拍拖 3,000 日

今日，係我同男朋友拍拖 3,000 日。

其實最初都冇打算去慶祝呢 d 紀念日子架，不過源於上年上網擇日結婚時，對住個萬年曆，心血來潮想計一計我同佢拍咗拖幾多日，另一方面我又好想為佢做返 d 嘢，去紀念一吓呢 d 日子（因為一向我都係被氹嗰個），所以就決定慶一慶佢啦。由於 1,999 日已經過咗，唯有慶祝 2,999 日囉！我計得好準架，邊年係潤年 (即 366 日）都計埋，所以應該冇錯架啦！

不過，慶祝還慶祝，我冇諗住大搞。最初只係想拿拿臨返去佢屋企煮餐靚飯慰勞吓佢，點知.....計吓計吓 ，發覺原來如果要煮飯的話 d 時間唔係好夠用！鬼咩，一個喺銅鑼灣返工，一個喺天后返工，屋企又喺洪水橋，點煮啫？買埋餸返到去都八點幾啦，婚後都唔知點算！

既然係咁，好，出街食啦！我喺公司準時收工走人，打算一邊行一邊等佢收工，應該都好快啫，點知等呀等，等呀等，原來佢喺公司冇端端比人捉住傾嘢，足足等咗一個鐘頭有多佢先放工 ~ 結果，我哋就好晏先開始食晚飯，再喺銅鑼灣行一陣就快快趣返屋企 lu ...... 因為 ........ 我靜靜雞喺 Haggen-Dazs 訂咗個雪糕蛋糕呀，雖然有乾冰可以幫手冰住個蛋糕，不過我都唔想咁夜先開始食，人家要減肥嘛 ..... 8 月要影婚紗相架啦

呢個就係個蛋糕個樣啦 ~

睇吓個牌仔 ......... 「拍拖 3000 日」~ 訂嗰陣要我寫呢句 message 落張訂單度都冇乜嘢架，但係我去拎蛋糕時，由於個蛋糕一早好公開咁雪咗喺 Haggen-Dazs 嘅雪櫃入面，間舖頭又多人喎，個職員拎蛋糕出嚟嗰一刻 ......... 唔知點解好多人望一望個蛋糕個牌仔，再望一望我本人 ......... 有咩好望呢？未見過人咁樣慶祝咩？？？哼！

男朋友一早知我尋晚會同佢慶祝 d 嘢（不過佢唔係好 exactly 知道我要慶祝 d 咩），不過佢都唔輸蝕，鬼馬嘅佢 ....... 原來走咗去 agnes b. 買咗 d 朱古力比我食，Yeah！！！又係 agnes b.，又係朱古力！！！

呢款我未食過，只係幾個禮拜前生日時同事買咗另外一款比我 ~

好！我決定咗，我要再同男朋友（到時應該係老公啦）慶祝 9,999 日 ......... 不過粗略計一計，9,999 日係要 27 年嘅日子 ...... 嘩，好長遠呢 ~