2008年3月12日 (星期三), 一個專屬我哋兩個嘅日子, 適逢我哋拍拖 8 週年.....你, 終於喺呢日向我求婚......
事緣因為我特別鐘愛 agnes b. 呢個牌子, 你捨棄咗我哋一向去開嘅旺角信和中心意粉屋, 帶咗我去位於銅鑼灣禮頓道嘅 agnes b. 餐廳食飯。一坐低, 感覺良好, 因為被好多 agnes b. 嘅物件包圍..... 我哋開始 order 食物, 當時有一位好 nice 又好有禮貌嘅侍應全晚只係 serve 我哋一張枱咁滯, 我仲以為高尚食府有咁嘅安排唔出奇, 而且我亦冇刻意留意其他客人係咪都有專人服侍。成餐飯都食得好開心, 不得不讚一吓 agnes b. 嘅食物唔錯 (包括甜品), 我哋有傾有講, 氣氛好好......晚飯去到尾聲, 侍應都收晒我哋 d 碟, 戲肉開始啦......首先你扮電話響聽電話, 收線後你話我知公司急 call 你返去做嘢, 其實當時我覺得好失望.....估唔到無端端你要返公司做嘢得返我一個, 不過呢個情況又好正常, 耐唔耐你都會收到呢 d call, 埋單後我唯有聽你話自己一個返屋企等你.......步出餐廳行咗一條街左右, 你再次扮聽電話, 話我知餐廳打比你我哋漏咗袋嘢, 但由於你急住返公司執手尾, 叫我自己一個返轉頭攞返.......其實嗰一刻我有 d 懷疑......我漏低咗咩嘢? 我都冇帶嘢去.....或者我當時太理智.....返入餐廳, 見到頭先只 serve 我哋嗰個侍應, 我話佢知係佢哋打比我叫我返轉頭攞嘢, 點知佢攞咗紮花交比我.......我一見到......覺得好開心, 因為我曾經講過你求婚時我要收花.....你真係做咗! 我繼續一個人捧住紮花走出餐廳, 開門時已經見到你喺餐廳門口, 攞住隻介子等我, 叫我嫁比你.......我話: 好! 之後你再幫我戴上介子, 從此以後, 我中指就多咗一隻介子啦 ~
宜家你正正式式成為我嘅未婚夫, 所以我想同你講: 未婚夫先生, 其實我好欣賞你整晚嘅安排, 雖然中間出咗少少意想不到嘅事, 不過我真係好開心同好滿意! 我完完全全感受到你嘅誠意, 你嘅認真及你嘅心思, 我好多謝你比咗一個咁開心嘅晚上我, 我真係會一世都記得呢一晚! 其實我係一個好冇情趣又唔識浪漫嘅人, 我份人只講求實際, 或者因為我係典型金牛座問題......不過, 我真係欣賞你每一次為我製造嘅浪漫及美好回憶 ~
事後先知道, 原來你一早同嗰個侍應夾好計, 仲 confirm 咗 3 次咁多..... 唔怪之得你尋日 lunch 時間去公司附近搵我, 原來你要去買花交低比間餐廳.......又唔怪之得個侍應對我哋嗰枱特別好招呼啦.......原來你有 "景轟"
最後.......
我要多謝你送比我嘅朱古力 (係我最鐘意食嘅 MON CHERI 蒙雪麗)
我要多謝你送比我嘅鮮花, 有 12 支紫色玫瑰 (又係我鐘意嘅紫色呢), 8 支桔梗及其他小花
我要多謝你送比我嘅求婚介子 (好靚呢)
我要多謝你帶我去 agnes b. 餐廳食飯 (好多 agnes b. 呢)
我要多謝你送我一陣花香味 (因為插起咗 d 花之後, 全屋都充滿玫瑰花香)
我要多謝你比我一切嘅 surprise (真係好難忘)
我要多謝你喺今朝送我一對熊貓眼, 因為尋晚實在開心到訓唔著, 成 3 點幾先訓呢......不過一對熊貓眼換嚟一世難忘嘅回憶, 我寧願每個月都要一對熊貓眼!
~~~ 不同角度嘅紫色玫瑰花, 連包裝紙都係用紫色為主 ~~~
~~~ 求婚介子 ~~~
~~~ 我與紫玫瑰嘅合照 ~~~
鮮花嘅生命好短暫, 但令人有美好回憶, 而我同你嘅感情細水長流, 卻令我哋一生一世咁相愛, 牽腸掛肚
我覺得自己好幸福, 多謝你!
嘩,,你未婚夫對你好好呀!! 你一定好sweet sweet呢!!
回覆刪除我個時結婚又係搞左好多野之後,,我老公先係我生日時向我求婚架!! 不過當日既情形有時諗番都覺得好sweet 同好好笑!!
[版主回覆03/14/2008 11:16:00]多謝~ 呢兩日我都集中唔到精神做嘢, 每次望到手上嘅求婚介子, 個心都會甜一甜.....其實我心目中嘅步驟唔係咁架, 我想佢求咗婚先, 之後先開始搞結婚, 不過算啦, 有時 d 嘢唔可以 100% 完美!
我相信你老公當時都用咗好多時間及心思諗一個最適合你兩個嘅求婚方法啫~ 最緊要你開心就得啦!
好sweet呀 ，恭喜晒，祝你地合頭到老，永結同心，永遠都咁sweet同開心！
回覆刪除[版主回覆03/15/2008 11:45:00]多謝 ~
我知你係邊個, 點解你都識得上嚟我個 blog 嘅? 唔好講住喎, 除咗 samantha 知之外, 暫時都未有人知架 ~
你扎花同介指都好靚呀~
回覆刪除成個過程仲好sweet tim~
雖然0係esd已經聽你講過
不過今次有埋相睇仲正呀~
[版主回覆03/17/2008 11:02:00]多謝~ 當日其實都有少少 surprise....
大家一齊努力啦~
好sweet呀!睇到都感動,真係浪漫呀!扎花同介子都好靚呀!你應該將扎花做乾花,咪可以留耐0的囉!你老公真係浪漫,對你真係好,比左個咁好既回憶你,真係羨慕死人啦!我就無啦!
回覆刪除[版主回覆05/26/2008 11:03:00]多謝！嗰日真係幾感動，所以好想搵返紮紫玫瑰留念呀！
你老公冇向你求婚咩？我唔信，佢對你咁好咁錫你！
佢就係無囉! 明示暗示都講過,心都灰。不過之前佢有諗過係酒樓律師証婚,係眾人前求婚,可惜比我ban左,我唔想擺酒又係嗰度,註冊都係嗰度。我ban左之後佢先咁同我講。
回覆刪除[版主回覆05/26/2008 17:49:00]唔得架喎, 身為男人一定要向老婆求婚架! 我都已經唔係幾鐘意開始搞結婚先後補求婚, 不過算啦, 有求總好過冇求! 你再向你明示啦, 叫佢補返比你啫!
其實都幾好吖, 當住咁多人面前求婚係需要無比嘅勇氣架! 不過佢就可以坐定笠六你一定會 say yes! 或者你老公打算喺 eden 向你求婚呢!
明示暗示都講過啦!都唔再講啦!當初諗住拍左咁耐咪結婚囉!仲要無端端有日坐坐下就話結婚,就係咁就開始籌備我地既結婚之旅啦!我都唔車求咁多啦,佢唔求咪日後比我話佢囉!
回覆刪除[版主回覆05/27/2008 10:25:00]係呀, 你仲要話足佢一世添呀, 哈!
我一定會呀!佢都知我係會依依哦哦既人黎架啦!哈哈
回覆刪除[版主回覆05/27/2008 14:50:00]哈! 我相信佢遲 d 一定會補返比你嘅, 話唔定佢心入面已經有晒 idea, 相喺大婚當日比驚喜你呢
希望啦!
回覆刪除[版主回覆05/27/2008 15:36:00]唔洗擔心喎, 一定有啫 ~
好sweet呀真係! 你未婚夫咁有心機安排一個咁suprise既環境俾你! 真係好開心!
回覆刪除希望你地永結同心,白頭到老^^
[版主回覆07/07/2008 13:34:00]多謝晒你嘅祝福, 咁幾時輪到你呀?
隻介子好SPECIAL呀!!
回覆刪除[版主回覆11/17/2008 11:01:00]多謝, 其實係 Mabelle Leo Diamond 嗰隻!
嘩~你未婚FU好有IDEA wo...真係always俾驚喜你呀!! 太浪漫la
回覆刪除[版主回覆12/29/2008 17:28:00]哈....你咁講我哋會怕醜架....wakakakaaaa!