決定咗啦 @ 法國婚紗外租

其實早喺今年嘅 3 月我已經喺 expo join 咗法國婚紗外租 package，但係由於佢哋有兩款 package 比我揀，我未決定點租法，所以我當初只係落咗 $1,000 訂金，到試衫時先決定 join 邊個 package，不過...... 最近我已經決定咗啦！

Package A --- 5 套（原價 $5,388　　優惠價 $4,388）

（expo 價：$4,188 加送一套即 6 套）

- 其中一套必需為婚紗

- 自選其餘 5 套（可選晚裝、男士禮服、中式裙褂、伴娘或伴郎禮服）

Package B --- 5 套（原價 $4,588　　優惠價 $3,588）

（expo 價：$3,388）

- 只可選晚裝、男士禮服、中式裙褂、伴娘或伴郎禮服 <-- 換言之冇婚紗租

另一邊箱，其實我喺元朗又租咗一個 4 套嘅 package，$2,088 / 4 套（任選），主要係 for 媽咪、奶奶、伴郎及伴娘。不過我發覺原來租 5 套都只係 $2,388，6 套就 $2,888，咁諗諗吓...... 如果我喺元朗加多一套，即係租個 5 套嘅 package 都只係 $2,388，但由於元朗 d 晚裝我唔係咁鐘意（婚紗 OK 嘅），咁晚裝方面我一定要喺法國租，咁咪可以用 $2,388（元朗）+ $3,388（法國婚紗）租晒 d 衫囉？不過計計吓條數，我件婚紗一定要拖尾，元朗租的話要 + $500 左右，咁其實個 total amount 同喺法國婚紗租都一樣啫。既然係咁，我就決定租法國婚紗 Package A 啦！

呢排上 esdlife 同法國婚紗嘅網友傾計先發覺個 package 又加咗價，又一次證明原來早 join 真係有 so...... 宜家個 package 係 $4,888／4 套，咁我真係抵咗好多喎！

不過喺呢 d 公司 join 外租其實都唔好得晒，佢哋唔比轉款（每次轉款請支付 $500 大元），又要喺試衫當日做晒決定租邊件，唔比人考慮...... 仲要唔包首飾...... 不過算啦，宜家我只係用咗 $6,276 就租到 10 件衫，我已經覺得自己好精明架啦！

講開仲想講埋，我婚期係 09 年 11 月，join package 時個 sales 話叫我最遲 2 月要 confirm 衫款，我唔信，所以揀相時問咗 Christine，Christine 就話唔洗 2 月（當時仲覺得：都話架啦，邊洗咁早），不過 Christine 話 3 月啦...... 3 月？？？仲有成 8 個月我先結婚喎？？？不過 Christine 話差唔多架啦，咁我依然都係唔信啦，咪上網問人囉，但係原來真係最遲要喺 3 月 final confirm d 衫款，嘩，洗唔洗咁早呀？有個網友佢婚期係今年 11 月，佢 5 月去揀衫時都話有好多靚衫已經冇晒期啦，所以都叫我 3 月，甚至 2 月好去揀款啦...... 嘩，真係早得滯，即係話 2 月打後就算有新衫返我都冇得著添！灰 ～