婚禮攝錄

尋日又搞掂多一樣嘢 lu, 就係婚禮攝錄啦!

話說自從知道有網友 book 唔到攝錄後, 我就更加加把勁去搵呢方面嘅資料, 當初真係無從入手, 唔知點搵好, 忽然醒起之前行咗幾次婚紗展, 攞埋攞埋 d 單張終於可以大派用場!

由於我同男朋友都想搵一個 snap shot 師父喺結婚嗰日幫我哋影相, 但有提供 snap shot 服務嘅公司只有兩間 : (1) 海洋專業婚禮服務 (2) 囍結良緣..... 比較過價錢, 所包嘅禮品, 我仲打過電話去兩間公司, 問埋同一樣嘅問題, 測試吓佢哋 d 服務態度, 發覺兩間其實都差唔多, 不過始終 "海洋" 嗰間送嘅嘢多 d, 所以尋日就同男朋友踩上門, 睇佢哋 d 相辦, 同佢哋傾 package 啦!

去到間鋪, 講真.....都幾細, 可能因為放咗好多衫 (因為佢哋都有租衫服務), 不過勝在服務態度真係唔錯, 咁咪坐低睇吓相辦囉, 況且我哋本身都真係有心 join 嘅! 其實影得好唔好, 我真係唔識評, 企定定影一幅相出嚟, 講真個個都差唔多, 只有 snap shot 先可以睇到個師父嘅功力, 好可惜, "海洋" 嗰度 snap shot sample 唔多, 因為好多時對新人都要走晒, 不過見佢普通影相及成長片段嗰 d 都做得唔錯, 加上我去之前都有喺 esd life 做功課, 絕大部份人都話呢間嘢質素 ok, 所以喺冇乜相辦參觀嘅情況底下就 join 咗 package, 好似冒險咗少少, 不過暫時都覺得 ok!

佢哋嘅 package 係咁嘅:

HK$5,688 (1個攝影師, 1個 videoman, 1個 snap shot 師父)

影數碼相要加 HK$1,200 (菲林唔洗加錢, 但沖晒費及菲林費都幾甘)

3個師父會跟足全日

成長片頭 (約 25 張相)

一隻 DVD, 會剪輯返全日嘅 video (記住係剪輯, 唔係足本版)

8 x 12 吋電腦編輯相簿一本 , 呢本嘢會好似影婚紗相咁做晒 coating, 佢哋話大約可以放到 300 張相, 但主要會用 snap shot 為主, 但最終決定權當然喺我哋度啦

另外仲有 3 樣贈品, 暫時只係揀咗要一本 12R 雜誌式相簿連相, 呢本相簿大約可以放到幾十張相, 佢話原價係 HK$980 喎 ~

其餘嗰兩樣, 好有可能會揀 (1) 雙方邀請卡 100 張 (註冊用, 因為應該冇提供邀請卡), (2) DV 母帶, 到時科技發展成點都好, 都可以 dup 返出嚟, (3) 8 x 10 吋油畫連相架, (4) 20 x 24 吋大相一張

到時再決定~~~

師父方面, 佢哋話如果指定師父, 而個師父有期的話, 就唔洗加錢 ~ 之前喺 esd life 做功課, 聽聞話老闆 Hero 影相好, videoman 就係阿健好, 所以我諗都唔諗就指定要佢兩個, 咁啱佢哋又有期, 梗係 mark 實佢哋啦! snap shot 方面真係唔知搵邊個好, sales 推介用阿風, 我唯有信佢啦 ~ 其實個 sales 之前話影相阿進都唔差, 不過有得揀老闆梗係揀老闆啦, 起碼結婚當日另外嗰兩個師父見老闆喺度應該會打醒十二分精神, 應該唔會遲到, 應該樣樣嘢會跟足 d, 因為老闆自己應該都唔想做壞招牌架 ~~~ 聽聞個老闆 Hero 仲上過生果日報添喎, 應該有返咁上下啦!