我的騎呢同事

有時真係發覺間間公司都總有呢類「卡啦蘇」存在，之前 blogger 「迪迪」（<-- 其實佢係我老公個 friend）嗰間有個「老鵡」，我做開嗰間亦都一樣。今日又發生咗一件耐人尋味嘅事，突然間好想摷返幾個有關呢位「卡啦蘇」嘅故事「表揚」吓佢。

主角：公司 Receptionist A 小姐

故事一：

話說 A 小姐本身係一個好怕死嘅人，前排網上盛傳用微波爐叮食物會致癌，佢深信不已，就算無線電視之前播過一集「新聞透視」，用晒科學角度，又做晒實驗否定咗呢個傳聞，佢都依然不理，返到屋企之後三句唔埋兩句就扔咗屋企個微波爐。呢個都算啦，扔咪扔囉，但有件更精景嘅事在後頭。

又話說 A 小姐本身家住坪洲，我公司又喺灣仔，佢每日返工放工都要搭船出入。有一日 A 小姐同佢一個朋友（同住坪洲）一齊由屋企搭船出嚟市區返工，去到碼頭見到隻船就快要開，兩位小姐情急之下就去追船，點知跑唔夠兩步佢嗰位朋友突然間心臟病發送入醫院，搶救無效，仲就咁就走咗添。A 小姐返到公司同我哋講返呢件事時我哋都替當時人可惜，不過 A 小姐最後講咗一句：「我以後都唔敢追船啦，因為追船會死架。」我無搞笑，此乃真人真事，佢真係驚自己會死，所以從此以後佢寧願早 d 起身唔洗追船，都好過要因為追船而死。

我哋幾位好心嘅同事都曾經解釋過比佢聽，佢個朋友咁不幸可能係因為佢本身有隱疾，唔關追船事，但因為呢件事活生生發生喺佢眼前，佢所有嘢都聽唔入耳，算，由得佢，但係最最最最最最最頂癮嘅係...... 佢只係覺得追船會死，但係追巴士，追港鐵，追人，追 lift 就唔會有事... -_-" 我真係覺得呢個人超好笑！

故事二：

話說我公司係包伙食，無錯，真係好似工廠女工咁包伙食，不過係嗌外賣，由公司比錢。我哋每日都會寫低自己想食咩，身為 Administration Department 嘅 Receptionist 其中一個責任就係幫我哋叫外賣、分外賣。

有一日，同事 M 因為身體不適，想叫碗粥 + 齋腸清吓腸胃，佢都寫明係想要「齋腸」（有幾對眼都見到 M 小姐的確係咁寫），大家都認為一切安然無恙，乖乖地做嘢等食 lunch...... 好，lunch time 到啦，大家都分好自己嘅嘢食，點知當 M 小姐打開個飯盒...... 咦？點解盒齋腸變咗做蝦米腸？M 小姐當然問負責叫外賣嘅 A 小姐啦，會唔會係舖頭送錯嘢？點知 A 小姐嘅答案係：「哦...... 我見你寫齋腸架，不過咁齋，我怕你悶，我咪幫你嗌咗蝦米腸囉。」（語氣仲係非常之理所當然嗰隻）呢件事激到 M 小姐死死吓，仲下令叫 A 小姐以後唔好亂咁幫我哋揸主意！Well，聽落都有 d 奇怪，我哋嗌咩嘢食當然有我哋嘅原因，點解佢要用佢嘅口味套落我哋嘅身上呢？

故事三：

今次輪到我，事情大概同故事二相近，可想而知 A 小姐根本聽唔入耳，更加唔覺得自己需要改。

話說我今日嗌咗個「香辣炒飯」做 lunch，其實只係楊州炒飯料 + 星州炒米嘅辣粉炒出嚟啫，本應呢盒飯應該係帶少少辣味。我喺張飯紙度就咁寫咗「香辣炒飯」，其餘乜都冇寫。Lunch time 時我見到自己個飯盒蓋寫住「少辣」，心諗：「肯定又係 A 小姐幫我決定咗我要食少辣啦。」當時諗住食兩啖試吓個味道先，點知...... 盒飯淡而無味，就係因為少辣出咗事。最後我都忍唔住話咗佢兩嘢（我平時好忍得，我好少話人架）：「下次我無指明的話，你唔需要刻意幫我叫加辣或者少辣，你今次幫我嗌咗少辣，盒嘢變咗無味，咁我不如嗌返楊州炒飯算數，你尊重吓人好冇？」聽罷 A 小姐即黑面，仲覺得我話錯佢添。其實我食盒淡而無味嘅飯我一 d 都唔介意，因為我一向對食冇咩要求，但就真係忍唔住佢亂幫人話事，講到尾佢可能係為咗我哋好，不過佢好心做壞事囉！

故事四：

A 小姐本身擁有一把長長嘅頭髮，但係唔知點解長得嚟係好旱，所以佢日日都紮條馬尾返工。有一日佢終於忍唔住自己嗰把頭髮走咗去電負離子，係人都知道電咗負離子之後有好幾日都唔可以再紮頭髮，咁 A 小姐都好聽話，由得 d 頭髮放落嚟。不過唔電由自可，一電就出事。A 小時因為電咗負離子之後唔紮得頭髮，結果行路時睇唔到路就咁 PK，之後仲去咗睇跌打，仲要休咗 2 日息...... 嚟到呢到我都仲未係好明白...... 點解電完負離子會 PK？難道佢將佢把直髮撥晒上前面做貞子？？？

故事五：

某一日我哋成班女同事一齊食 lunch，話題圍繞住大家幾耐先洗一次頭（話題有夠無聊）。點知 A 小姐發表佢一輪偉論...... 「唉，呢排天氣好熱呀，我已經兩日就洗一次頭架啦，都仲好痕...」眾人心諗：「吓？兩日先洗一次？仲要好熱......咁冬天時幾耐洗一次呀？」好戲繼續在後頭......

A 小姐平時喺屋企洗頭洗好耐，連佢老公都覺得奇怪，查問之下先知道原來佢好鐘意喺洗頭時起勢 R 佢個頭，R 還 R，佢覺得用手指唔夠皮，佢自己有一個專係用嚟洗頭嘅刷...... 喺屋企咁刷個頭不特止，A 小姐話佢平時去 hair salon 整頭都會自備呢個刷，而且佢仲會嫌 hair salon d 洗頭仔幫佢洗得唔夠 high，佢...... 佢係會自己中落咗盆度洗，當正自己屋企一樣，如果比我喺 salon 見到佢，我諗我會即刻扮唔識佢！！！

～．～．～．～．～．～．～．～．～．～．～．～．～．～．～．～．～

每間公司都總會有呢類人存在，好在我同 A 小姐工作上甚少相處機會，否則會隨時被佢激到紮紮跳，睇吓幾時要入廠！