我嘅姊妹團會係我讀中學時嘅一班死黨兼姊妹.....總共會有 5 個....
人哋話係咁計嘅 :
新郎 + 新娘 (為一組) <-- 2 人 (雙數)
伴郎 + 伴娘 (為一組) <-- 2 人 (雙數)
兄弟 + 姊妹 (為一組) <-- 各 5 人, 即共 10 人 (雙數)
之前原本諗住唔包佢哋嘅服裝, 但會包化妝 + set 頭, 因為我都想佢哋嗰日靚靚架嘛 ~ 唔包服裝嘅原因, 就係怕唔知會唔會有 d 姊妹唔鐘意被統一服裝, 但作為主角嘅我, 我偏向統一佢哋, 咁樣影出嚟嘅相會靚好多! 再諗深一層, 其實做姊妹嘅.....係咪唔洗 set 頭呢? 我班姊妹......應該個個都識化妝啦, 我相信佢哋應付得嚟嘅, 只係希望到時唔好掛住補妝, 唔理我、唔幫我就得啦!
講開姊妹裙, 尋日行旺角新之城, 發覺二樓有幾間舖頭賣姊妹裙, d 款都幾得喎, 不過普遍係短裙... 人哋話去到酒樓時應該要著長裙, 咁樣會比較莊重 d, 不過我又覺得....雖然佢哋賣短裙多, 但 d 款全部出得大場面, 而且價錢方面....非常抵呀 ~ 最平嘅承惠 $59, 最貴嘅都只係 $200 之內 (冇睇漏眼嘅話), 如果要求唔高, 包佢哋一條 $100 以內嘅裙, 仲抵過上廣州婚紗街買喎 (之前喺 esd life 聽人講, 廣州買姊妹裙, 講完價都要 $300 / 2條) 我同男朋友都睇中咗一條, 價錢係 $120, 個款幾靚架, 有 4 隻色, 質地有 d 似絲質咁, 光身嘅, 腰位嘅左邊有個蝴蝶結, 修腰款.....等我遲 d 帶班姊妹去睇睇先!
就係因為咁, 我暫時又做咗另一個決定, 包姊妹團嘅服裝, 但唔包化妝 + set 頭 lu ~ 唔知....我算唔算 cheap 呢?
至於男朋友嘅兄弟團, 其實我都冇同佢傾過會點處理佢哋嘅服裝問題! 相信離不開西裝恤衫打呔! 講開呔, 我宜家想喺街邊 (好衰咁呢) 買條一模一樣嘅呔比佢哋打, 之後再比個色 tone 佢哋買西裝, 咁都夠晒統一啦啩! 西裝顏色方面, 我諗應該都係黑色啦, 唔揀黑色都唔知 assign 個咩色 tone 比佢哋好, 冇理由叫佢哋著白色啩??? 亦冇理由係銀色啫, 做兄弟咋喎!
我仲cheap呀... 冇諗過包咁多野添.. 最多利是俾多少少.. 因為其中幾個應該係唔想統一.. 想著自己衫既...最多叫佢地睇下個色可唔可以將就下 包化妝set頭..好金呀.. 我d姐妹應該都唔會介意呢d既.. 我之前做咁多次都冇俾人包過.. 同埋手頭都好緊了.. 有錢就冇所謂
回覆刪除[版主回覆03/31/2008 11:06:00]其實我目標係想佢哋嗰日唔洗蝕之餘仲可以賺返少少（喺 d 利是度賺），不過計計吓條數，5個姊妹，樣樣都包的話，都千千聲喎～ 唉！不過宜家冇辦法，只包衫，唔包化妝 set 頭 lu！
我聽到好多人都唔包括姐妹化妝及衫架,
回覆刪除通常想統一姐妹衫既先會包衫.....
[版主回覆03/31/2008 22:35:00]係呀, 不過我同男朋友成日都覺得要班兄弟姊妹特登請一日假幫我哋手, 已經冇咗一日人工, 亦唔想佢哋要自費去裝身扮靚, 所以盡可能我包到都包比佢哋, 我都想佢哋嗰日靚架嘛! 但慢慢地發覺原來出面冇咩人會咁做......加上自己唔係幾百萬未開頭, 又唔係大明星出嫁, 所以諗諗吓....暫時決定只包佢哋嘅服裝囉, 如果真係有 d 錢淨, 先包埋佢哋化妝 + set 頭!