婚禮 MC - 點搵好？

唉！MC 呢個 item 我一路都諗咗好耐，究竟搵兄弟姊妹幫手好吖，定係請專業司儀好呢？如果搵兄弟姊妹幫手，我其實都有人選嘅 - 男司儀會由男朋友嘅細佬幫手，而女司儀會由我其中一個搞開 gathering，做開統籌嘅姊妹擔任。不過，同男朋友個細佬係咁易傾過，我覺得佢又好似有少少想縮沙，咁我都明白嘅，佢平事口多多，吹水就叻啫，要佢做婚禮司儀喎，佢亳無經驗，我覺得佢未必應付得到，到時佢發台瘟咁點算？我唔想整個婚禮毀於佢手上喎 ...... （好似講到好嚴重）

其實「婚禮司儀」我一路都覺得幾緊要架！一個婚宴當中，d 賓客對得最多嘅，除咗係 d 食物之外，我諗佢哋都會幾留意當晚司儀嘅表現。萬一個司儀帶動唔到個氣氛，咁就會令成個婚宴失色 ~ 以我自己為例，早於兩年前參加咗某某親戚嘅婚宴，佢哋就係請咗一 pair 專業司儀，結果嗰晚嘅氣氛好好 ，到今時今日，我都仲記得當晚玩咗咩遊戲。

喺籌備婚禮嘅初時（大約今年二月），我已經留意到 Bonny & Tony（邦東尼）呢 pair 夫妻檔司儀，佢哋喺 esdlife 好多人讚，加上佢哋嗰時都仲算係新婚，應該好明白一對新人最需要係 d 咩，而且收費係極之合理！！！同 Bonny & Tony 交涉嘅初期佢哋都仲有期，咁我當然要問問男朋友啦，佢對搵專業司儀定搵朋友幫手持「冇意見」態度，只係講句：你鐘意啦！（你睇，男人就係咁架啦）！問佢幾次，佢幾次都係答呢個 model answer！結果，礙於男朋友唔嗲唔吊，冇乜點理過呢項 item 底下，Bonny & Tony 喺九秒九嘅情況之下，已經比人 book 咗！

 

冇錯！我婚期係 21-11-2009，喺今年二月時佢哋原來已經比人 book 咗，

 嘩，我都呆一呆，早成差不多兩年時間去 book MC！結果，個問題又返嚟啦，搵唔到專業 MC，我又要衡量一下好唔好搵返兄弟姊妹做 ...... 唉，咁諗法，睇怕半年後我會生多好多白頭髮 ~

其實大家有冇咩好嘅司儀介紹呢？我都歡迎路過嘅行家自薦架，我嘅要求好簡單：

婚期：21-11-2009（星期六）

人數：專業司儀兩位（一男一女）

圍數：18 - 20圍

越嚟越擔心請唔到專業司儀，因為佢哋都係一晚一單生意，比人 book 咗就要另謀高就啦 ...... 喺 esdlife 集合咗同日結婚嘅網友原來已經接近有 30 pairs，宜家只係 08 年 6 月，真係唔敢想像到今年年尾會唔會有 50 pairs......仲有，仲未計冇上 esdlife 蒲嘅準新人呢......唉，真係要同人爭崩頭！