電話比我，話撞啱呢排有本雜誌想搵佢哋做一篇六頁紙嘅訪問，所以想搵埋我哋一齊，結果就成就咗今次嘅緣美飯局 + 雜誌訪問啦！
我哋約咗夜晚 8:00 集合，因為當晚緣美傳說仲要打開門做生意架嘛，所以就要約得夜少少囉！去到冇幾耐已經齊晒人，大家介紹完一輪之後，就去買嘢食（因為外賣速遞的話要等 1.5 個鐘呀，離譜！）
之後有兩個記者走上嚟，我哋先嚟幾張大合照，一 pair pair 人嘅合照等等，再等埋 d 嘢食搞掂晒後，開餐啦！！！
一路食，嗰兩個記者就一個負責影相，一個負責訪問！起初都答得唔係太正經，但又驚佢哋交唔到稿，都要認真返少少嘅！都係問 d 好老土嘅問題啦：影相時有咩趣事，點解會揀緣美傳說證婚等等呢類問題！講講吓，個記者仲問我介唔介意比兩張婚紗相相佢，等佢哋可以登出嚟，嘻嘻...... 都 ok 嘅，希望到時唔好有人嘔啦！大約大半個鐘之後，訪問就完成啦！真係話都冇咁快，其實都只係傾吓計啫，都唔算太緊張！
除咗食嘢之外，我哋有好多人對眼都係望住個電視機...... 因為...... 家好月圓大結局嘛！食完嘢之後當然幫手執嘢啦！執完嘢就繼續成班人茶餘飯後咁傾計，又講吓大家住邊咁啦！嗰度 total 有 12 個人，竟然有 6 個人住屯門天水圍喎！犀利！
仲有呀，呢個世界真係細！傾開先知原來幫我影相嘅其中一位攝影師阿 Joe 同我同一間中學讀書，仲要係同一屆，只不過係隔離班...... 真係諗都諗唔到呀，但係大家對大家都冇印象...... 證明大家當時都唔係壞學生吖，哈！之後傾傾吓，原來大家都有 d common friends 添呀，真係打埋算盤都叫做「識得」喎！真係橋啦！等我遲 d 得閒喺屋企摷返 d 中學班相，睇吓搵唔搵到阿 Joe d 學生樣先！
傾吓傾吓都唔知時間，竟然玩到 11:30 先捨得走喎！不過我哋決定咗，今次純粹因為要遷就雜誌訪問先搞得咁倉促，所以下個月又要搞一次先得，到時要搵多 d 人出席，搞爆佢個場，wakakakaka！
最後要多謝揸 fit 人 James，因為今晚嘅洗費全部由佢出，真係唔好意思啦！話明我哋上嚟開 party 慰勞佢哋架嘛，最後竟然佢一個人萬歲添！好啦，見今餐咁平就比你萬歲啦，下次嘅 gathering 我哋識做架啦！
緣美傳說嘅 staff，其實真係唔知點解會同你哋咁 friend 同咁有緣架！大家由 buyer / seller 變咗朋友，我真係覺得好難得！所以我好想第時我結完婚之後都照樣上嚟搞搞震呀，你哋唔會趕我走架呵？嘻嘻！！！
早兩日，Wedding More Magazine 出咗版啦，已經有網友話我聽見到我哋篇訪問，不過我仲未買，所以未有得睇住。各位，如果想睇吓我哋篇訪問，不妨搵 d 窿路去睇吓今期嘅 Wedding More Magazine 啦！（幫佢賣廣告添，收返佢每隻字嘅宣傳費先得！）不過唔好抱太大嘅期望，我諗都係一段仔架咋，或者等我遲 d 買到之後再 post 上嚟啦！
今次係我籌備婚禮時一個好特別嘅回憶！咁大個女都係第一次接受媒體嘅訪問咋！^^
新雜誌黎既? 好似冇咩點聽過? 呵呵, 快d登啦...
回覆刪除[版主回覆11/03/2008 15:20:00]我都唔算佢算唔算新呢? 好次一季季咁出, 不過佢哋都出咗唔夠 10 期咋!
好勁噃~~~ 上雜誌啊!!!!!!
回覆刪除我冇買呀~~~ 但我要睇 (因為冇錢買... hhaahah) 快d scan 上嚟!!!
[版主回覆11/03/2008 15:20:00]其實都係誤打誤撞咁上咗雜誌......
唏, 唔洗買啦, 我成日都覺得嗰 d 雜誌只係賣廣告仲多過乜, 等我遲 d 收到本書再 post 內容上嚟呀!
本書會係今個星期中寄出,我預星期尾會收到, 咁如無意外下星期就會到你地手架啦~ 可能我會放上緣美比你地,or約你地出黎交收呀!!
回覆刪除[版主回覆11/03/2008 15:21:00]好呀好呀, 咁不如你放喺緣美啦, 反正我嚟緊都要上去攞相簿呀, 咁我可以一次過攞晒返屋企, thanks 呀!!!
仲有得睇"家好月圓大結局"?你又係住屯門架?你地係客人1可以同"緣美"既staff咁fd,好勁呀!
回覆刪除[版主回覆11/03/2008 15:22:00]唔係呀, 嗰晚係 9 月嘅事, 我宜家只係補打返咋!
我住天水圍架嘛....
係啦, 我都唔明點解大家可以好似好 fd 咁嘅, 或者大家年紀差唔多, 又玩得又 talk 得啦!
哈哈....咁啱我想上黎你個BLOG同你講.....我係雜誌度見到你呀!!! HAHAH
回覆刪除[版主回覆11/04/2008 10:17:00]heheheeee, 你都買咗呀? 咦, 嗰日我都樣衰喎 ~~~
我有買呀..原本都冇留意..見到你篇post.. 即係今晚返屋企再睇..hehehe 見到你張相啦...係你地食野一齊飲杯果張..hehee
回覆刪除[版主回覆11/04/2008 10:16:00]哈哈, 原來你買咗呀? wedding more 話今個星期會寄返一本比我哋, 所以我哋仲要等呀~~~
記得快d scan俾我地睇下呀!!!!
回覆刪除[版主回覆11/04/2008 10:17:00]冇問題, 當我收到本雜誌之後會 scan 上嚟架啦! 不過好有可能又等到下星期先收到呀 ~~~
快啲scan上黎比我地睇下！
回覆刪除真係開心，攪結婚真係令到我地識到好多朋友仔。
[版主回覆11/04/2008 11:21:00]haha, 啱啱有朋友睇咗, 佢話我知雜誌裡面講 d 嘢錯晒......-_-"
係呀, 我都覺得搞結婚令我識多好多人呀!
我有買開架~~~
回覆刪除唔係呀...狀態ok wo...!!
[版主回覆11/04/2008 11:47:00]係呀? 不過有網友話我聽個記者寫錯咗好多嘢囉.....哈 ~
原來你同細恩一早知會訪問我地既......等我仲以為開頭係訪問JAMES 佢地, 見我地上去, 臨時加插訪問新人部份TIM....不過真係好難忘, 而且係一個好好既回憶, 亦都見証左採訪既失實
回覆刪除[版主回覆11/04/2008 14:09:00]哈哈，係啦，估唔到報導失實，都唔知點解會寫錯晒 d 情形！
你好勁呀!! 上埋雜誌做訪問. 記得post 上黎睇下喎!!
回覆刪除[版主回覆11/05/2008 10:19:00]其實一 d 都唔勁, 只不過咁 Q 之嘛 ~
好呀, 我一收到之後會 post 上嚟架啦 ~
真係一個特別嘅回憶bor , 其實搞結婚可以識到禁多朋友仔 , 仲展開左你地嘅友誼之路 , 真係好難得.....好開心呀.....
回覆刪除[版主回覆11/07/2008 10:33:00]係呀, 可以識到咁多咁啱傾嘅朋友仔真係好難得, 宜家我三日唔埋兩日就去睇大家嘅 blog, 已經變咗我嘅工作之一啦, 唔睇過唔安樂添呀!
勁呀～～Wedding More搵你～～點樣先會架～
回覆刪除[版主回覆11/07/2008 18:17:00]其實都唔係佢哋搵我, 只不過我哋咁啱上去緣美傳說搞 party, 佢哋又咁啱想訪問緣美傳說, 搞搞吓變咗訪問我哋上去玩嗰 d 新人囉 ~
好勁呀有雜誌訪問。
回覆刪除[版主回覆11/17/2008 11:02:00]其實都係咁啱架咋! 我邊有咁勁吖, 人哋雜誌鬼睬我咩!