2008 年 10 月 17 日（星期五）
今日又去咗美麗佳人睇第二次執相。
入到去，熱情嘅阿 Mag 好 nice 咁招呼咗我哋坐低，原來...... 我哋之前要再執嘅相只得 10 張咋！
先睇「一串魚蛋」嗰張...... 今次格肋底兩舊鬼祟肉明顯執得自然咗好多，起碼一望到張相時唔會有「好假」、「核突」或者「接受唔到」嘅感覺，所以我同男朋友都滿意執完後個效果，佢哋仲自動幫我減咗少少手臂添，唉，喺電腦世界瘦身真係好容易。
其餘嗰 9 張都係圍繞住「潔白牙齒」、執走男朋友爛咀後 d 紅印等等。唔洗 10 分鐘已經 OK 晒啦，d 相全部滿意！所以就撩返隻龜 confirm d 相，3 個月後（即係 2009 年 1 月 17 日）就可以收相啦，好嘢！我粗略計過，拎相時應該只有一個大環保袋（入面裝晒所有相簿），一碌卷起咗嘅海報同埋一張有大半個人咁高嘅油畫。兩條友唔 Call 車拎返入元朗應該都冇乜問題，不過拎住咁大件嘢都上唔到巴士，或者到時請半日假去收相，到時搭巴士又好，搭地鐵轉西鐵（-_-" 宜家叫港鐵）又好，都可以避開繁忙時間啦！
Join 咗美麗佳人嘅朋友，你哋 check 執相時記得睇 d 真先好簽名 confirm d 相，因為當佢做好晒相簿之後你先話有某一張要再執的話，係需要加 $1,500 架！
又到評論美麗佳人服務嘅時候啦...
暫時都仲係好滿意，由 join package 到今日 confirm 晒 d 相 so far 都好好，冇不滿嘅情況出現。美麗佳人，keep 住呀！奸巴爹呀！我唔希望最後要 black list 你哋架！
我個friend 都係呢度影 , 個sale 都係Mag , 個次我都有陪個friend 去簡相 , 後期係執相上 , 我個friend 同Mag 都有少少意見分歧 , 實情我唔係太清楚 , 不過拎相個陣 , 個期都一改再改 , 不過見個friend 都影得幾靚架輯相....
回覆刪除[版主回覆11/11/2008 10:21:00]阿 Mag 通常係負責睇相 & 執相部份, 差唔多個個 jm 都係佢負責架啦!
呢間公司喺後期制作真係問題多多, 有唔少 jm 都有投訴過, 但好彩地 so far 我都未遇到難題, 不過....唔知點解我覺得我唔可以如期拎相囉 ~
P.S. 我都有 post 部份相出嚟, 你要睇的話就自便啦!
咁就好了，整個過程都咁順利，依家就可以安心等收靚相啦！
回覆刪除[版主回覆11/11/2008 10:29:00]係呀, 不過唔知點解硬係覺得我唔可以如期收相,........第六感..哈!
聽係咁講, 對美麗佳人都算滿意喎!!
回覆刪除希望你可以如期收到靚相啦!!
[版主回覆11/11/2008 17:05:00]多謝呀！我都希望可以如期收相！
放心啦，會一切順利o既！
回覆刪除[版主回覆11/12/2008 11:40:00]承你貴言! 哈!