我架紫色倫敦的士........前路茫茫

今日不斷上 esdlife 同一班同我同年同月同日結婚嘅準新人傾計, 傾到租車問題, 原來佢哋好多人都鐘意倫敦的士架, 咁我梗係 show 一 show 之前搵阿達嘅資料, 睇吓可唔可以幫到其他準新人.......突然間諗起, 原來我個 booking 其實都未 confirm, 所以放工就打比阿達, 諗住約佢睇車, 之後落訂, 就會搞掂租車嗰 part~

打比阿達, 講到尾佢都係唔肯接我個 order, 原因係佢有可能同架車轉色呀~~~ 唉~ 咁我個紫色點算呀? 佢解釋因為通常暑假冇 order, 所以架車有咩嘢大修, 翻新都會喺暑假做.... 佢哋有諗過同架車轉色, 但仲未肯定係咪真係會轉, 佢話都會視乎返市場反應而定~ 咁我即刻同佢講其實都有好多準新人都搵紫色嘅倫敦的士 (係真架噃), 我仲 lur 佢叫佢接埋我個 order 先轉色等等~ 佢話其實佢都知有好多人都特登租架紫色倫敦的士結婚, 所以好大機會都會 keep 返紫色, 最多調返少少色 tone, 例如噴一個淺少少嘅紫色! 其實對於我嚟講, 只要係紫色, 無論係深紫定淺紫我都鐘意, 所以聽到佢咁講, 個心都定少少, 因為始終都仲可以租到一間紫色嘅倫敦的士比自己結婚....不過佢一日未 confirm 咩色, 我個心一日都唔安樂, 萬一佢真係轉色, 我都唔知喺邊度嘔一架紫色嘅倫敦的士出嚟做主花車..........

講講吓, 車主阿達話遲 d 佢會出多一部車, 係舊版少少嘅 (唔知係唔係倫敦的士啦), 顏色方面都會以紫色為主, 但會係好淺好淺嘅紫色, 近乎白色咁滯喎......唉, 都唔知阿達點諗......其實佢知道咁多人鐘意紫色先會出多一部紫色嘅車架嘛, 無端端又做咩改顏色呢? 希望佢真係會 keep 住紫色啦! 因為佢話好大可能唔會轉色嘅, 唯有信住佢先啦! 之後佢仲問我結婚嗰日係咪好好好日? 因為計埋我, 一共有三個人都想喺嗰日租車, 又係租紫色, 不過好在我係第一個搵佢, 佢一定會優先比我, 叫我一定可以放心! 咁都好 d, 如果佢真係 keep 住紫色, 睇完車之後冇咩嘢我都會 confirm 啦! 唔等啦! 費事夜長夢多 ~~~