Craft Punch

五一勞動節嗰日出咗花墟諗住睇吓 d 絲花紮花球，由於我哋打算夜晚去睇戲，所以買咗戲飛，可以睇花嘅時間唔多，大概得一個鐘 + 45 分鐘左右！

一開始殺咗入溫馨無限，下層冇嘢睇，所以衝咗上上層！發覺其實佢都有 d 現成嘅絲花花球及襟花出售，襟花的話大概有六朵，賣 HK$9x，如果到頭來我發覺自己整唔掂，睇怕都要買現成啦！之後再去絲花嗰邊望吓，d 花都幾真，價錢一般，不過款式反而唔叫做齊！起碼冇咗我要買嘅紫玫瑰花先啦！之後見到白玫瑰，嘩，佢 d 白玫瑰好真呀......可惜我未必用得著 ...... 再去配件嗰邊望望，價錢一般啦，因為我喺返工附近見到間文具舖，佢賣 d 絲帶仲平，不過當然冇呢度咁 pro，咁齊款啦！結果一 d 收穫都冇，就殺去繽紛睇！

去到繽紛，簡直令我大開眼界啦，佢 d 花款好齊呀，而且仲幾真，不過好貴呀 ......我見到有兩款我要買嘅紫玫瑰絲花，但要賣 $38 一紮，一紮大約有 7 個頭左右，圍返好似又 ok 喎 ~ 不過當然唔買住，因為我打算去各位朋友都讚嘅伯伯檔口睇吓先決定！可惜當日因為趕住入戲院睇戲，真係冇太多時間周圍搵阿伯嗰檔嘢，結果絲花方面空手而回！好在，呢幾日有好多熱心網友（例如 WanLing，MS818 <-- 錫晒你哋）好清楚咁話比我聽阿伯個檔口喺邊，所以我決定今日放工再去殺過........

雖然絲花方面冇收穫，但我喺女人街就買咗幾個 craft punch，打算 DIY 註冊邀請咭／table no. card／table menu 時用架，而且價錢仲好抵添！如果有朋友想去買返個，你可以去女人街睇睇，有好幾檔都有賣，不過千其唔好中計，你行入 d，就會發覺越行得入，賣得越平！好似我咁，街口頭幾檔有得賣，最大嗰個賣 HK$38 ....... 行前少少嗰檔賣 HK$35，我都係唔買住，行多一段，又見到有得賣，仲見到有個女人講緊價，佢由 HK$25 講到 HK$20，咁我咪喺側邊扮吓睇嘢，見到佢成交咗，我又同個老闆講要賣 HK$20 比我，哈！成功！結果我買咗三個唔同 size 唔同款嘅 punch，承惠 HK$50 大洋！

價錢（由左至右）：HK$20    HK$20   HK$10（細嗰個原價 HK$15，但個老闆見我買咁多個，自動平咗 HK$5 比我）

老闆話初初印嗰幾個會有油漬（可能因為要潤滑吓個切面），不過你印多幾個 d 油漬就會冇架啦！

呢個一睇就知係用嚟修飾個角啦 ...... 幾靚架！個 punch 個樣其實就係第一幅相中間嗰個，有冇發現佢側邊多咗兩塊白色嘢？就係比 你 "zip" 張紙角入去，如果你唔鐘意，其實嗰兩塊白色嘢可以拆走，都照樣可以印到個圖案出嚟架！

呢個心型圖案男朋友覺得好靚，所以我哋都買埋！

可能會有朋友問我做咩咁快買定，要 DIY 的話起碼都下年先買啦！不過我同男朋友都認為呢 d 小玩意都只係 hit 一排，既然價錢平又見到有得買咪買咗先囉，好過到我真係要用嗰時都唔知喺邊度買返。

另外，尋日放工收到另一個好消息！旺角 PN 打電話比我，通知我嗰對結婚介子已經做起咗，仲到咗舖添啦！我隨時可以落去試 size 啦！所以，既然我今日出開旺角花園街睇花，不如順路上去攞埋介子啦......yeah！到時再影相上嚟.....超期待！