免費婚紗相

2008 年 6 月 15 日 （星期日）

呢日除咗去睇 Kelly 演唱會外，其實晏晝嗰時同男朋友去咗我哋註冊嘅地方 --- 「緣美傳說」參觀。之前都講過，佢哋有一個新禮堂裝修咗，所以就約我上去睇，睇吓我轉唔轉禮堂等等。個新禮堂其實都幾靚架，而且可以容納到接近 90 人，太勁啦！可惜我當日未必有咁多人觀禮，加上我都係鐘意原本 book 咗嗰個禮堂多 d，所以嗰日上到去，基本上係混吉 ~

其實我哋兩個同嗰度 d sales 都幾熟架啦，因為 esdlife 本來冇人講佢哋，但係我傻吓傻吓咁開咗個 post，加上佢哋自己喺 expo 都有擺 booth，所以佢哋越嚟越多人識，夾硬話我有少少功勞喎。加上佢哋兩個證婚禮堂都係全部自己一手包辦設計及裝修，我男朋友又識裝修嗰行，成日同佢哋 d staff 交換意見，男朋友仲差 d 自己落手做埋一份咁滯，所以就熟落咗，好似朋友咁嘞！其實緣美傳說除咗做證婚之外，仲撈埋註冊化妝（冇全日 join 架），攝影攝錄，外影婚紗相，外借監禮人，租衫等等。佢哋見我係佢客仔，宜家又做緊 promotion，送咗一輯免費嘅婚紗相比我呀！不過話明係免費，當然唔會有太多嘢包啦！輯相只會影兩個鐘左右，地點主要係佢哋兩個證婚禮堂及附近嘅「古蹟文化博物館」，個博物館嘅外貎都 OK 架！至於造型都係只得一個，包咗化妝及禮服，只需要帶粉樸，girdle 嗰 d 就 OK！男裝都係全包，例牌自己帶恤衫，鞋及襪！至於相呢 ............. softcopy 會包 5 張（已執），但係就會晒 4 張出嚟（應該唔會包 UV coating 嗰 d 啦），其實佢包幾多嘢比我都冇乜所謂，因為我 8 月會影婚紗相，我純粹想搵一輯平平地可以喺 8 月之前影當做 rehearsal 咋！咁啱佢完全免費，我梗係影啦！暫定會喺 7 月中影相，搞得嚟都差唔多都 8 月 lu，希望到時佢哋個攝影師會教我點樣擺 pose，邊邊面靚 d，點笑，點做表情等等 ~ 咁就有晒經驗去影主打嗰輯美麗佳人啦！Yeah！

不過，惡夢就開始啦！原本打算 7 月先開始修身，敷 mask，睇嚟宜家要將整個扮靚計劃提早進行 ~ 哎吔，我唔捨得我最愛嘅朱古力呀

............ 仲要早訓添呀，我出咗名係夜鬼嚟架嘛........