買花材，整花球

之前都講過，今年 8 月我會去影結婚相，所以打算 DIY 一個紫玫瑰花花球，用完又可以留念。趁呢幾日放假，就同男朋友去咗旺角及太子買花材啦！暫時買咗咁多嘢，都只係買咗 HK$62，應該都夠用......

主花紫玫瑰，購自「繽紛」，HK$23

貌似滿天星嘅物體，購自「溫馨無限」，HK$8 <--- 抵到爛，因為像真度超高

3 紮唔知叫咩名嘅襯葉，購自「溫馨無限」，3 紮為一組，一組賣 HK$12

黃玫瑰花仔襯花，購自「花園街阿伯檔口」，HK$15

又一紮唔知叫咩名嘅襯葉，購自「花園街阿伯檔口」，HK$10 / 3 串，我只買咗一串，承惠 HK$4

成個花球嘅花材都只係買咗 HK$62，絕對合符 budget。而且如果 d 花材喺晒花園街阿伯檔口買的話，HK$50 樓下一定 OK。但因為我要買紫玫瑰，行咗咁多間，只有繽紛做得最似，迫於無奈之下要買貴花！

其實睇過呢三間熱門嘅花檔，發覺如果唔介意用紅玫瑰／紫色茶花的話，係可以慳到最多錢！因為賣得最平嘅伯伯嗰檔已經做得好似......可惜我男朋友唔鐘意茶花，我又唔鐘意紅玫瑰，否則可能我用 HK$40-50 已經可以買齊晒所有嘢！

 

同場加映，喺「溫馨無限」見到有呢對香檳杯賣，價錢平到你唔信！原價賣 HK$15 一隻，宜家減價賣 HK$10 一對..... 之前喺緣美傳說（即係我註冊行禮嘅證婚公司）已經見過，覺得對杯好靚，用嚟祝酒一流！

呢隻香檳杯唔可以座枱。之前見緣美傳說係插落一兜有顏色嘅沙度，喺溫馨無限都係見到佢哋插落 d 顏色沙度，但我相信都可以插落 d 珠仔度！即係養魚嗰 d 顏色玻璃珠呢 ......

見佢賣得咁平，我哋兩個又有飲開香檳，唔買返一對的話好似對唔住自己喎 ..... 況且，結婚當日真係可以拎去酒樓祝酒用，所以搵唔到藉口唔買喎 .....