agnes b. 陪我過生日

2008 年 5 月 9 日 (星期五)，係我 26 歲生日.....今年嘅生日，有好多 anges b. （我最鐘意嘅品牌之一）陪我過呀！好開心 ~ 因為正日當日我一早已經請咗假同男朋友去玩，所以公司同事們就同我提前一日（即 5 月 8 日）慶祝啦！

先有同事送比我嘅生日禮物（全部都係 agnes b. 朱古力，啱晒我呢個朱古力怪 ）

呢個鐵盒可以儲起，正 ~ 內裡係一 d 朱古力豆

再有一粒印有 agnes b. 字樣嘅朱古力，同事話係檸檬味，我仲未試....

到咗下午 5:00 左右，再有公司送嘅兩個 agnes b. 生日蛋糕（每個兩磅左右）.......開心死我啦！

左：Blueberry Tart   右：Chocolate Truffle Cake <-- 咁鐘意食朱古力嘅我，又點可以冇朱古力蛋糕呢？

我與兩個蛋糕的合照......

放工後，同男朋友出街慶祝生日前夕！去咗銅鑼灣某一間日本店食迴轉壽司，夜晚返屋企倒數 00:00，迎接 26 歲嘅生日......點知，又有 agnes b. 生日蛋糕食，仲要同公司買嗰個朱古力味一樣添.....不過，同男朋友食生日蛋糕與同公司同事食係兩種感覺。

下面呢個牌係男朋友設計，特登叫 agnes b. 嗰邊跟住畫架 ......

之後男朋友送上生日禮物一份.......係 agnes b. 電話繩一條！呢條電話繩我想買好耐，但因為之前嗰幾個月為個婚禮用咗太多錢，另一方面又要儲錢準備將來用，所以一直都想出多幾個月糧先去買 ....

有蛋糕食之餘，我哋仲開香檳慶祝......

呢個時候，又點少得我同個生日蛋糕嘅合照呢？（P.S. 因為喺屋企嘅關係，除咗 con，戴咗眼鏡，真正一個四眼妹）

當我以為生日前夕嘅慶祝活動經已全部完畢後，第二朝一瞓醒踏出房門嗰一刻，竟然見到又有另一份禮物 ........... 男朋友非常古惑，究竟佢尋晚將份禮物收埋咗喺邊呢？點解咁大份我一 d 都見唔到？而佢又點樣一早擺定喺張梳化度？我同佢一齊入房瞓，一齊起身架喎 ..........

原來係 agnes b. 手袋一大個，個袋大到簡直可以袋一隻狗出街 ~ 我到宜家都懷疑呢個係男裝袋 ........

之後，我哋入咗去東涌 + 大澳過咗一個非常 relax 嘅一日，超正 .......