2 in 1 佳偶天城 VS 緣美傳說

其實由籌備婚禮開始, 自問最著緊就係擺酒及註冊場地, 或者因為自己覺得註冊宣誓嗰一刻好重要, 而且我亦都決定註冊時 march-in 會由阿爸領我行入去, 感覺上有 d 似行教堂 ~ 當我正式嫁咗比某某人時, 夜晚婚宴 march-in 先同另一伴行! 由於我同男朋友都唔係教徒, 唔可以隨便搵一間教堂行, 但我哋又好想 "感覺上" 似行教堂... 加上自己唔係咁鐘意酒樓證婚, 因為個氣氛實在較難控制, 我唔想見到我註冊時有人講電話, 食嘢, 打機等等, 最後連註冊處都未必會諗, 因為.......純粹因為佈置唔夠靚, 所以就不斷上網搵吓有冇地方可以靚得嚟似教堂, 又可以做証婚。其實香港可以做証婚嘅場地真係唔多, 來來去去都係得伊甸園最出名, 不過由於佢當初壟斷咗市場咁滯, 得到太多 bad comments, 又好似唔憂做咁, 之後 2 in 1 及新開嘅緣美傳說就越嚟越多人講 ~ 所以尋晚都上咗呢兩個場睇睇, 比較一吓個感覺, 仲影咗少少相。以下係自己嘅個人感覺:

2 in 1 佳偶天城

証婚禮堂

2 in 1 有兩個証婚禮堂, 一個叫 "夢幻城堡", 另一個叫 "浪漫花園", 詳細環境係點我唔多講, 因為上佢哋個網站都有得睇相。整體嚟講兩個禮堂比我嘅感覺都幾滿意, 幾舒服, 兩個禮堂 march-in 嘅長度粗略咁計算過, 大約係10米, 但樓底都係偏矮, 不過可以接受 ~ 所有設備都有齊, "夢幻城堡" 仲有電子琴租用, 租金為 HK$100。紗布, 枱椅等等嘅嘢都尚算新淨! 雖然好多人都話佢哋個 backdrop 好假, 但我認為只要揀返用紗布, 就唔會有呢個問題 ~ 不過都聽人講過, 就算用假嘅 backdrop (即嗰 d 乜乜薰衣草園等), 肉眼睇當然假到震, 但影出嚟都可以接受。

新娘房

兩個禮堂自然有兩個新娘房, 但我只係參觀咗其中一個, 新娘房同個禮堂好接近, 唔怕著住件婚紗行得遠, 而且房嘅大細都 ok, 除咗新娘自己 + 化妝師, 可以企多 2 個人左右, 即一共 4 個人。新娘房有簡單嘅佈置, 有大鏡等等 ~

Sales 服務

其實個 Sales 服務好好, 呢樣好多網友上過去都會讚, 佢哋真係好有心機講解比你聽, 解到你明白為止, 而且仲好有禮貌, 呢樣嘢伊甸園可能比較輸蝕

拍攝區

2 in 1 出面仲有幾款拍攝區, 不過都係一 d 佈景板, 其中一個係南瓜車咁款, 而另一個係用薰衣草做背景, 但前面加咗鞦韆, 但係兩樣都可以真真實實坐人上去

Package 及可供証婚時間

星期一至五          HK$1,300

星期六                  HK$2,800

基本費用包括:

- 證婚禮堂租用 30 分鐘作註冊儀式

- 婚姻監禮人

- 司儀一位 (可以免費指定司儀)

- 結婚證書封套

- 借用羽毛筆及介子枕

- "結婚進行曲"作進場及儀式背景音樂, 亦可自備音樂

- 儀式前使用新娘房 30 分鐘

- 儀式後到拍攝區使用 30 分鐘

- 可加 HK$150 代辦 "擬結婚通知書" (HK$305 另計)

- 証婚時間為 10:00 - ??? (唔記得, 好似 4, 5 點左右啦, 夜 d 都可以, 但証婚人需加錢)

聯絡資料

地址: 尖沙咀麼地道 66 號尖沙咀中心 LG 30-33號

電話: 31675777               網址: http://www.2in1.com.hk            電郵: 2in1@2in1.com.hk

結論

總括嚟講, 2 in 1 比我嘅感覺係一種童話式嘅感覺, 的確係除咗伊甸園之外另一個較好嘅証婚場地。

 

緣美傳說

証婚禮堂

緣美傳說都有兩個証婚禮堂, 一個叫 "粉紅玫瑰禮堂", 另一個叫 "白玫瑰禮堂", 要睇相可以碌落下面。"粉紅玫瑰禮堂" 係以粉紅色襯紫色為主, "白玫瑰禮堂" 就以金色襯白色為主, 雖然係金色, 但係令人舒服嘅金色, 唔會係 "燦" 死人對眼嘅金色! 整體嚟講兩個禮堂比我嘅感覺仲更加滿意, 因為兩個禮堂都好有教堂 feel, 我都講過, 我同男朋友兩個勁想好似可以行教堂咁, 緣美傳說就做到呢個感覺比我哋! 兩個禮堂 march-in 嘅長度粗略咁計算過, "粉紅玫瑰禮堂" 大約有 6 米, "白玫瑰禮堂大約有 9 米, 但樓底都係偏矮, 不過又係可以接受, 或者係因為商業大廈問題啦。紗布, 枱椅等等嘅嘢都完全似足一個教堂! 容納人數方面, "粉紅" 嗰個共有 10 張長椅, 每邊排 5 張, 你預每張長椅可以坐 5 個女仔或 4 個男仔, 佢哋話可以坐 50 人左右。至於 "白玫瑰" 嗰邊個 hall 總共有 14 張椅, 每邊排 7 張, 可以坐大約 70 人。

新娘房

佢哋都有兩個新娘房, 而且仲係左右相連, 即係好似眼鏡房咁, 我睇完場之後膽粗粗咁劃咗一個比例完全唔啱嘅 floor plan, 想睇都係碌落下面。兩個新娘房一眼望晒, 講真, 細咗少少, 基本上新娘著住件婚紗, 加埋化妝師, 頂多可以容納多一個人已經有 d 迫嘅感覺。不過佢哋會襯返每個禮堂嘅顏色, 兩個新娘房一睇就知邊個 hall 用邊間房。另外, 睇過 floor plan 就知, 粉紅玫瑰嗰個新娘房同禮堂距離較遠, 要著住件婚紗行多兩步。兩間新娘房都有簡單嘅佈置, 但係就冇全身鏡啦 ~

Sales 服務

完全唔覺得佢哋係 Sales, 佢哋好 nice, 會向你 present 每個位點解要咁設計, 背後有咩原因等等, 我都未見過 Sales 會咁樣, 或者係另類手法啦! 不過都有睇過緣美傳說嘅網友都讚過佢哋嘅態度, 或者因為佢哋係新開張, 心入面仲有嗰團火, 好多嘢都會問你作為一個客人覺得點, 仲肯聽你意見做修改, 搞到自己好似有份投資咁, haha

拍攝區

雖然佢哋聲稱話會有拍攝區, 不過講真我搵勻都只有門口嗰個拱門花圈可以影吓相, 其他都冇.... 不過佢哋話會一路加佈置, 希望每對新人去到任何一個角落都可以影相, 嗱嗱嗱, 咪話佢哋仲有 heart 囉, 不過三五七年之後.....唔知仲會唔會咁熱情?

Package 及可供証婚時間

星期一至五                              HK$1,800

星期六、日及假期                  HK$3,800

基本費用包括:

- 證婚禮堂租用 30 分鐘作註冊儀式

- 婚姻監禮人 (佢哋話有得揀律師, 例如想要 funny, 嚴肅, 感性等等...)

- 司儀一位

- 結婚證書封套

- 借用羽毛筆及介子枕

- "結婚進行曲"作進場用

- 儀式前使用新娘房 30 分鐘

- 儀式後到拍攝區

- 可加 HK$180 代辦 "擬結婚通知書" (HK$305 另計)

- 証婚時間為 10:00 - 5:00

- 12月24、25及31日, 1月1日, 2月14日, 年三十晚需另加服務費 HK$800

聯絡資料

地址: 尖沙咀諾士佛台一號 7 樓

電話: 21522252               網址: http://www.eternalring.com.hk (仲整緊)

結論

總括嚟講, 緣美傳說比我嘅感覺係好似教堂咁, 開正我嗰瓣, 而且佢個 "白玫瑰禮堂" 比我有一種好莊嚴嘅感覺! 婚姻係神聖, 係莊嚴, 所以我應該會揀呢個禮堂做証婚場地。大家唔好同我爭呀!!!!!!!!! 而 "粉紅玫瑰禮堂" 就好靚, 個背景更加似教堂, 因為佢整咗嗰 d 教堂成日用嘅顏色玻璃 (唔識形容, 大家明唔明? 唔明索性睇相啦), 不過我鐘意金色嗰個多 d!!! 除此之外, 佢哋仲做埋租衫, 婚宴當日攝錄, 化妝, 外影等等, 都有 package ~

 

可能因為係我部手機嘅問題, d 相有少少色差, 不過每個地方嘅第一張先係正確嘅顏色! 另外, 大家將我影 d 相當參考好啦, 因為我冇攝影技術, 有陣時好大嘅地方比我影到好細, 所以大家都係實地視察吓好 d, 唔好淨係相晒我 d 相呀!

粉紅玫瑰禮堂 (由門口影入去) (實地顏色)

粉紅玫瑰禮堂 (禮堂近鏡)

粉紅玫瑰禮堂証婚枱

粉紅玫瑰禮堂 (由舞台影去門口)

粉紅玫瑰禮堂長椅

白玫瑰禮堂 (由門口影入去) (實地顏色)

白玫瑰禮堂 (由舞台影去門口)

白玫瑰禮堂長椅

白玫瑰禮堂新娘房 (偏細啦) (實地燈光顏色嚟架)

.

緣美傳說大門口 (可供影相嘅拱門) (實地顏色)

雞尾酒會房間 (好似都係偏細, 不過會加返 d 佈置, 唔會咁寡) (實地顏色)

兩個禮堂都有嘅畫架, 不過到時唔會放油畫或放相, 只會寫住 XX & XX Wedding Party

一個會笑大人哋個口嘅自畫 floor plan