PN 結婚介子 - 未攞得住呀......

用少少篇幅講一講 d 絲花先 ~

話說上一次我出咗去太子 + 旺角買絲花準備做花球，雖然我話想做第一幅或第二幅圖 (如要睇圖，請到 http://hk.myblog.yahoo.com/jenny-chiu/article?mid=876 )，但買買吓，我發覺我一定做唔到嗰個樣......買埋買埋 d 花種同嗰兩個有好大出入.......算啦，唯有做另一個自己鐘意嘅囉！凡事都唔可以強求，尤其是我呢 d 冇乜心機做手作仔嘅人！

暫時，我只係買咗一束黃玫瑰仔及一束類似竹葉嘅物體，只係打算用嚟當襯花咋！而主花紫玫瑰，我打算喺繽紛買，因為睇過阿伯嗰檔 d 花之後，都係覺得繽紛做得似 d！另外會買白玫瑰襯托一下，希望會做得好好睇睇啦！但我有個問題想問大家，你哋一般會唔會再買個類似雪糕筒嘅物體做手柄呢？定係求其搵條草繩紮住所有花莖就算？我仲猶疑緊點搞好 .......

好！講返 PN 對結婚介子！早幾日前已經收到 PN 打比我話可以攞得，所以我買完部份花材之後順便去 PN 試 size。可惜，都係空手而回！因為男朋友隻介子要再加大多一圈......唔知佢呢排係咪肥咗呢？竟然之前個 size 唔啱帶喎！佢一帶隻介子上手時，其實好明顯手指周圍 d 肉都被吱咗出嚟，氹氹轉圍住隻介子，.......唔.......都有少少核突！不過加大一個 size，又好似危危乎就跌就跌咁......所以我哋都猶疑咗一陣先決定改大架！但我突然諗到，呢隻介子佢會帶一世，我相信佢唔會永遠都係咁嘅身型，我估佢一定會肥落去......（哈，我知你有睇我個 blog，但我堅信你一定會膨脹  ---- 仲可能短時間之內添），既然係咁，不如索性改大佢，還掂當時佢隻手未算係最熱，話唔定改大一個圈先至係最 fit！就係因為咁，對結婚介子又要等多兩個星期 lu ~ PN 話預計 17-5-2008 有得攞！

改大一個圈，又要比多 $100，因為 PN 規矩，18 號 size 以上的話，每加多一號要加多 $100！上次訂造時已經要求要 20 號，加咗 $200，但今次改大多一號，即 21 號，要補多 $100。講真，比多 d 錢我一 d 都唔介意，最緊要帶得好睇，而 d 錢係比得「有必要」及比得「值得」，咁就 ok 啦！

期待 17-5-2008 去再攞介子