花車新選擇

尋晚倫敦的士車主阿達打比我，打算約我今個星期日去睇佢架車。可惜，佢 d 時間及地點都唔係好 fit 我，所以我同架車又再一次無緣見面！不過，原來阿達佢呢排買咗架新車，而嗰架新車都.................................幾鬼靚喎！

係咪好靚呢？不過阿達話個顏色未必同呢幅相一模一樣！佢話會噴白色，但望落去又有少少紫色咁.......好抽象呀......傾完一輪先知道原來佢講緊「薰衣草白色」！呢架車暫時都未開始比人 book，因為仲有 d 手尾要做，大約要到 9 月左右先可以睇車呀！而呢一架新車，阿達話全球得返 100 部，香港都冇架.......呢部係第一部喺香港出現嘅古董車！同佢講咗好耐，先知道呢架車嘅型號叫做「英國古董 mg」。

至於我一向鐘情嗰架紫色倫敦的士係咁嘅：

（攝於早上）

（攝於晚上）

（P.S.：小惠，借你張相一用，但因為未經你同意，我遮咗你同你老公個靚靚樣先）

唔 .............. 邊架靚 d 呢？其實我只係想用紫色花車，只要佢係紫色，我就一定會 book！好典型嘅一個紫色迷 ........（題外話：日頭同夜晚個色差竟然咁大喎，夜晚睇好似棗紅色咁嘅）

至於新車嘅價錢方面，我冇問到阿達，但我預咗新車一定會貴 d！不過唔緊要啦，都洗咗咁多錢咯，如果真係鐘意的話，我都願意租架貴 d 嘅花車嘅！但最終都要同男朋友商量一吓究竟租邊架先。如果要一次過睇晒兩架車，阿達話要入去沙田先得，因為架新車暫時泊咗喺沙田！之不過，去沙田我簡直係無任歡迎，因為男朋友媽咪咪住喺沙田囉！到時阿達會再 "渣" 埋架倫敦的士過嚟，咁就可以一次過睇晒兩架車啦！

仲有，之前阿達話會同架紫色倫敦的士轉色，初時擔心到我死死吓，不過尋晚問完佢之後，佢都話應該唔會轉紫色呢架啦！因為紫色呢架真係比較多人租，佢反而會轉粉紅色嗰架喎，佢話粉紅色好似冇乜人租咁，打算將佢轉埋紫色（好似係，唔知有冇記錯！一聽到佢話唔轉紫色嗰架，我已經開心到死，冇留意佢之後講乜添  ）

最開心嘅係，我雖然之前 hold 咗日子及 hold 咗架車，但係阿達話佢新車落地之後，會約返所有之前 hold 咗倫敦的士嘅客，比佢哋睇新車，仲可以優先轉新車 ........ 咦，咁我咪有份囉？呵呵呵！小惠，你都應該有權轉新車喎 ~ 諗諗佢吖！