新娘化妝 - confirmed

經過一晚苦惱之後，終於決定 confirm 貴嗰個 mua，好嘢，又搞掂多一項 item，嚟緊我終於可以放返一 d 屬於自己嘅假期，唔洗再每次放假都去搞結婚嘅嘢～尤其是我身邊嗰個.....我知佢都好攰，好想抖吓！

好，等我介紹一下今次我 confirm 咗嘅 mua 先～ 佢叫 Amy Yuen，package 如下：

跟足全日收費 $3,288 (天水圍區附加費 $200)

－ 新娘化妝全日服務及無限次轉妝轉髮型

－ 包兩位媽咪及伴娘化妝 + set 頭

－ 包新郎化妝（都唔知化唔化好）

－ 免費頭飾借用

－ 免費首飾借用

大致上都係咁啦，一般 mua 包嘅嘢佢都有包！因為今日 confirm 咗佢，所以佢肯 send d 試妝相比我，不過我收到之後有少少失望...... 可能因為我樣衰啦，點解硬係好似好核突？冇錯，直情係用 "核突" 嚟形容，係咪太近鏡呢？定係我塊面太長呢？呢樣我承認，因為遺傳關係，我塊面係比較長！但點解都好似化唔到人哋嘅感覺咁嘅？樣樣嘢都好似差少少...... 第時真係要同個 mua 傾傾點搞好！至於 set 頭，呢個 mua 因為臨場發揮嘅關係，佢 d idea 比較創新，起碼唔會好似之前嗰個平 mua 咁公式化，有 d 髮型我都想佢改，不過可以等 final 定妝先研究都未遲！大家宜家即管睇睇我呢次嘅試妝相......都係嗰句，我驚你哋會嘔，唔好睇咁耐呀！仲有最緊要嘅係........我好需要你哋嘅意見，有咩地方需要改善等等，因為我平時冇乜點化妝，完全係乜都唔識架！有咩唔好即管出聲，唔洗怕我有 hard feeling！我真係一 d 都唔介意架！大家準備好未？？？？

(1) 呢個係褂妝.......有冇覺得對眼化得太濃？我就覺得好似好假咁，你哋話似唔似人哋上堂瞌眼訓，畫一對假眼痴上去嗰種感覺？定係我思想較保守接受唔到咋？另外，唇色係咪太紅？但如果當日著咗褂上身，其實係咪 ok 呀？我投降，我真係唔識！

(2) 呢個係褂頭，佢 set 咗一朵花出嚟，唔知大家睇唔睇得出呢？呢個髮型我幾滿意！不過到時會要求佢 set 返高少少，宜家咁睇好似太低，仲有，當日會整濕我 d 頭髮，唔會好似宜家咁有咁多碎髮／毛毛叉出嚟

(3) 呢個係第一個晚裝頭，係 mua 自己幫我諗架，不過唔知點解佢會喺呢個角度影，都睇唔到成個頭，或者佢主力想影低條辮啦！但就咁睇，已經發覺佢 set 頭有一手，唔會太悶

(4) 呢兩幅係第二款晚裝頭，都係嗰句，呢兩個角度都唔係幾好，睇唔到 d 乜！

(5) 呢個係最後一款晚裝頭，亦係我之前講話比較有中國古典味嗰個髮型，如果襯晚裝，好似唔襯....大家有冇覺得呢兩幅我叫做好樣返少少？或者我個面型唔適合影大頭！

我衷心希望你哋會幫我評評，比 d 意見我，等我可以同個 mua 溝通溝通！真係唔洗怕我會唔開心／嬲等等，我冇事架！我一向都係一個樂觀嘅人！Thanks all of you！

其實化妝師叫我比 d 信心佢，咁都啱嘅，用人勿疑，疑人勿用嘛！佢幫我咁樣化全部都有理由：

－ 褂妝肉眼睇好似紅得滯，但當著埋件褂，如果個妝唔夠紅的話，會顯得成個人冇精神，面青青咁。都啱嘅，相對地睇吓我最尾嗰兩張，晚裝妝真係唔會化太濃嘅胭脂

－ 睇相同肉眼睇唔同，肉眼睇可能會偏濃，但影相出嚟嘅效果對眼係好有神架 <---（呢樣我信嘅，睇我第一張相，肉眼睇真係超濃，但宜家睇相又唔係咁覺濃喎）

－ 戶外、註冊及酒樓場地一般都偏暗（因為我呢次試妝間房有好多盞白色嘅燈射住我），所以肉眼睇可能好誇，但影出嚟嘅相會冇事（不過我又咁諗，攝影師部相機嘅閃光燈都唔可忽視，呢一點真係要識攝影嘅人話我知啦）

最後，我諗諗吓，到時我大部份相都唔會影近鏡或大頭相，咁應該都 ok 嘅～ 唔會太樣衰！

我的姊妹團 與及 他的兄弟團

我嘅姊妹團會係我讀中學時嘅一班死黨兼姊妹.....總共會有 5 個....

人哋話係咁計嘅 :

新郎 + 新娘 (為一組) <-- 2 人 (雙數)

伴郎 + 伴娘 (為一組) <-- 2 人 (雙數)

兄弟 + 姊妹 (為一組) <-- 各 5 人, 即共 10 人 (雙數)

之前原本諗住唔包佢哋嘅服裝, 但會包化妝 + set 頭, 因為我都想佢哋嗰日靚靚架嘛 ~ 唔包服裝嘅原因, 就係怕唔知會唔會有 d 姊妹唔鐘意被統一服裝, 但作為主角嘅我, 我偏向統一佢哋, 咁樣影出嚟嘅相會靚好多! 再諗深一層, 其實做姊妹嘅.....係咪唔洗 set 頭呢? 我班姊妹......應該個個都識化妝啦, 我相信佢哋應付得嚟嘅, 只係希望到時唔好掛住補妝, 唔理我、唔幫我就得啦!

講開姊妹裙, 尋日行旺角新之城, 發覺二樓有幾間舖頭賣姊妹裙, d 款都幾得喎, 不過普遍係短裙... 人哋話去到酒樓時應該要著長裙, 咁樣會比較莊重 d, 不過我又覺得....雖然佢哋賣短裙多, 但 d 款全部出得大場面, 而且價錢方面....非常抵呀 ~ 最平嘅承惠 $59, 最貴嘅都只係 $200 之內 (冇睇漏眼嘅話), 如果要求唔高, 包佢哋一條 $100 以內嘅裙, 仲抵過上廣州婚紗街買喎 (之前喺 esd life 聽人講, 廣州買姊妹裙, 講完價都要 $300 / 2條) 我同男朋友都睇中咗一條, 價錢係 $120, 個款幾靚架, 有 4 隻色, 質地有 d 似絲質咁, 光身嘅, 腰位嘅左邊有個蝴蝶結, 修腰款.....等我遲 d 帶班姊妹去睇睇先!

就係因為咁, 我暫時又做咗另一個決定, 包姊妹團嘅服裝, 但唔包化妝 + set 頭 lu ~ 唔知....我算唔算 cheap 呢?

至於男朋友嘅兄弟團, 其實我都冇同佢傾過會點處理佢哋嘅服裝問題! 相信離不開西裝恤衫打呔! 講開呔, 我宜家想喺街邊 (好衰咁呢) 買條一模一樣嘅呔比佢哋打, 之後再比個色 tone 佢哋買西裝, 咁都夠晒統一啦啩! 西裝顏色方面, 我諗應該都係黑色啦, 唔揀黑色都唔知 assign 個咩色 tone 比佢哋好, 冇理由叫佢哋著白色啩??? 亦冇理由係銀色啫, 做兄弟咋喎!

試妝 Part II

今日試咗第二個 mua (上門試妝), 唉, 又係做決定嘅時候, 好怕會揀錯, 因為一生人一次, 仲要係 mua 呢一項 item, 真係好緊要 ~

今日個 mua 同我試咗三妝三頭 (褂, 婚紗, 晚裝試齊晒), 佢好快手, 用咗兩個鐘嘅時間就搞好晒三妝三頭~! 不過.....有優點亦有缺點, 呢一刻我已經有初步決定揀邊個! 唉, 聽日就要做最後決定啦, 究竟我咁揀啱唔啱呢? 第一個 mua 已經比我拖咗三日, 係時候諗吓會唔會 confirm 佢, 否則之前嗰 $380 試妝費就冇得扣錢啦!

先對比一吓兩個 mua :

比個稱號佢哋先, 第一個 mua 收費較貴 ($3,288 + 天水圍附加費 $200), 我叫佢做貴 mua, 第二個收費較平 ($2,588), 我叫佢做平 mua (兩個 mua 嘅 package 所包嘅嘢完全一樣, 打和, 仲有, 大家都係操唔純正嘅廣東話 <--- 唔知關咩事, 再打和!)

	貴 mua	平 mua
國藉 (呢樣都做比較, 超勁, 但冇歧視成份)	台灣 (我估)	深圳
經驗	3年, 有幫婚紗展  catwalk model 化妝經驗	6年, 曾任深圳小姐選舉化妝師及香港嘅廣告化妝師
工作性質	化妝學校教師 + 接散 job	普通全職化妝師
化妝品	有 HR, 有 MAC, 有 LM, 詳細唔係好記得, 總之印象中係用 d 比較貴價嘅化妝品	粉底用 MAC, 眼影用VOV, 落妝用 YUMEI, 其餘用 d 國產貨
時間	三小時, 做咗兩妝四頭	兩小時, 做咗三妝三頭
Style	比較摩登, set 頭係臨場發揮, 而 style 亦會特別 d, 但未知會唔會唔襯當日件衫	包冇問題, 因為係 set d 比較 common 嘅頭, 普遍人都係整嗰 d 髮型, 大眾易受落
妝容	男朋友話有星味 d, 或者係同佢嘅工作有關	個人覺得比較老土及商業化, 一味較閃, 眼影又用閃, 乾粉又用閃, 連頭髮都會加閃粉

照宜家咁睇, 我應該會 confirm 貴 mua, 因為好似穩陣 d, 而且........揀個貴嘅.....應該實冇死啩???? 唉, 大家認為點呢? 比 d 意見吖, 我有冇嘢忽略咗要考慮架?

下面有 d 相, 係試平 mua 時影嘅, 貴 mua 點都唔肯比相我, 話要 confirm 佢之後先肯比喎...... confirm 咗, 我仲要佢 d 相嚟做乜??? Anyway, 大家可以睇睇平 mua 嘅相, 但我在此奉勸你哋, 唔好空肚或飽肚去睇我 d 相, 我驚你哋會反胃, 繼而入院 (啋)! 另外, 最好要 PG 家長指引, 以下為恐佈鏡頭呀......小心你哋嘅眼睛 :

呢個係褂妝, 講真, 我唔鐘意呢個頭襯褂囉, 我覺得呢個係晚裝頭 ~ 妝容方面, ok 啦, 好似同我平時自己化差唔多, 其實新娘子當日係咪應該要誇 d 呢? (貴 mua 同我化得濃 dd 架, 佢話咁樣影起相上嚟會 sharp d 喎~)

呢個係婚紗妝, 會係註冊時帶住頭紗嘅髮型, 我最鐘意呢個, 但男朋友話側面睇唔靚, 太長.....不過 mua 話有得改....唔洗擔心...(唔明點解佢同我用咗橙色胭脂, 我一定會改!)

最後呢個係晚裝 look, 用咗假髮, 其實呢束假髮假得好緊要, 因為同我 d 真髮唔同色, 不過都唔洗擔心, 因為 mua 有一個同我髮色相近嘅假髮, 只不過佢冇帶嚟啫 (今次係上門試妝吖嘛)~ 但講到尾, 我鐘意全部用晒真髮多 d, 因為我.........唔係咁鐘意裝假狗~ 哈!

大家覺得呢個 mua 嘅手勢點呢? 佢係就係快手, 因為好似倒模咁......好多時同其他人會一式一樣, 不過我又唔太介意......男朋友就一早表咗態, 佢鐘意貴 mua 多 d ~ 因為佢教化妝, 會比較有 modern sense, 髮型又唔會太死板或大眾化......或者, 我真係會揀貴 mua! 聽日要做決定啦 ~ 你哋救吓我啦! 貴 mua d 相要 confirm 咗佢先有, 如果我真係 confirm 佢, 到時再 post 上嚟比大家評頭品足一吓, 睇吓有咩地方需要改善!

P.S. 或者你哋會奇怪點解我咁早就走去試妝, 等我講比你哋知啦, 我認為呢 d 服務通常都好講嗰個人嘅 technique, 佢哋一日通常只做到一單生意, 加上我 bd 嗰日係旺日, 既然睇啱, 我就想 book 咗先 ~ 唔想 d 嘢迫晒去下年先 confirm, 咁我可以有多 d 時間去諗其他嘢或做 d DIY 嘅嘢, 而且.......又可以 hold 舊價, 應該會有著數 ~

試妝 Part I

之前喺 Yahoo! 拍賣見到有個 mua 登廣告幫人化新娘妝，睇過佢 d 相之後, 發覺佢都幾 ok, 原來佢成日接 order 喺 wedding expo 幫羅浮宮及新天地嘅 catwalk model 化妝 + set 頭，再睇埋佢嘅價錢，跟足全日 $3,288，ok 吖，唔算太貴，我心目中嘅 budget 係 under $4,000，男朋友極力推薦 book 佢，因為喺 expo 爭分奪秒，同結婚當日一樣，呢個 mua 應該夠晒經驗！不過..... 究竟住天水圍係咪要被人歧視呢? 我唔洗佢晨咁早 7:30 前到, 都硬要收多我 $200.......算!!! 因為宜家好多 mua 都要收天水圍居民附加費! $200 算係公價啦!

尋晚 7:00 上到佢返工嘅 studio，嘩，原來佢來頭都唔小喎，喺銅鑼灣一間頗著名嘅化妝學校教化妝 (不過間化妝學校我唔識，反而男朋友識喎）~ 去到呢個 level，收 $3,288 跟全日真係唔貴，package 中包咗兩個媽咪及伴娘化妝 + set 頭，包埋頭飾及首飾.....算叫做齊全！坐低之後，原本講好試 2 妝 2 頭，但佢自己 "渣" 主意同我試婚紗妝 + 晚裝妝......我唔想，因為之前聽朋友講試 mua 手勢最緊要試褂妝，因為褂妝通常偏紅，好蝦人化，唔係個個化得靚架！所以我要求試褂妝及晚裝妝，佢都好樂意同我試。

先講褂妝，未 set 起頭之前真係嫌佢將我對眼化得太濃，嗰對眼好似娃娃眼咁大到冇論～ 加埋假眼睫毛之後我真係唔認得自己！同佢反映返，但佢話咁係正常，set 完頭先再評論都未遲，好！姑且信佢，話晒係化妝師嘛～ 搞完一輪，個頭終於 set 好，咦，妝 + 頭原來幾靚喎，佢同我 set 咗朵花出嚟，再加埋頭花總共有兩朵花喺個頭度，唔錯唔錯！我同男朋友都好滿意，化妝師講嘅嘢真係啱！之後轉妝試晚裝妝容，我話佢知我一定有一套紫色晚妝，所以佢就同我試咗一個以紫色做眼影嘅晚裝妝容！化完之後個樣好 ok，男朋友及化妝師都話我嘅膚色其實幾襯紫色！到個頭啦，mua 同我 set 咗一個頭，男朋友唔鐘意，因為紮起晒 d 頭髮，條友仔鐘意我放頭髮落嚟，但 mua 話我個樣唔襯嗰種 style，不過佢都 set 咗一次比我睇（試咗兩個頭，有賺），發覺佢講嘅嘢又一次係正確嘅，我個樣真係唔襯咁 set 囉，佢見我哋都好似唔知想點，即席再 set 多一個（試咗三個頭，再賺），今次呢個好有中國古典 feel，但襯晚裝有點兒格格不入，不過不得不讚佢嘅手勢，的確唔錯！試咗三個晚裝頭，始終鐘意第一個，專業真係專業，佢幫我諗嗰個係最好嘅！

但最後我哋都未有 confirm 佢，因為嚟緊星期日我會試多一個 mua，呢個平好多，只係 $2,588，包兩個媽咪及伴娘化妝 + set 頭 + 補妝，首飾頭飾任借，天水圍或晨咁早到都唔洗加錢（因為佢自己都住元朗呢～）其實試兩個 mua 都夠晒皮啦，試咁多只會 side 錢，試一個 mua 都唔平架～ 不過呢 d 錢唔慳得，試兩個以上先有得比較，唔怕做錯決定嘛！尋晚嗰個 mua 唔比我影相，只可以用佢部相機影，我都明白，因為每個髮型都係佢即席諗出嚟，或者驚人偷 idea 啦！體諒佢！星期日嗰個應該有得影，有機會（化得靚）的話，post 上嚟比你哋睇！但......唔准笑！

婚禮小總結 Part 1

由 2007年11月開始決定結婚，我就一路搜集有關婚禮嘅大小事宜，到今日為止，總算 book 咗 d 最 urgent 嘅嘢，等我嚟一個小總結先：

擺酒：銅鑼灣利舞台麒麟閣

註冊：尖沙咀緣美傳說白玫瑰禮堂

婚紗相：(1) 美麗佳人

                (2008 年 8 月 26 日星期二影相，試衫則於 2008年 8 月 2 日星期六)

                (2) 法國婚紗

                (2008 年 10 月 20 日星期一影相，試衫則於 2008 年 9月 5 日星期五)

婚禮當晚攝影及攝錄：

海洋專業婚禮服務 (攝影師：老闆 Hero，攝錄師：阿健，snap shot 師父：阿風)

結婚介子：PN (旺角分店) (5月15日取)

西餅咭：美心西餅 200 張

外租衫：(1) 法國婚紗 (暫定 4 套，1 拖尾婚紗 + 3 件晚裝)

                (2) 元朗雅麗 (暫定 5 套，男禮 + 媽咪衫 + 奶奶衫 + 伴娘 + 伴娘各 1 套)

                (3) 旺角溢昇 (已經租咗一套五福褂，頭褂)

化妝師：聽晚 (28/3) 試妝 (聽晚會知結果)

暫時係咁多，好似搞咗好多嘢咁，其他嗰 d 遲吓先算 lu ~ 遲 d 再做個 budget 預算，睇吓自己超出咗幾多.......肯定大大鑊 ~

我租咗褂啦! (仲租埋第二間外租衫添)

尋日約咗媽咪去元朗睇媽咪衫, 因為佢話想望一望 d 衫款, 然後打算開始修身喎 (聽住先啦! 我話佢一定冇恒心)。其實一早都打算喺元朗租一間外租比佢哋用, 而我同男朋友 d 衫就租法國婚紗 (好似好衰咁)。如果有一間公司睇得啱的話, 我會先 join 一個 4 套衫 package 先 (for 伴郎伴娘, 2 個媽咪), 咁第一站我先去咗鴻運。入到鴻運, 其實我想睇褂, 問心, 佢 d 褂真係靚過人哋好多, 我先試咗一件五福褂 (如果 join package 唔洗額外加錢), 上身衫我已經幾鐘意, 但稍嫌條裙嘅金銀線唔夠....之後再試一次褂后, 嘩......好靚喎, 男朋友, 媽咪, 以及我都覺得靚過五福褂好多, 但要加 $6xx......咁.....諗吓先, 因為聽聞出旺角租褂都係差唔多價錢, 但如果喺鴻運 join 一個 4 套 package + 一套褂, 變相我要 join 5 套嘅 package, 再加 $6xx 租褂, 咁我前後比佢加咗 $8xx 喎, 單租又要成 $2xxx 喎, 痴線咩! 之後就去咗雅麗啦....唉, 超多人, 我約咗 3 點鐘睇衫, 去到冇人得閒理我, 我 4 點再去多次, 依舊冇人騷我, 我唯有同媽咪自己睇吓衫先, 到接近 5 點先有 sales serve 我, 一口氣同媽咪揀咗幾件去試, 唔多講啦, 總之佢都搵到一件佢自己比較鐘意, 咁我就索性 join package 囉! 承惠 $2088 / 4 套, ok 吖! 而且雅麗 d 男禮都幾多款, 法國反而冇乜款, 所以極有可能男朋友嗰兩套男禮唔喺法國租啦, 轉埋入雅麗租仲好, 又多款, 又慳咗! 至於雅麗 d 褂.........我覺得唔 ok, 普通一套小五福已經要加 $280, 大五福要加 $480, 褂后要加 $680, 唔好啦啩.....咁貴! 一於出旺角睇睇先!

出到旺角, 先去咗錦發....一入到去, 我話想租褂, 個 sales 好快咁拎咗套中五福比我試上身, ok 喎, 上身衫同裙嘅金銀線密度我都滿意, 個 sales 話 $550 (咦.....果然抵過喺元朗租好多), 試埋褂后, 唉....褂后真係靚好多, 租金 $650 (相差 $100 咋喎), 不過唔知係咪我個樣唔襯, 一著起褂后, 成個人當堂老咗好多.....我要求要影相, 扮晒嘢話要問吓長輩先決定租邊件.....但其實想去多幾間格吓價....之後行前多幾個舖位, 比我見到間筍嘢喎, 呢間舖頭叫 "溢昇公司", 舖面係賣背囊, 床褥等等, 但舖頭嘅盡頭見到有褂租.....其實入到呢間舖頭都有 d 驚, 因為好新淨, 又只得一個 sales, 好似信唔過咁, 但傾落先知原來呢個老闆係老行尊, 佢之前喺錦發同人 partner, 咁啱呢間舖之前個老闆都係做褂, 但比人加租後冇續約, 所以佢自己頂咗嚟做....但......最正係佢 d 褂都係新貨嚟架!!!! 我先試五福褂, 唔知點解, 大家都叫五福褂, 但個款間間都有唔同咁嘅....是但啦, 唔理佢咩名, 自己鐘意, d 金銀線又唔會太疏落咪 ok 囉... 我問價, 個老闆開價 $6xx (唔記得實際價錢) 我心諗....貴過錦發喎, 但後來先知原來我試緊嗰件係頭褂, 因為佢新開張, 都冇舊貨.....咦, $6xx 租頭褂又 ok 喎, 出面起碼要 $7xx - 8xx 啦。我表現得好猶豫, 因為講真, 我唔介意件褂係唔係頭褂, 但佢貴過錦發嘛......老闆見我要諗, 自動減價至 $580 比我, 講多兩講, 送埋睡衣, haha, 心諗 : 筍喎......不如租啦! 個老闆解釋, 其實因為佢新開張, 冇乜人識佢間舖, 個個出到去只識得搵 "錦發" 或 "美華", 所以唯有平 d 比街客, 等人介紹囉....最後我當然 hold 咗嗰件五福褂 (頭褂) 啦, 咁平.... 所以如果有 blogger 未租褂, 不妨去睇睇啦, 因為我諗佢頭褂嘅數量有限, 如果好彩, 用一般嘅價錢租到件頭褂都幾好吖! 話雖如此, 其實舊褂嘅意思都唔算好舊, 我喺錦發試褂時問過 sales, 佢哋 d 褂都只係著過 4 次左右啫, 如果唔介意的話, 可以唔洗仆到去呢間 "溢昇", 不過....佢可能都會比其他舖頭平少少! 而且當你 hold 咗件褂, 佢都會封褂架啦, 到你要件褂前一日佢先同你車裙腳嗰條珠仔吊絮上去! 另外佢同你封咗褂之後, 如果你要帶媽咪或長輩去睇多次件褂, 你要早兩日通知佢哋, 因為佢要同你喺第二度攞返件褂落舖面架!

我最後係租咗呢件五福褂 (頭褂)，見到裙腳嗰 d 珠仔吊絮都未車上去架, 加上佢夠新淨, 望落去件褂都金 d, 閃 d

呢件係喺錦發試嘅中五福, 其實已經好 ok 啦 (舊褂, 所以裙腳已經有嗰 d 珠仔吊絮)

呢件都係喺錦發試嘅, 叫做褂后, 現場嚟睇, 我真係老咗好多 (或者因為太多金銀線), 男朋友都覺, 連 sales 都咁講, 不過真係靚好多噃!

溢昇公司資料：

旺角上海街 469 號 (電話：2148 1961) <-- 錦發行過少少咋!

失敗! 結婚介子又 out budget!!!!!!!

終於買咗結婚介子啦! 話說今日復活節假無咩嘢做, 特登出去旺角 PN 分店睇多次對結婚介子, 因為自從上次喺 expo 睇完之後, 對隻介子真係有少少念念不忘嘅感覺! 其實都有睇過其他公司嘅婚介, 有 d 都唔錯, 不過唔知係咪先入為主, 硬係鐘意 PN 嗰對多少少..... 去到旺角 PN, 都唔知好彩定唔好彩, 竟然撞到上次 expo serve 我哋個女 sales, 佢一眼已經認得出我哋, 梗係啦, 上次 expo 我去足 3 日, 有 2 日都去咗 PN 個 booth, 盲嘅都認得我哋啦! 不過個女 sales 真係好勁, 連我當日考慮緊咩款都記得, 所以佢拎多一次出嚟比我哋睇......我試上手, 左睇右睇, 其實自己真係幾鐘意, 佢個款中間有粒主石, 但主石兩邊共有 24 粒碎石伴住, 喺燈光下真係好閃好靚, 但男朋友就話粒主石比側邊 d 碎石搶晒鏡, 粒主石幾閃幾大都好, 遠睇只會見到有一堆鑽石閃吓閃吓, 佢都講得啱嘅, 講真有邊個咁得閒咁近睇你隻結婚介子吖, 遠睇見到係咁就係咁嘅感覺, 不過佢個款....我真係幾鐘意, 而且男朋友自己都帶得好好睇, 後來唔知男朋友係咪見我咁鐘意定點解, 連金至尊都冇去睇就扑鎚買 PN 呢對啦! 喂, 未婚夫先生, 其實你係咪真係鐘意架? 唔知我有冇 feel 錯, 我覺得你自己都鐘意架喎, 唔好扮偉大喎......

我叫個 sales 計一計幾多錢, 女裝 $7,700, 男裝 $8,400, 頭 $3,000 冇折, 但會做咗會員, 尾數先有 9 折, 相比喺 expo 度買, 就係貴咗嗰 $3,000 嘅 9 折, 因為 expo 係全數 9 折! 好, total 係 $(7,700 + 8,400) - 3,000 (做會員, 冇折) x 0.9 + 3,000 (冇折, 要加返落去) = $14,790, SHIT!!!!!! 咁 Q 貴????  之後個 sales 同我哋度手指 size, 男朋友因為手指太粗, 要帶 20 號, sales 又傳嚟另一個壞消息.....如果手指 size 18 號以上, 每多一號要加 $100, 男朋友 20 號, 所以要加 $200, 埋單承惠 $14,990.........嘩~~~~~~~ 超級 over budget!!!!!  我原本預 $7-8,000 買一對介子, 足足一個 double ~ 唉! 算! 鬼叫自己真係鐘意隻介子咩, 如果唔係都唔會返轉頭再去睇啦, 認命吧啦!  結果, 扑鎚買咗啦, 但因為我哋要訂造個 size, 所以預計 5月15日先有得攞介子, 到時先 post 張相出嚟, 比大家睇吓係咪真係咁靚! 今次佢送咗免費刻名 (其實 expo 都有, expo 係機刻, walk-in 就係手刻, 唔知兩者有咩分別), 之後仲送咗一個對介嘅音樂盒 (expo 係送介子枕, 咁我寧願要音樂盒, 起碼叫做有 d 用吖), 下面有相睇....

PN 戰利品一大袋....

絨面音樂盒, 嘻嘻.....紫色喎....

打開後, 左手邊可以插一對結婚介子, 右手邊係上鍊, 上面可以放一張合照, 幾好, 唔錯, 總好過要介子枕!

雖然對介子 out 咗 budget, 不過........d 錢都洗得好值得, 因為我係真心鐘意呢對介子, 要帶一世架嘛!

法國婚紗 - 晚裝 (外租用 - 紫色)

對於一個咁鐘意紫色嘅我, 唔租返一件紫色嘅晚裝真係覺得有 d 對唔住自己, 不過我唔會咁唔理智嘅, 真係要靚嘅先租, 不過.....好彩法國婚紗有 2 件晚裝自己同男朋友都幾鐘意

就係呢兩件啦, 我哋兩個都好鐘意, 又有一番龍爭虎鬥...

下面呢兩件都係陪襯多, 未必會租

嗰兩件紫色晚裝用嚟敬酒或者送客都幾適合

法國婚紗 - 晚裝 (外租衫 - 席前影相 + 帶金器)

睇完影婚紗相嘅晚裝, 我都急不及待睇一睇外租晚裝, 今次多好多款, 簡直花多眼亂添呀! 之後諗好咗租一套紅色嘅晚裝 for 席前影相, 斟茶 + 帶金器時著嘅, 不過法國婚紗紅色嘅晚裝唔多, 我只搵到呢 3 件自己比較鐘意.... 由於佢紅色晚裝選擇比較少, 不如唔好搵紅色晚裝, 唔理帶金器襯唔襯, 搵件自己鐘意就算...好唔好呢?

頭兩件係我自己比較鐘意嘅款, 呢件.......幾好吖, 不過唔知佢個裙腳係點, 男朋友唔係咁鐘意呢件 ~

呢條裙下身個設計係我一路以嚟都想搵嘅款, 中間嗰幅圖影到個 model 好似好高咁, 不過考慮到如果斟茶時跪嚟跪去, 著件咁牙渣嘅係咪唔方便呢? 但調返轉頭諗, 席前唔著 "牙渣" 款, 成晚都冇機會著啦喎 ~ 敬酒唔著得, 阻住晒人哋, 行嚟行去又麻煩, 至於送客....我已經有一件心水啦, 係 a-line 款架

男朋友最鐘意呢件, 因為夠 sharp 喎, 講真呢件我都 ok 嘅, 不過都係嗰句, 席前著 a-line, 敬酒因為迫夾問題又著 a-line, 送客又著我件心水 a-line, 咁咪冇機會著 "牙渣" 晚裝囉?

 

如果最後都揀唔啱, 或者真係唔理件衫襯唔襯到金器, 租件自己最鐘意嘅算數! 好煩呀..........

法國婚紗 - 晚裝 (影相用)

join 咗法國婚紗之後, 我宜家就可以隨時隨地上網睇衫, 影婚紗相嗰度, 我係有 2 個婚紗造型, 一個晚裝造型, 晚裝造型嗰度只有 50 套晚裝揀一套, 起初好驚, 因為 50 款裡面我睇到第 37 款先再始有興趣, 仲以為 50 件裡面冇一件我會睇得上眼添.....宜家先 show 一 show 出嚟, 不過我未有咁快可以試衫住, 約咗........9月5日先試

其實我最鐘意呢件, 不過有少少帶粉紅色, 好似唔係咁好意頭 (因為通常二奶先著粉紅色)

之後呢件其實都 ok 鐘意, 因為..................佢係紫色, 但個款一般啦

之後就係呢件, 幾靚, 不過我覺得影婚紗相租件 "牙渣" 少少嘅都冇所謂啦

以下嗰兩件都 ok 鐘意

呢件近睇好似一般, 但嗰幅細圖好似幾靚....

呢件都係 a-line 款, 不過 pat pat 嗰度好似有個豬尾咁...

呢幾件都係一般鐘意, 不過 post 一 post 出嚟睇睇, 租嘅可能性唔大 

p.s. d 相我係法國婚紗度 copy 出嚟, 唔知有冇犯法呢???

中式裙褂

宜家外租衫嗰度總算有咗初步定案, 三件晚裝都一定會喺法國婚紗度租, 至於淨返嗰 2-3 件, 應該會比埋男朋友租, 佢再有 quota 淨先再諗啦....不過裙褂我就一定唔會喺法國租啦, 一嚟覺得佢哋會冇乜款, 個 package 仲講明只可以租金銀線及珠片款, 我諗我唔想著呢 d ~ 二嚟硬係覺得要去返 d XX繡莊租裙褂先叫正宗嘛 ~ 本來有諗過去元朗鴻運租一件褂 (婚紗款真係睇唔啱), 不過 esd life 有網友又話唔抵 (租一件褂要 $2,xxx), 一係就一次過 join package 連租褂, 到時再睇睇款式先啦!

不過上網搵開資料, 有網友介紹咗喺旺角上海街嘅美華繡莊 (朗豪坊對面), 佢哋話呢間公司租褂平靚正, 老闆娘鄧太又好好人喎~ 嗰個人佢單租一件褂后, 只需要 $680, 買埋對褂鞋都只係 $68 仲有9折, 最好最好就係當你 confirm 咗件褂之後佢哋會 "封褂", 咁你嗰件褂就一定唔會有人再租, 直至你結完婚為止, 聽落好似幾有保障喎! 不過我下年11月尾先結婚, 如果我真係 confirm 咗件褂, 佢咁早同我封褂, 我會唔好意思喎 ~ hehe

之後又有網友介紹冠南華及錦發 (都係旺角上海街附近), 聽聞錦發 d 手工仲好, 又有得揀全新, 半新定著過 20 次以上嘅褂.....個老闆又係好好人喎, 個個都送全新睡衣咁滯, 每個準新娘一入佢舖頭就知道佢著邊款褂最好睇, 又不斷比人試褂都唔黑面等等, 我都好有興趣去睇睇, 還掂都係上海街之嘛 ~

其實我都已經有心水款式, 我都唔知呢款叫乜名, 總之我一定唔會著褂王, 幻想一吓我著咗之後可能變成一個鐵甲萬能俠或者一條金魚咁.....都係咪搞我啦, 我嘅心水應該係褂后或者五福褂, 但五福褂都有分中五福, 小五福, 我就真係唔知佢乜五福, 仲有分咩頭褂, 搞到頭都大埋.....總之我有我嘅心水褂款啦, 就係以下呢幾款啦 ~ (圖片轉載自冠南華, 價錢都係冠南華價錢)

呢件好似叫「密雲金五福」, 幾靚吖~ 租金 $1,300

呢幅又叫「密雲金五福」, 真係睇唔出同上面嗰件有咩分別, 唔知係咪同一件呢? 租金 $1,300

呢件明顯冇咁多金銀線, 好似叫「五福龍鳳」...租金 $1,200

呢件又叫「五福龍鳳」, 不過 d 金銀線好似密過上面嗰件, 真係唔知點分 ~ 租金 $1,200

呢件叫「大五福」......都係好多金銀線...租金 $1,500

呢件金銀線明顯比較少, 多 d 紅色, 個名叫「疏金紅卜龍鳳」, 都 ok 靚嘅 ~

睇完幾張相, 我發覺自己比較偏向鐘意多 d 金銀線嘅裙褂, 古時話裙褂上面越多金銀線就代表越富貴, 但又唔想太多, 好似 over 咗, 所以褂王嗰 d 我唔會諗, 或者我喺裙褂呢方面都係比較鐘意浮誇一 d ~ 哈! 得閒真係要去睇褂先得, 越嚟越鐘意去試衫....好好玩!

14 -16/3/2008 婚紗展大收穫

一連三日嘅婚紗展完滿結束, 估唔到自己因為攞到張 "職員証" 就白白痴痴咁足足去晒三日! 不過.....我呢三日都有收獲, 唔係白行架~ 首先第一日 book 咗緣美傳說註冊 + cocktail, 睇埋 PN 對介子, 第二日去咗排隊買 200 張美心餅咭, 第三日 join 咗法國婚紗嘅外租 package 及 upgrade 咗張外影 coupon, 之後仲去埋好多嘅珠寶公司睇結婚介子添!

第二日排隊買美心餅咭真係排到我死死吓, 本身嗰日一 d 都唔攰, 但排完之後真係想斬咗對腳出嚟.....先要排一條隊比錢, 比完錢之後仲要排另外一條水蛇春咁長嘅隊攞餅咭及封套..... 眼見聖安娜及東海堂冇咩人買, 真係唔明點解買餅要買美心 ~ 原本都打算買 20 張奇華, 咁美心就可以買少幾十張, 不過奇華 d 餅咭都幾貴, 最平嗰款一張要 $48, 仲要得半打咋喎, 買滿 20 張以上先有 95折, 真係多謝晒 ~ 為咗慳錢而且徵求過長輩嘅同意之後, 我決定一張奇華都唔買, 寧願加碼買美心, 反正宜家都冇咩人食唐餅, 派兩張美心西餅咭好過! 咁樣排一排, 用咗我 $7,680, 不過美心買滿 100 張送多 7 張, 咁我即係送多 14 張, 除返每張 $35.89, 都算 ok 架啦 ~ 佢仲送多 2 張 $100 蛋糕 coupon, 可以當錢咁用, 不過要買 2 磅以上嘅蛋糕先可以用, 原本打算擺酒時買個結婚蛋糕嚟切.....衰得佢, 張 coupon 有效期去到今年 9 月30日, 算吧啦, 買比屋企人做生日, 反正我真係現兜兜慳多 $200 ~

第三日......其實都係無心插柳之下 join 咗法國外租衫。雖然酒席嗰度送咗張外租及外影 coupon 比我, 但咁唔代表我一定要用架嘛。其實之前都打算喺元朗租衫, 不過元朗 d 晚裝款真係好似出唔到大場面咁 (或者係我奄尖啦), 睇完法國婚紗 d 相辦之後, 其實佢哋都有好多款式啱我, 我主要都會搵 d 直身款, 淨係睇相都已經睇中 2 套晚裝, 再睇睇佢哋個外租 package, 又真係幾抵, 一分錢一分貨, 所以索性 join 埋 ~ 家吓佢有兩款 package 比我揀, 一係 $4,188 租一套婚紗 + 5套衫, 但如果元朗租婚紗, 法國租晚裝的話, 可以 join 另一個 package, $3,388 5套衫, <-- 呢個好似抵好多喎, 而且佢哋 d 衫又冇分 grading, 拖尾又唔洗加錢, 只不過唔比轉款, 要轉的話要加 $500 一件.....宜家咁樣 join 咗, 我可以自己及男朋友 d 衫喺法國租, 伴娘媽咪衫喺元朗租, 或者我可能租兩套婚紗添呀 ~ 埋單應該 $7,000 左右租得晒所有衫。之後佢例牌 lur 埋我哋 join 外影 upgrade 張 coupon, 本身張 coupon 我都打算用咗佢, 但唔打算 upgrade, 不過見佢只要補 $2,880 就可以影過百款相, 攞到 22 張, 又有兩本相簿, 又有油畫, 題名冊, 不同大細嘅散裝相, 都好似 upgrade 得過, 所以又 join 埋, 總算搞掂晒最 urgent 嘅嘢, 下一步就係要搵化妝啦, 搞埋呢樣真係可以抖抖, 嚟緊 d expo 我都可以唔洗去 lu ~ 要去都可以下年先去, 到時先搞埋 d 紅酒及回禮小禮物等等...

最後就係結婚介子, 尋晚真係差不多所有大珠寶公司都睇過, 發覺鐘意嘅款式唔多, 宜家只有三對列入考慮範圍: (1) PN $14,670 (2) Ma Belle $6,xxx (3) 六福 $13,488.....其實三對都靚, 尤其是男朋友戴得仲靚, 因為佢嘅手型好難戴得好睇, 呢三款佢都戴得唔錯喎 ~ 其實我哋都睇咗好多間, 講吓戰績先, 分別睇咗 Ma Belle, Just Diamond, My Jewelry, J's, Cartier, PN, Tiffany & Co., 周生生, 周大福, ctf 2, 謝瑞麟, 六福, 只係爭金至尊未睇啫 ~ 唉 ~ 今日見到金價終於升咗上 $10,000 一兩, 係咪真係要快手買返對? 我好驚好似 esd life 個網友咁, 佢買咗對婚介之後, 只係三個月, 三個月就足足貴咗 $3,000, 講得啱, 真係攞你命 $3,000........小市民.....悲哀中......

緣美傳說, 我失守咗比你哋.....

尋日開始係一連三日嘅結婚展, 呢 d 結婚展差唔多每隔兩個月都有一次, 不過今次係每年最大型嘅一次, 所以我同男朋友都入咗去行....其實我哋係有目標咁行, 首先要去 "緣美傳說" confirm booking ~ 唉, 點知就大出血....

原本已經決定咗只租佢哋個白玫瑰禮堂做基本證婚 (30 mins) $2,688, 不過佢哋好識做生意, 搵咗老闆娘 serve 我哋, 加上我哋之前真係有考慮過搞埋 cocktail, 但由於種種嘅原因, 最後我哋自己 ban 咗......但坐低後, 呢位生意人同我解決晒我之前擔心嘅問題, d ideas 仲.........幾 ok 添 ~ 睇得出佢哋好有心咁為間証婚公司, 因為之前我擔心佢 cocktail 個房太細, 容納唔晒 d 賓客, 佢哋竟然決定拆咗個 reception, 騰出空間擴大咗個 cocktail 房, 宜家齋坐都坐都 50 人, 企埋的話應該容納到 70 人左右, 不過呢個決定當然唔係為咗我一個人而做啦。再睇埋佢哋個 menu, d 食物都好見得人, 加上我又諗起 "一日做晒西式中式嘅婚禮, 真係死而無憾", 所以順理成章地 book 咗 cocktail + 証婚, 埋單 $10,800 (1 hour).............................唉 ~ 再加 $180 幫我哋做 "擬結婚通知書", 再加 $305 政府費用.... 好在, 先比一半訂, 尾數可以等做 "擬結婚通知書" 時先比.......... 咁就超級地 over budget ~~~~~ 之前如果唔搞 cocktail 只同兄弟姊妹去酒樓食 lunch 的話 (2圍左右), 相信食得幾豪都好, 嗰餐 lunch 我比盡你哋食夠 $3,000, 再加埋基本証婚 $2,688, 我當日埋單只係 $5,688, 大佬............宜家成個 double 呀 ~ 不過講到尾, 都係自己衰, 因為真係鐘意佢哋個禮堂, 比 $ 時都比得心甘命抵嘅! 唔好怨啦.....

之後去咗 PN 個 booth 睇結婚介子, 趁冇乜人咪坐低睇囉, 如果平時.....要攞籌架.......其實佢哋 d 款都算多, 價錢亦有平有貴, 其實我都預咗用 around $7-8,000 買一對結婚介子。唔知係我哋兩個奄尖定係佢哋 d 款唔啱我兩個, 睇咗十幾二十盤介子, 都只係揀咗 3 款鐘意嘅出嚟, 我見到坐隔離嗰 pair 人揀咗十幾款出嚟呀, 不過咁都好, 起碼唔洗花多眼亂。之後喺嗰 3 款裡面再揀一款最鐘意..........好, 商量一輪之後揀好咗, 睇睇幾錢啦, 女裝 $7,700, 男裝 $8,600, 計埋會展 special offer (9折), 埋單要 $14,670, 嘩, 眼都突埋, 接近 $15,000, 足足超過預算嘅一倍價錢。不過問心, 如果真係搵到一對大家都鐘意, 又帶得好睇嘅結婚介子, 貴少少都我願嘅, 不過結婚介子要帶一世, 所以都係唔好輕舉妄動, 睇多幾間先, 所以 sales 就提議抄低個型號, 行晒之後真係鐘意呢對都可以搵返佢哋.....就係咁, $15,000 暫時力保不失 ~ yeah ~ 不過 PN 嘅 sales 真係好有禮貌, 又有笑容, 我哋咁奄尖佢都冇黑面, 仲好落力咁介紹 d 款比我哋, 最後冇買到都有少少.........少少咋.......唔好意思 ~

好, 今晚等男朋友放去再入去, 尋日定咗比自己嘅目標都睇唔晒, 今日首先要買 200 張美心餅咭 (見到佢條人龍都驚啦), 之後再睇結婚介子及租衫! 嘻嘻, 好在緣美傳說嗰度送咗兩張職員證比我哋, 呢 3 日婚展簡直可以自出自入 ~

2008年3月12日 (星期三) 你......終於向我求婚了!

2008年3月12日 (星期三), 一個專屬我哋兩個嘅日子, 適逢我哋拍拖 8 週年.....你, 終於喺呢日向我求婚......

事緣因為我特別鐘愛 agnes b. 呢個牌子, 你捨棄咗我哋一向去開嘅旺角信和中心意粉屋, 帶咗我去位於銅鑼灣禮頓道嘅 agnes b. 餐廳食飯。一坐低, 感覺良好, 因為被好多 agnes b. 嘅物件包圍..... 我哋開始 order 食物, 當時有一位好 nice 又好有禮貌嘅侍應全晚只係 serve 我哋一張枱咁滯, 我仲以為高尚食府有咁嘅安排唔出奇, 而且我亦冇刻意留意其他客人係咪都有專人服侍。成餐飯都食得好開心, 不得不讚一吓 agnes b. 嘅食物唔錯 (包括甜品), 我哋有傾有講, 氣氛好好......晚飯去到尾聲, 侍應都收晒我哋 d 碟, 戲肉開始啦......首先你扮電話響聽電話, 收線後你話我知公司急 call 你返去做嘢, 其實當時我覺得好失望.....估唔到無端端你要返公司做嘢得返我一個, 不過呢個情況又好正常, 耐唔耐你都會收到呢 d call, 埋單後我唯有聽你話自己一個返屋企等你.......步出餐廳行咗一條街左右, 你再次扮聽電話, 話我知餐廳打比你我哋漏咗袋嘢, 但由於你急住返公司執手尾, 叫我自己一個返轉頭攞返.......其實嗰一刻我有 d 懷疑......我漏低咗咩嘢? 我都冇帶嘢去.....或者我當時太理智.....返入餐廳, 見到頭先只 serve 我哋嗰個侍應, 我話佢知係佢哋打比我叫我返轉頭攞嘢, 點知佢攞咗紮花交比我.......我一見到......覺得好開心, 因為我曾經講過你求婚時我要收花.....你真係做咗! 我繼續一個人捧住紮花走出餐廳, 開門時已經見到你喺餐廳門口, 攞住隻介子等我, 叫我嫁比你.......我話: 好! 之後你再幫我戴上介子, 從此以後, 我中指就多咗一隻介子啦 ~

宜家你正正式式成為我嘅未婚夫, 所以我想同你講: 未婚夫先生, 其實我好欣賞你整晚嘅安排, 雖然中間出咗少少意想不到嘅事, 不過我真係好開心同好滿意! 我完完全全感受到你嘅誠意, 你嘅認真及你嘅心思, 我好多謝你比咗一個咁開心嘅晚上我, 我真係會一世都記得呢一晚! 其實我係一個好冇情趣又唔識浪漫嘅人, 我份人只講求實際, 或者因為我係典型金牛座問題......不過, 我真係欣賞你每一次為我製造嘅浪漫及美好回憶 ~

事後先知道, 原來你一早同嗰個侍應夾好計, 仲 confirm 咗 3 次咁多..... 唔怪之得你尋日 lunch 時間去公司附近搵我, 原來你要去買花交低比間餐廳.......又唔怪之得個侍應對我哋嗰枱特別好招呼啦.......原來你有 "景轟"

最後.......

我要多謝你送比我嘅朱古力 (係我最鐘意食嘅 MON CHERI 蒙雪麗)

我要多謝你送比我嘅鮮花, 有 12 支紫色玫瑰 (又係我鐘意嘅紫色呢), 8 支桔梗及其他小花

我要多謝你送比我嘅求婚介子 (好靚呢)

我要多謝你帶我去 agnes b. 餐廳食飯 (好多 agnes b. 呢)

我要多謝你送我一陣花香味 (因為插起咗 d 花之後, 全屋都充滿玫瑰花香)

我要多謝你比我一切嘅 surprise (真係好難忘)

我要多謝你喺今朝送我一對熊貓眼, 因為尋晚實在開心到訓唔著, 成 3 點幾先訓呢......不過一對熊貓眼換嚟一世難忘嘅回憶, 我寧願每個月都要一對熊貓眼!

~~~ 不同角度嘅紫色玫瑰花, 連包裝紙都係用紫色為主 ~~~

~~~ 求婚介子 ~~~

~~~ 我與紫玫瑰嘅合照 ~~~

鮮花嘅生命好短暫, 但令人有美好回憶, 而我同你嘅感情細水長流, 卻令我哋一生一世咁相愛, 牽腸掛肚

我覺得自己好幸福, 多謝你!