好快可以去試坐花車

日頭唔好講人，夜晚唔好講「X」！

出咗 MG 個 post 當晚就即刻收到阿達嘅電話，佢通知我架車已經 check 咗，pass 埋，仲攞埋行車證，可以落地行得，仲約我同男朋友一齊出嚟試車添。聽到呢個消息當然係覺得正啦！但係之前有 d 問題都想向佢 confirm 返，MoLee，你要留心啦，問咗好多你都想知嘅問題呀：

(1) 冷氣

之前阿達話有 50% 機會裝唔到冷氣。我問咗佢，現階段真係未有冷氣，不過主要原因唔係裝唔到，只係佢未得閒裝上去啫！有 8 成機會係裝得到，不過可能等遲少少佢先得閒裝！

(2) 車籠窄

呢個問題真係冇得搞，架車本身係咁就係咁！阿達之前都講過呢架車嘅乘客坐位只有司機 + 前座一位 + 後座兩位，咁結婚當日伴郎伴娘都坐唔到啦！但係如果租咗倫敦的士的話，其實係可以坐埋伴娘跟頭跟尾都得。Anyway，呢個問題都不算太大嘅，而且宜家未正式見過架車，都唔敢講得太肯定住，等我睇完車再返嚟報告。

(3) 租金

阿達話比倫敦的士貴 $1,000，如果之前有問我過攞資料嘅網友應該心中有數！雖然佢係貴 d，不過相比市面上同 grade 嘅車（e.g. 勞斯萊斯）已經算平架啦！冇計啦...... 鬼叫男朋友指定要租呢架車，否則我寧願租紫色倫敦的士囉...... 紫色喎！！！！！！！！！今次再一次 out budget，不過我唔係罪魁禍首喎，hohoho！

(4) 車內 setting

第一次見呢架車時只係得個空殼，雖然 d 相都影到內籠係點樣，不過未正式坐過入去都唔知終究係咩環境，但係都係嗰句，阿達咁有 taste 買呢架車返嚟，我絕對信得過佢！

(5) 旗仔

之前有睇過我個 blog 嘅朋友都知道呢架 MG 有一個特別之處，因為佢係古董車，所以有一個佢獨有嘅特色。當架車要轉線／轉彎時佢唔係同普通車一樣打燈架。車身兩邊各有一支旗仔，當要轉左時，司機打一打掣，左邊旗仔會升起，要轉右就右邊旗仔會升起（唔知你哋明唔明我講咩）。架 MG 咁難得有呢個特色，我當然問埋阿達呢個搞掂未啦！阿達話已經裝咗旗仔上去，性能都冇問題！不過由於要過驗車嗰關，運輸署規定一定要裝埋燈，所以宜家旗仔 + 燈兩樣都有齊晒啦！

6) 顏色

驟眼望落去係白色，不過其實係薰衣草白，白得嚟又有少少帶薰衣草色（即係紫色），呢張相可能會明顯少少...

宜家樣樣嘢都搞得 8899，我嘅 concern 都已經解決晒，好嘢！

最後就係等阿達打嚟同我 confirm 邊日去試車，到時佢會揸出嚟元朗，好期待呀！