Snoopy 結婚公仔

2008 年 6 月 12 日（星期四）

老實講，我咁大個女從來未試過去金都 shopping 架！就算決定咗結婚之後，我都冇衝動去行金都商場。或者因為喺各大討論區得知金都有太多黑店，人人都唔想喺籌備婚禮時做咗水魚比人屈錢，然後又貼錢買難受架嘛，所以我同男朋友都一致唔會幫襯金都，寧願去尖沙咀金巴利道。

不過，由於我 8 月就要影婚紗相，而其中一件道具就係帶自己鐘意嘅結婚公仔去影，咁我認為金都雖然有太多黑店，不過我唔去幫襯佢哋嘅服務而去買一件現成嘅貨物，應該唔會中招啦，所以嗰晚食完飯之後，就第一次正正式式同男朋友一齊去金都商場 shopping！

其實我哋都有共識，結婚公仔一係買 Snoopy，一係就買 PC 狗。自己讀書嗰陣就好鐘意 PC 狗，畢咗業之後，加上 PC 狗嘅出產簡直係買少見少，我漸漸投向 Snoopy 嘅懷抱。其實呢兩款嘅卡通公仔都係好難去搵一對「比較似正版」嘅結婚公仔，所以我都好煩惱！

首先，喺行金都之前，我哋去咗始創中心一間叫 C Gift 嘅 Snoopy 精品店望吓，好容易就見到一對真正由日本空運返港嘅結婚公仔！（以前幫襯呢個老闆幫到熟晒，佢每個月會飛去日本一次，自己入貨，所以佢 d Snoopy 精品係信心嘅保證）

嘩，真係好靚！無論包裝，設計，手工都簡直係一流，而且價錢都好「一流」添 ...... 承惠 HK$779 ...... 嘩，呢個價錢，足夠比我買 2-3 對 common 款嘅結婚公仔啦！所以我冇即時買，因為好似唔係好值得咁 .........然後就轉戰金都。

其實金都都有好多 Snoopy 結婚公仔，不過個款就 ....... 有 d 不敢恭維

..... 但係竟然比我喺某一層見到一對比較似樣少少嘅 Snoopy 公仔喎，當然冇以上嗰對正宗貨咁靚啦，嗰個老闆都好老實，佢同我哋講佢哋只不過買一對公仔返嚟，然後自己同公仔造衫，但係一向奄尖嘅男朋友都覺得嗰款 OK，一問之下，原來賣 HK$498...... 以結婚公仔嘅價錢嚟講，都仲係貴咗少少，不過，嗰對係唯一一對我哋兩個都睇得上眼 .....最後我哋都冇買住，兩手 fing fing 咁離開咗金都！因為我個伴娘小姐下星期會去旅行，我已經交帶佢幫我望望有冇日本版嗰對，如果真係買唔到，我先返金都買都未遲！

至於 PC 狗嘅結婚公仔，喺 1/F 都有一對 OK 嘅，其實 PC 狗嘅外形真係好難做，扁口扁面咁，所以呢對...... 都算過關架啦，而且仲賣好平添，只係 HK$138 咋！

之後返屋企上網搵吓有冇得賣，Snoopy 的確係有，不過個樣超假，反而見到呢對 PC 狗喎，就咁睇就做得幾好，仲要賣 HK$68 咋.........超平！不過佢哋話因為擺咗太耐，有少少污漬 lu ......

最後，我決定會買返 Snoopy，爭在買始創嗰對定金都嗰對啫，最最最希望係伴娘小姐喺外地買到以上幅相嗰對啦，咁就一天都光晒啦。