拎相簿 @ 緣美傳說

2008 年 11 月 14 日（星期五）

早喺幾星期前緣美傳說大阿哥 James 已經通知我 d 相簿搞掂晒，叫我隨時上去拎啦！本來好歡天喜地諗住早 d 拎相簿返嚟日對夜對，不過撞正自己搞緊法國婚紗 d 相，之後又到婚紗展，緣美傳說所有職員要為 expo 準備，都唔敢上去煩住人，結果一拖再拖，到上星期五先捨得殺上去。

講開又講，我今年 7 月 28 日先去影相，到真係執好晒相、confirm 晒 d 相係 9 月尾嘅事，點知轉頭 10 月尾 James 就通知我 d 相簿 ok 晒，前前後後正式做相簿時間只係用咗 1 個月左右，點解美麗佳人同埋法國婚紗要等 3-4 個月咁耐嘅？究竟係緣美傳說有效率，定係美麗佳人同法國婚紗多 order 得滯？無論如何，其實要等 3-4 個月都係預料中事！

上到緣美傳說後都見到有人揀緊相，有人嚟睇場，so far 佢哋都好似 keep 住日日有人上去睇場。阿 Joe 見我哋到咗就拎個環保袋出嚟，入面有晒我哋嘅相簿啦！好似都好重吓喎，而且本大相簿嘅 packing 係超抵讚！個盒有晒挑花咁款，又「聚」手，淨係個盒已經夠重！又有好多布包完一層又一層，驚死會整花本相簿咁，佢哋好似重緊張過我哋呀！今晚本來男朋友撩我去食韓國燒烤，因為自從影完相放縱後都未試過食韓燒，不過我就 ban 咗！拎住咁多相簿，我驚食完韓燒之後 d 相簿會一陣味！我唔要韓燒相簿呀！！！！！

由於本大相簿個盒都有返咁上下重量，驚揹死男朋友，所以都係分兩袋啦！個袋貫徹佢哋公司嘅 theme color，拎出街其實都幾 sharp 架！

開始拆啦...... 好似拆禮物咁！

一本大相簿（都唔記得咩 size 啦，好似係 8x12），兩本細相簿（5x7）

一本相簿可以有咁多個袋入住，我真係覺得佢哋仲緊張 d 相簿多過我！

呢本大相簿個盒好鬼死冠冕堂皇 feel...... 成本古代嗰 d 書咁（唔識點形容！）

3 本相簿正面（全部有晒 uv coating 啦！）

背面

講到尾，最最最鐘意都係呢張相，簡直係無敵呀，剎那間覺得自己好似做咗 model！曾經有諗過晒呢張做大相，不過好似自私咗 d，話晒呢輯係婚紗相！

總括嚟講，我會比 d 相簿 99 分！雖然佢哋唔係大公司，相簿款式一定唔夠人靚，但係我認為只要唔係太醜樣，又可以清清楚楚睇到 d 相已經滿意，況且咁嘅價錢仲想點呀大佬？

不過，我點都要扣少少分！唔知各位 bloggers 仲記唔記得我影相當日男朋友係爛咀架！結果要靠後期執相先可以整得靚靚！但係當我收到本相簿時，我發覺有兩張相執漏咗男朋友個爛咀。本來想叫緣美傳說重做，但係諗住開聲前先問一問男朋友意見，男朋友就話唔好重做，佢話反正張相咁啱排咗喺最後一頁，都應該唔會有太大影響，而且人哋重做一本相簿成本都唔平，無謂為咗一兩張相令人難做（緣美傳說有你呢個客真係好！），仲有，佢話佢當日真係爛咀，宜家張相執漏咗，咪當係一個回憶，一個證明囉！咁其實我都 ok 嘅，都只係一張兩張，如果我係十分介意的話當初寧願改期影相啦，所以到最後我哋都冇重做（雖然如果我哋開聲佢哋一定會重做）！

就係以下呢兩張相啦！

左面嗰張，zoom 近 d 近 d（唔好嘔！）呢張係最嚴重！

右邊嗰張，zoom 近 d 近 d（唔好再嘔！）呢張可能因為角度問題，感覺上好似係陰影多過似爛咀（雖然咁講都有 d 勉強），但我認為可以接受！

不過，緣美傳說 d 人都好醒，即刻幫我執返張相嘅 softcopy，唔洗我哋自己返屋企執！臨走時我醒起 package 入面包咗一張 8x10 大相，佢哋漏咗晒比我，加上佢自知本相簿有兩張相漏執咗個爛咀我哋都冇出聲，所以 James 自動自覺話補返一張 16x20 油畫比我喎，唔......... 其實我都唔係太介意執漏爛咀呢件事，一張半張都冇乜所謂，而且我已經有 2 張油畫，不過見係佢哋送，當然唔執輸話好啦，呵呵！