四川大地震

<<< 豬頭 B，呢篇 blog 我 set 咗只有你一個人可以睇到架咋～ 但我唔係特登寫比你睇，只係寫低自己感受，你有權睇咁解啫～ >>>

今日係 2008 年 5 月 19 日（星期一），亦即係四川大地震（2008 年 5 月 12 日）發生後一個星期。呢個星期入面，無論開著電視又好，喺條街度行緊又好，坐緊車又好，上緊網都好，周圍全部都係講緊賑災呢件事。其實喺呢件事上面見到雖然地震嘅地方係四川嗰邊，同香港唔近，但係香港人都好出錢又出力，好用心咁幫助四川嘅災民。其實我都好想捐錢架～ 我同咗自己講，我呢個星期出街，如果有人主動走埋嚟，隊個錢箱比我想我捐錢，我諗我都會捐架！上次海嘯時我都捐咗，今次應該一視同仁都要捐錢！可惜，件事發生咗一個星期，我都冇預到募捐嘅活動，所以到今日為止，我一毫子都冇捐過.......

講返今日，國務院尋晚臨時宣佈由今日開始一連三日至 21 號都會下半旗誌哀，而且會喺今日下午 2:28（即地震發生時間）全國默哀三分鐘！當時我喺公司，雖然我冇響應默哀，不過我喺心入面都有祝福佢哋！而且 msn 網絡上都發起咗個活動，我哋以 offline 三分鐘嘅行動以表祝福，意思等同默哀咁！呢樣嘢我好響應呀，仲周圍 forward 比人提人要默哀添，希望盡少少綿力啦！

其實呢幾日睇電視，見到好多拯救人員去救人，有時都好想自己有份出力去幫手救佢哋架！我喺度諗，雖然我唔係專業嘅救護人員，但如果我用手一舊一舊石頭咁搬開，我都希望自己可以發揮到作用救到人或者搵到屍體！（但我相信我一定係低估咗救人時所需嘅力量）.....日日睇住有關四川地震嘅新聞，但我就坐喺度好似乜都做唔到咁，都覺得幾無奈！見到 d 災民失去至親，又呼天搶地，有時都感覺到佢哋嗰種切膚之痛！

今晚睇返今日全國人民默哀時嘅片段都幾感人！個個都著素色服裝啦，有 d 手持鮮花，有 d 手持黑手帶／白襟花等等，個個都好有心！好似就算唔關自己事嘅行人，一見到咗默哀時間，佢哋都停低，雙手合十，合埋眼，默哀......嗰種團結嘅感覺好深刻！或者係我眼淺啦，雖然我當時喺公司，街外 d 人點默哀，點鳴笛我唔知，不過喺電視度睇返 d 片段嗰陣自己都忍唔住流眼淚！因為，冇咗至親嗰種感覺都好痛苦（touchwood 我暫時未試過）~ 好啦，今晚臨瞓之前我都會同老天爺爺講聲，希望佢哋得到祝福啦！節哀順變！