2008 年 8 月 26 日，我將會同男朋友去到美麗佳人影人生第一次嘅婚紗相。影得婚紗相，新娘花球當然唔少得啦！雖然美麗佳人講咗會有花球提供，不過佢哋已經比定心理準備我，叫我自己帶個花球去，又或者帶幾枝花去，因為佢哋嘅花球款比較少，如果想影相靚 d，就自備花球啦！（佢哋又幾老實喎）
不過，我想自己整一個絲花花球，原因有兩個：
1) 可以喺結婚當日拋花球用。因為結婚當日我應該會買一個鮮花，咁呢個就拋出去啦......其實我都未決定拋唔拋，因為註冊嗰度樓底矮，落到街係諾士佛台，試問又點拋呢？不過唔拋花球都唔緊要，咪攞嚟留念囉
2) 10 月會去法國婚紗影第二輯，由於法國呢一輯只係用酒樓 coupon，所以佢哋一早講到明唔會有花球
雖然我 8 月尾先影婚紗相，不過上網做吓資料搜集，又要搵時間出街買花材，又要試紮，搞 "lee" 搞 "路"，應該都差唔多！對於一個鍾情於紫色嘅我嚟講，影婚紗相當日我梗係想用返紫色玫瑰花做主花啦......（其實都好大原因都係男朋友向我求婚時送咗紫色玫瑰比我，到咗今日，紮花已經謝咗 + 丟咗，所以一直都想搵返個紫色玫瑰花球嚟留念）
但係男朋友話買紫色絲花要好小心，因為紫色其實好蝦人架，買得太深色會變得好假，大自然界中冇乜生物係紫色（通常都係染色得出嚟），所以要小心選擇。不過，我又唔係咁野蠻嘅......如果真係揀唔啱紫色絲花，我會妥協，最多咪用其他顏色囉！
一陣我會同男朋友出花墟睇花材，所以我頭先上網搵咗幾個 sample，參考參考：
以上呢兩個都係用紫色玫瑰花做主花，所以係我參考嘅花球之一！d 羽毛其實我覺得加唔加都得！反而到結婚當日嗰個鮮花花球我想加返羽毛，因為我喺 11 月結婚，有少少羽毛，襯返當日嘅天氣，涼涼地咁...
呢兩個就係我嘅後備，如果揀唔啱紫色絲花，就會依照呢兩款去買花材！如果要我喺呢兩個花款二揀一，我會揀全白嗰個，因為感覺清新好多！不過考慮到影婚紗相當日拎住個全白色花球，影相係咪會唔夠 sharp 呢？之前聽人講過，如果要影相，最好搵 d colorful 嘅花球，咁影出嚟 d 相色彩都會豐富 d 啦！
做完一輪資料搜集，先發覺原來自己搵咗好多拖尾嘅花球！講真，我都幾鐘意拖尾架！人哋話著拖尾婚紗可以襯返個拖尾花球.....不過我 DIY 喎，對我嚟講，會唔會有 d 難度呢？所以話，家陣先係 5 月，但學得嚟都差唔多啦.....
我原本結婚都plan去"美麗佳人"影架, 因為睇佢地影d相真係好靚, 不過我驚over晒, 所以無去到,期待睇你既結婚相呀...... 我今個月中都會去"緣美傳說"影呀, 希望有好既result啦!!
回覆刪除[版主回覆05/02/2008 10:26:00]其實當初我都係無心插柳下 join 咗美麗佳人，或者係因為佢哋影得譚小環 d 結婚相好靚啩....
我整花環時揾左唔少purple color的花球reference photo. 主要係for襯色,睇下幫唔幫到你.
回覆刪除[版主回覆05/02/2008 10:27:00]好呀好呀，麻煩你比 d 資料我吖，尋晚出到花墟得個桔....完全唔知點入手！
如果自己整呢,不如去一去太子花園街買平野個度啦, 個度d假花十蚊至十五蚊有一扎,扎完個球成本唔使一百蚊. 個度都近花墟同金都.旁邊有好多檔賣平野,有d鋪做窗簾既. 個條街只有一檔買假花,有好多新娘都係度買花自扎花球,勁易搵~ 老細係個阿伯. 花墟既繽紛,應該會靚d,但係樣樣都貴d.但有d花材佢好齊,例如扎花球個雪糕筒.剪花既鐵鉗,固定位置既鐵線等.但如果想再平,深水步有間仲平.不過記唔到叫乜名. 講番你個球,我識好多人鍾意樓下個兩個.但我同你一樣,最鍾意第一個,因為佢夠sharp夠搶,有吸引力!第二個,唔知係咪因為張相朦呢,係覺得無咁靚既!
回覆刪除[版主回覆05/02/2008 10:30:00]多謝你嘅資料呀，如果我早 d 見到你呢個留言就好啦！尋日我哋出到去只係去咗繽紛及溫馨無限，但全冇收穫.... d 花超貴，但男友又唔肯買吉之島嗰 d (不過講真花墟嗰 d 真好多).....偏偏就係搵唔到呢個阿伯間鋪頭喺邊......激氣，又要抽時間去過.....
我打算12月,即係結婚之後先影張coupon呀~
回覆刪除[版主回覆05/02/2008 16:47:00]都好呀，有另一個意思.....我睇咗你個 blog 啦，係你哋周月禮物 ...... 其實你個 idea 都幾好，結婚相唔一定婚前影架嘛！
你都係CHOOSE呢間花店呀?? 我初初都打算搵呢間架, $780全套好抵呀, 不過, 而家可能係金都既一間都買, 因為我買開野, 佢好似計我行我$580全套呀...
回覆刪除[版主回覆05/02/2008 17:31:00]其實我唔係揀呢間花店呀！我只係參考佢 d 花球相咋！影婚紗相個花球我想自己整，到大日子當天先搵花店買鮮花！不過呢間花店 d 花球好靚呀 ~
咦，咁你都幾抵喎，$580 全套包頭花／手花／襟花嗎？
我鍾意第2個花球,不過紫色真係幾難買。努力呀!
回覆刪除[版主回覆05/03/2008 11:41:00]第一同第二個我都鐘意！不過唔知係咪因為色差關係，第一個好似殘 d .......
紫色係靚架, 不過要小心襯, 因為相比下, 我覺得紫色同其他顏色既花會難襯dd.
回覆刪除同埋紫色個tone係比較暗, 比較沈, 所以要小心去陪襯呀!
講返你post個2個紫色花球, 個人意見, 各有各既好處, 如果一定要靚一個既, 我都會揀第一個, 不過我會將佢有d花仔轉一轉color, 因為佢已經好多唔同既花, d color又太多, 我覺得花左少少.
我會將佢加多幾朵主花, 即係紫色玫瑰, 加多2-3朵, 減少d粉紅色既小花仔, 佢有隻應該係繡球花, 如果鍾意照舊用返, 亦鍾意有d綠色既野點綴一下既, 我會將佢打散佢, 或用其他綠色既葉replace左繡球花.
佢個拖尾, 用左隻唔識既紅色一條條既野, 我覺得幾特別呀, 不過我就會又減少dd, 等佢尖尖地, 收落尾, 每個花球修長d, 襯落你到個感覺都唔同d架!
希望你明我意思, 同埋幫到你啦 ! ^^
[版主回覆05/03/2008 11:45:00]某程度上我都 catch 到你意思！我都認同你花種太多，感覺上好似太多嘢咁！如果比我揀，我頂多只會用兩隻花種做主花就算，好大可能會用紫色玫瑰加白色花，清返少少會好 d！
講到個拖尾，我都唔知自己搞唔搞得掂，如果真係搞唔掂，睇怕我都要放棄，用返半圓型花球就算！
ms818講個花園街既檔口, 係太子有2節, 係近花墟個節, 係中間既檔口, 行到中間位左右啦, 就會見到架啦~
回覆刪除唔難搵架! 係花墟個邊, 行落去, 係right hand side呀.
當然啦, 繽紛係靚d, 亦多好多款.
個時我都有行哂花墟2間, 亦有行埋花園街既檔口仔... 不過我真係貪靚既人, 我見繽紛既靚d, 都係返繽紛買lu.
我之前係繽紛有左隻紫色玫瑰花, 一朵花用左2隻料, 係我影相影得麻麻咋, 如果整起花球, 應該都幾特別, 同埋有d閃閃地, 你可以參考下呀 !
[版主回覆05/03/2008 11:53:00]多謝你話比我知阿伯個檔口喺邊呀，大致上我都知啦！等我今日放工再出去睇吓先！
無可否認，繽紛嗰 d 花係靚 d 架～
哎呀... 唔好意思, post唔到張相呢!
回覆刪除我買個紮, 都係$23, 有5朵花, 其實繽紛都一樣有平花架! 不過就要好有心機搵, 當然, compare佢一d貴既花, 一定冇咁靚架啦.
[版主回覆05/03/2008 11:54:00]或者我當日冇比心機搵啦，我見佢一紮滿天星都要 $4x ..... 好貴呀！紮一個花球大大話話要 11-12 枝花，計埋其他嘢，喺繽紛買都好貴呀 ...
d花球好靚丫~~ ~~其實我都中意拖尾~~不過到最後我都係冇揀呢~~覺得好似清d好d~~其實個心都係想有一個拖尾既~~
回覆刪除[版主回覆05/03/2008 11:55:00]我都係呀，逢親拖尾的話我都好鐘意.....haha
加油呀..^^希望你影到正相
回覆刪除[版主回覆05/03/2008 11:55:00]多謝！宜家開始要努力護膚！
其實繽紛同一隻花, 都可能有幾款架.
回覆刪除冇咁真, 冇咁靚既, 就會平d咁囉.
[版主回覆05/04/2008 22:38:00]係呀，好似我之前想買薰衣草，都發覺原來佢有三款，揀到揀死！
第一個隻色深色0的,所以覺得殘0的,無咁SHARP。
回覆刪除[版主回覆05/04/2008 22:39:00]我早兩日買咗部份花材啦，但發覺好似一 d 都唔似第一及第二個......都唔知自己會整咗個咩花球出嚟 ...
慢慢黎啦!加油呀!我初時都係咁架咋,第一次整得唔靚,之後去度溫馨無限見到有個現成花球好靚,,於是左睇右睇,仲影低佢,返屋企慢慢整。你仲有時間,我嗰時都係前幾日先整咋。
回覆刪除[版主回覆05/05/2008 11:01:00]好！我會努力！不過我覺得自己買花材時已經同參考嗰 d 花球出入好大！應該 endup 會整咗一個完全唔同樣嘅出嚟用，哈哈哈！
係咁架啦!你應該印個花球出黎,帶埋去買材料,咁咪對到0的色囉!通常實會買多左0的材料,我嗰時都買多左用唔曬,不過可以用黎整手花,襟花唔好晒。
回覆刪除[版主回覆05/06/2008 10:27:00]......我都對自己冇乜抱有期望.....話唔定我會整咗個唔似樣嘅出嚟..哈!
我都打算咁樣, 如果有花材淨, 就會用嚟整其他嘢, 唔好 side 呀嘛!
比0的信心自己啦~比心機呀!你一邊對住張相,一邊整會好0的,同埋要解剖扎花會易0的。去花店睇多0的人地嗰0的點整吖!
回覆刪除[版主回覆05/06/2008 16:52:00]好! 我會努力! 但首先我要買齊 d 材料先, 睇怕最快都要下個星期初先出到去!
哈哈, 你話要 "解剖" d 花, 好搞笑....
係呀,解剖佢,或者睇到人地嗰0的,就睇下佢點整,之後返屋企慢慢跟住黎整,會易0的架,就咁睇張相好難整得似。
回覆刪除[版主回覆05/07/2008 10:36:00]其實我行花墟時都有 "目及" 吓人哋嗰 d 點整, 宜家大概都有少少 idea, 不過我驚自己諗得太過簡單咋!
慢慢黎,你仲有時間麻,我嗰時係咁睇人地現成既花球,睇完又睇,又親埋0的小花,又睇埋相,整左3小時。你加油呀!
回覆刪除