裙褂繡莊執笠

查實呢件事都發生咗成半年咁耐......

2008 年 6 月 12 日（星期四）

幾個星期前，收到「永隆繡莊」負責人劉小姐嘅電話，佢通知我話我之前租裙褂嗰間「溢昇繡莊」嘅老闆因為有 d 私事，急於離開香港，所以佢間舖已經關門大吉。好在，佢都係一個負責任嘅老闆，佢將之前接到嘅訂單 pass 晒比隔幾個舖位嘅「永隆繡莊」。收到呢個電話後都覺得自己算好彩，好彩在溢昇個老闆冇走佬啫，而且永隆只係隔溢昇幾個舖位，影響都不算太大！

永隆負責人叫我放心，之前封咗嗰套褂會繼續同我封起佢，不過佢建議我落佢舖頭試一次身比佢睇，其實 ....... 我都唔係好明點解要試比佢睇呢？不過，既然繡莊嘅老闆轉咗手，保險起見去望一望套褂係咪我 hold 嗰套都好吖，所以我就落咗去啦！

舖頭嘅地址唔同咗，但都仲係嗰套褂！我租嗰套係中五福，重新再試多次上身，其實都已經好滿意！不過，心郁郁又想試埋大五福，因為我真係鐘意多金銀線架，但係又著唔起褂后，著咗之後感覺大老氣啦！劉小姐好樂意拎大五福比我試，其實大五福同中五福相差唔算太大，問過媽咪意見，佢話只要唔好太多紅色就 OK！我就 15/16，老闆話如果轉大五福，要加多 HK$100（即係 HK$680）。

中五福（呢件好似多金銀線得嚟有返少少紅色，感覺顏色均勻 d）

大五福（呢件的確好多金銀線，但好似金得滯，少少紅色都搵唔到咁）

男朋友就認為雖然大五福真係多 d 金銀線，不過我嗰套中五福已經好足夠。其實我都覺得係嘅，既然係咁，又發揮我師奶仔嘅本色 ---- 看錢向！裙褂只係著半日，需唔需要加多 HK$100 呢？自己租開嗰件又唔係唔見得人 ....... 但我真係鐘意多 d 金銀線喎（雖然係咁，但我絕對唔會租褂皇，成條金魚咁 .....）

所以最後都係維持原判，租返中五福就足夠啦！