2008 年 11 月 22 日（星期六）
由於呢個 post 涉及太多人啦，為咗尊重佢哋，所以不得不 private 一下！另外我整篇 blog 都會用返佢哋喺 esdlife 嘅網名稱呼佢哋，無謂佢哋比其他人認得出啦！
呢一日超開心呀，約咗好多位喺 esdlife 相識而同一日結婚嘅朋友仔出嚟 gathering！之前都講過，截至大家結婚一年前為止，喺 esdlife 已經有 42 pairs 人報到，今次雖然約唔齊咁多 pair，不過都有 11 位代表出現，成績都唔錯！再加埋冇上 esdlife 傾計嘅準新人，保守估計其實應該有 around 60 pairs 人係呢一日結婚！試想像吓 21-11-2009 呢一日，全香港有 60 pairs 人結婚，場面何其壯觀！
首先多謝阿闊太太啦，咁有心發起呢個 gathering，之後要多謝托爾及 TNS102 啦，因為佢哋諗咗 gathering 嘅地方出嚟，方便大家好嘈嘈閉咁過咗一個下午！
出嚟之前其實都驚會冇嘢講，話晒大家都係第一次見面，但係估唔到大家一坐低之後就七咀八舌，雞啄唔斷，由 2:00 開始嗲...... 嗲到 7:00 左右，咩都講一餐，又成日大笑喎，睇嚟成間 cafe 至嘈都係我哋啦！
P.S.：由於唔知相中各位介唔介意我 post 張相出嚟，所以部份未徵求同意嘅我都打咗格仔先！如果有任何一位想我收返埋張相，可以立即通知我，我識 do 架啦！後排左四就係小妹啦！
MLing - 我同佢一齊約埋上去 cafe 架，MLing 佢好搞笑，原來佢有少少怕醜架，不過佢好靚女，皮膚又靚又瘦喎，家吓呢個時勢人人嗌減肥去影婚紗相，佢竟然要增肥，恨死隔離咩！
Winky - 我同 Winky 私底下冇傾過計，因為佢又冇寫 blog，又冇 msn，esdlife 發言算係比較少嘅一個，不過見到佢之後比我嘅感覺一 d 都唔陌生！佢今年 3 月已經影咗婚紗相啦，所以佢當日佢都有 share 比大家睇，個個都覺得好靚，佢仲有一個好似張智霖／馬景濤嘅未來老公... 好 sweet 呀！
阿闊太太 - 同呢個朋友仔之前一齊去影法國婚紗相，嗰時已經覺得佢又高又瘦（我知你一定唔認架啦，但你係一 d 都唔肥嗰種），皮膚又靚，未上妝之前已經夠搶鏡！睇咗佢少部份嘅法國婚紗相，靚人 + 靚景，阿闊仲得到各位嘅一致同意...... 佢好似湯盈盈架，不過係靚女版湯盈盈，^^！仲有呀，呢個係我私人感覺，你男朋友真人型過上鏡喎！hehe
Kass - 唔知點解我覺得呢個朋友仔同我嘅性格有 d 似！Gathering 前一晚佢打嚟 confirm 我知佢可以出席，嗰次係我第一次聽到佢把聲，係同我想像中完全一樣！可能因為睇得佢個 blog 多，知道佢係一個咩人！嗰日 gathering 佢講嘅嘢好多時同我心諗嘅一樣，不過佢轉數快過我，我諗到時佢已經講咗出口！
TNS102 - 呢個朋友仔比較遲先加入，佢都有寫 blog，我都有 keep 住幫襯架！佢都就快影法國婚紗啦，叻女呀...... 個個都識入我個 blog 取經！講開又講，個個朋友仔都話有睇我個 blog，當日仲話我做咗嗰張枱嘅 icon，基本上只要見到我個樣就知嗰枱就係 esdlife 網友們...... 有冇咁誇呀？我始終都覺得托爾先係 icon 喎！^^
托爾 - 一個令我有好深印象嘅男仔！佢係喺 esdlife 由頭帶到尾 keep 住發言嘅男仔之一！除咗我之外，其實好多女網友們對佢嘅印象都非常好，因為佢真係少有嘅男性去 in-charge 自己個婚禮，佢女朋友可以唔洗煩，真係幸福！我哋嗰 d 嘅另一半，踢一踢先郁一郁！
ar yee - 好溫文嘅一個女仔呀！之前我揀 mua 時佢比咗好多意見我，真係好多謝佢！佢好叻女，早於 07 年 11 月已經為自己嘅婚禮 book 酒席及當日攝影，足足早兩年去籌備，我係極度欣賞架！不過都好搞笑，我識佢嘅原因，係因為我揀第一輪酒席時比佢截咗我糊，之後再喺 esdlife 識返大家，哈！
popopolly - 呢位朋友仔我係比較遲先識佢，但係大家嘅話題就好似傾極都傾唔完咁！我同佢 join 埋同一間婚紗相公司，又喺同一間證婚公司行禮，所以好啱 key！嗰日 gathering 完之後仲一齊去咗行百利商場，又 keep 住成日 sms，唔識我哋嘅人都以為我哋識咗好耐添呀！
cin~ - 佢...... 我覺得係成班女仔中最幸福嗰個！雖然嗰日 gathering 個個都幸福，但係唔知點解佢比我嘅感覺係將「幸福」兩個字寫咗喺面上咁，我覺得當日佢連笑都笑得甜過人！可能因為睇過佢個 blog，又睇過佢部份嘅台灣婚紗相，佢同佢男朋友張張相都甜到漏，恨死隔離呀！
G-virus - 呢個男仔又係比我好深嘅印象！佢同托爾一樣完全 in-charge 自己個婚禮，不過佢有樣嘢唔同，佢本身係讀 IT 出身，佢會將自己個 wedding 搞得好獨一無二，又會有好多唔同嘅 ideas，讀 IT 真係唔同 d，試問有幾多個男仔會 in-charge 自己個婚禮不特止，仲會自己 design 自己個 backdrop，舞台，唔播成長片段，唔播即日剪片，唔播求婚片段，佢會自己錄一段片送比老婆仔，做佢女友真幸福！最衰同佢同一日結婚，否則我都好想參加佢個婚禮，一定好有心機，有好多驚喜！
總結呢一日真係極度開心，見到咁多唔同嘅網友仔，唔知有冇機會有一次可以約齊大家嘅 Mr. / Ms. Right 出嚟聚一聚呢？
托爾，我記得你講過話下年 3-4 月左右會搞多次 gathering 架，到時我再幫手配合！由於今次出嚟有大部份朋友都未開始影相，咁...... 下次出嚟你哋個個都記得要帶相出嚟一齊 share 啦！喂，未影相嗰 d 呀，我唔理你哋偷影又好，用埋 d 嗱喳手段（唔好話係我叫架）都好，我要睇相，我要睇相，我要睇相，哈哈！尤其是 cin~ 呀，下次唔准唔記得帶啦，^^！
Nice to meet you all!
嘩, 個聚會好多人呀, 成班人一定玩得好開心呀!!
回覆刪除[版主回覆11/25/2008 16:38:00]係呀, 嗰日真係玩得好開心架, 個個都有傾有講, 絕對唔似啱啱識嘅朋友!
哈~~我報到~ ~果日聚會真係好開心呀！大家都傾得好愉快呀！多謝你咁讚我呀！但我其實一d都唔健康架！成日都面青口唇白. . .不過會努力keep番好變番紅潤d~ ~的確初時係幾怕醜架！(比較慢熱) 但傾傾下就ok喇！期待下次既聚會呀！ (你都係icon黎架！)
回覆刪除[版主回覆11/25/2008 18:01:00]hello ~ 嗰日真係傾得好開心, 完全超出想像呀, 大家都好似唔識收聲咁, 哈!
你喺 msn 比我嘅感覺係好好禮貌, 好靜, 點知同你熟少少真係可以傾好多嘢! 到宜家我都記得你憶述你 bf 同你求婚嗰個樣....^^
好犀利呀!!可以相遇到同月同日結婚的jm, 真係替你哋開心
回覆刪除[版主回覆11/26/2008 10:18:00]其實都唔係好難架咋, 喺 esdlife 就齊晒人啦, haha!
真係好熱鬧喎~~~esd我睇左一牌又冇睇lu...
回覆刪除[版主回覆11/26/2008 10:18:00]冇辦法呀, 我身邊冇人幫到我, 我又唔知點搞, 所以一開始已經喺 esdlife 打躉打到宜家囉 ~
我0個日都好開心呀~~~~希望下次可2同埋mr wu一齊黎啦~
回覆刪除仲有呀~我都覺得雖然只係同你第一次見, 不過好親切呀, 可能又係因為睇得你個blog多啦~~不過0個日同你坐得遠冇傾咁多,下次我要坐近d你呀~
乜原本我搶左你對白咩?haha下次我停2秒等你下~
[版主回覆11/26/2008 10:20:00]哈哈....我嘅轉數係比一般人慢, 我諗你等我半日我都 up 唔出架啦, 哈!
係啦, 嗰日坐得真係遠咗 d, 下次出嚟要傾多 d 呀! 如果真係叫埋 Mr. Wu 出嚟, 記得叫佢著多幾件衫, 因為我諗我哋成枱人都記得 Mr. Wu 嘅身型............^^
好多謝你呀，超懶o既我差D相 copy o左你呢篇落我個 blog 度呀！哈哈哈！ 你點知係icon，簡直係我o地o既結婚百科全書呀！ 下次一定要再出o黎gathering 呀！實在太好玩喇！ 好少可有咁大班人同我一樣做緊同一件事、向住同一個目標進發o架！
回覆刪除[版主回覆11/26/2008 10:21:00]講真喎, 你差 d copy 我一 d 都唔介意, 唔洗同我客氣啦!
Icon.......我始終都覺得係托爾, 百科全書又唔敢當, 老師啦....老師就係百科全書啦, 講咩佢都幫到手嘅 ~ ^^
哈哈.你呢度好似變左個中心點...good
回覆刪除我都唔好意思果日咁遲黎...我想做d早走都無-_-,不過遲到總好過無到,係咪...哈哈
好彩你無怪我無攞隻cdr者,嘻,二月搞活動,到時我地2個可以交換黎睇啦,yeah
[版主回覆11/26/2008 10:23:00]中心點.....-_-"....... 聚腳處? 哈!
唔緊要啦, 你要返工嘛, 遲嚟我哋冇人怪你嘅 ~ 係啦, 你又側側膊唔帶隻 cdr 出嚟, 下次你一定冇得走雞!!! 哈!
有60對新人都係21/ nov , woowoo......真係冇諗過可以有禁多人係同日 , 犀利.....
回覆刪除好開心呀 , 大家同日結婚而又相識到 , 婚後可以再約出黎睇相 , 或者一齊去honeymoon 都得bor....呵呵.....
[版主回覆11/26/2008 10:24:00]係喎, 嗰日成 60 pairs 新人, 真係超驚, 所以 d 嘢咪成日要早 d book 囉, 其實個個都有苦衷.....
我哋都講過呀, 既然咁有緣識到大家, 首先我哋已經喺 facebook create 咗個 group 歡迎同日 bd 嘅人 join, 婚後仲話轉話題傾生仔經添呀! 呵!
最衰我上次唔黎得...miss左添~~你地真係傾得好開心呀....~~~下次我一定要出黎呢~
回覆刪除[版主回覆11/26/2008 10:25:00]係呀, 我哋都有人問起你呀....所以你下次一定要出嚟呀!
嘩，好開心的gethering呀！咁難得大家由唔相識變相識，這份友誼真可貴！(我發現原來o係網絡世界識朋友仔都唔一定係壞事！)
回覆刪除[版主回覆11/26/2008 10:26:00]冇錯呀, 真係一種緣份...就好似我同你都由唔識變做識...^^
其實如果唔亂上網站, 我諗網上識朋友都冇乜大問題嘅, 當然自己都要小心 d 啦!
好齊人好熱鬧啊~~
回覆刪除[版主回覆11/26/2008 10:27:00]何止熱鬧, 仲幾驚嘈親人添呀, haha!
你好勁...記得晒.
回覆刪除[版主回覆11/26/2008 15:02:00]記得架, 因為每個人有寫 blog 我都有幫襯架嘛, ^^ 我 8 呀!
好多人,好開心喎
回覆刪除[版主回覆11/26/2008 15:02:00]係呀, 其實當日真係幾開心架!
wakakkak 我下次會記得帶野出黎架la....今次怕醜ma....!!! 你下次都記得帶埋你男友出黎一齊顛晒咁...有講有笑la....
回覆刪除[版主回覆11/26/2008 15:03:00]hehe....... 唔洗怕醜喎..... 如果時間許可的話, 歐陽生一定會奉陪到底, haha!
最初我攪結婚時都係架,o係esd識左一班姊妹,雖然之前未見過,但一見到面真係講唔停架!
回覆刪除[版主回覆11/26/2008 17:11:00]係呀，原來你都試過！個感覺好得意，好似識咗好耐咁，永遠都有講唔完嘅話題！
"sh"!~ mr wu既秘密,你地要搾唔知嫁~~~wakakaka~
回覆刪除[版主回覆11/27/2008 10:28:00]hahaha, OK, 我都識做架啦!
你緊係icon啦！我日日都幫襯你要嚟取經架！！ 嗰日真係好開心呀，完全得得好親切呀！其緊傾依d野係要同返啱嘴型傾既先得架嘛，同其他人傾人地都無啦興趣啦。可以一齊相識真係好難得呀，好期待下一次gathering呀，到時一定會share相架。
回覆刪除[版主回覆11/27/2008 10:29:00]冇錯, 嗰日真係好開心, 所以都好希望快 d 等大家影完相再搞多次 gathering! 你聽日就去影相啦, 好凍喎, 小心小心!
嘩~你大日子有成60pair人結婚咁勁呀~
回覆刪除o個日一定超好日啦!!!
到時o街度見到D新娘都一定要望多兩眼~睇下見唔見到你先^^仲有部MG~
[版主回覆11/27/2008 10:31:00]係啦, 我都估唔到原來嗰日咁好日, 真係唔係好事定壞事 ~ 我哋仲無無聊聊咁做咗個非正式小統計, 嗰日最多屯門/元朗/沙田/大圍嗰邊新人添呀 <--- 真係太無聊啦, 咁都計一餐!
我竟然錯過左... 怪在我太懶... 少睇左esdlife 同 blog >,< 唔制呀
回覆刪除[版主回覆12/16/2008 14:06:00]唔緊要啦，咁你努力 D 追上啦，我見你個進度都好似停滯不前咁喎！