第一次著婚紗......感覺 ------ 好難忘

話說我呢排繼續好努力咁搵緊婚禮嘅資料, 當搵到租衫時, 原本打算喺尖沙咀 d 樓上舖租, 價錢大約係 $4,xxx 有5套左右, 都算合理吖!!! 但係忽然醒起.... 自己住元朗區, 點解唔搵吓元朗區 d 租衫公司呢? 所以就上網集中搵元朗區啦, 唔搵由自何, 一搵就覺得自己好醒....因為喺元朗租衫真係好好好好抵! 價錢大約係 $4,000 有找可以租到 10 套衫..... 冇睇錯.... 係 10 套衫!!! 仲要係差不多成個元朗區都做緊呢個價錢, 至於質素方面, 其實如果冇乜特別要求, 元朗區 d 衫都唔差架, 尤其是係婚紗款, 都幾得..... 晚裝....或者自己一路都未搵到心水晚裝, 硬係覺得唔係件件靚, 不過如果要求唔高, 元朗區 d 晚裝都見得人!

我去咗以下呢幾間 (由下午 4:00 左右出發, 睇到 9:00 左右, 都掃咗 8 間, 犀利!)

1) 麗新 (冇留意地址, 咁啱見到咋)

2) 愛華 (炮仗坊 7 號)

3) 壹婚紗 (谷亭街11號傑文樓1樓 F 室)

4) 雅麗 (教育路 69 號)

5) 鴻運 (教育路 59 號)

6) 感恩無盡 (誠信商業大廈 1102 室)

7) 微微 (西裕街 18 號好發大廈 9 號)

8) 蜜兒 (大馬路, 恒香對面, 好易搵)

總括嚟講, 以上呢幾間 d 衫都 ok 嘅, 婚紗款式嚟講, 個人比較鐘意 "感恩無盡" 及 "愛華", 至於晚裝.... 都係嗰句, 偶有佳作囉, 但要慢慢揀, 自己覺得晚裝最靚係 "雅麗"! Sales 嘅服務態度真係幾好, 個個都同你傾計, 又會幫你搵衫, 最無得彈就係 "感恩無盡", 可能因為係基督徒開嘅, 所以成日都笑笑口, 又好禮貌, 件件衫都攞出嚟比你拼上身, 完全唔會覺得你煩或者無心租等等, 但相對地呢間較貴, 因為無 package, 係逐件衫計, 不過當然越租得多越平, 第 5 件起每件租金約 $526, ok 啦, 有款吖嘛! 所以我第一件著上身嘅婚紗就係呢度試....我去咗 8 間鋪頭, 有幾間都話我身型夠高, 勸我著 A-line 款, 加上男朋友又話我著 A-line 好睇, 但我硬係認為婚紗應該係有少少傘型先夠隆重, 先似係一個新娘子, 有時衰 d 講句, 有 d A-line 裙有 d 似睡裙囉..... 所以我仲要說服一下自己先! 就係因為咁, 我就試咗呢一生人第一件 A-line 婚紗上身..... 一試出嚟, 有 d 睇唔慣囉, 睇唔慣自己著長裙, 仲要係拖尾, 行起路時好似有 dd 阻滯, 但我一定會克服, 因為我一定要租一件拖尾婚紗, 拖尾實在太靚啦!!!

試咗出嚟, 男朋友及 Sales 都話我著得好睇, 因為夠高, 仲話好多準新娘子想著 A-line, 但由於個人身高問題著唔到, 最終都要租返傘裙, 佢哋仲話既然我有咁嘅身高, 千其唔好 side 咗呢個條件, 強烈要求我第時要租 A-line..... 咁點算呢? 雖然我唔一定要傘裙, 講真我自己都接受唔到太 "牙渣" 嘅婚紗, 但少少傘我可以接受囉.......試咗件婚紗之後我唔記得影相呀, 留唔到個好回憶比自己, 不過算啦, 下次我真係開始租衫的話, 我一定要影低 d 相, 又可以做對比!

其實試婚紗真係好好玩, 可以見到不同造型嘅自己, 幾得意, 不過今次第一次著, 真係好難忘, 又有少少窩心嘅感覺.......幸好, 第一次著婚紗時第一個見到嘅係自己男朋友 (當然除咗 Sales 之外啦), 呢個 "第一次" 好緊要, 如果我第一次著出嚟唔係男朋友睇到的話, 我諗我會覺得有遺憾!

試完婚紗, 成晚興奮到訓唔著, 或者自己有 d 誇張, 但嗰種心情真係好興奮同好難忘, 最終喺張床到典到 3:00 先訓得著 (不過我 2:00 先訓), 因為個腦不斷浮現返著出嚟嗰一刻嘅情景! Very good!!!!