頭先啱啱約咗車主阿達去睇花車，仲一次過睇咗我心儀咗好耐嘅紫色倫敦的士，及佢架新古董車，宜家總算有咗定案！我 --- 與倫敦的士無緣啦，但係取而代之租咗架全香港只有一架嘅古董車 --- MG。呢架車 ........ 巴閉啦！佢係屬於 194x 年代嘅古董車，初初出嗰陣都出咗千幾部，不過宜家全球已經得返百零部咋，而且香港仲只有呢一部添。
我哋喺元朗坐住由阿達親自揸嘅倫敦的士，然後佢車我哋去佢嘅車房，裡面就有佢嗰部尚未落地嘅古董車 MG。沿途有好多人都對呢架倫敦的士好好奇，架車去到邊就望到邊，仲有人趁我哋等緊紅綠燈時影我哋相添呀..... 真係幾有「虛榮感」。到咗車房見到架古董車 MG，我心裡面都「嘩」咗一聲呀（唔知男朋友有冇呢） ....... 不過由於嗰架車仲未整好，所以車主都唔想我哋影相，不過就 exactly 係呢個款：
呢架車有一個好特別嘅地方，如果司機要轉線打燈，佢唔係用燈架，係用「旗仔」！當個司機想轉右，佢要唔知點樣整一整，咁車嘅右手邊會有一支旗仔喺窗邊升起，哈，超搞笑！不過車主話由於呢 d 零件太罕有，佢都唔知配唔配得返，如果配唔返，佢會再諗辦法。
其實當初我唔諗住租呢部 MG 架，我真係想租紫色倫敦的士，紫色吖嘛 ................當時我仲寫晒所有資料比個車主，落訂咁滯架啦，不過 ....... 因為男朋友太鐘意呢部 MG，不斷同我洗腦，猛咁游說我要轉租 MG，唉 ..... 見佢咁鐘意，就順佢意思啦！佢就開心啦，不過呢架車有太多嘅不明朗因素，我都仲有少少擔心：
(1) 50% 冇冷氣 <--- 呢樣我真係好矛盾，裝得到冷氣當然好啦，但係萬一裝唔到，對我應該唔會有太大影響啩？因為我婚期係 11 月，天氣唔會太熱，加上我著住 d 婚紗禮服，應該唔會熱得去邊嘅。
(2) 車籠窄 <--- MG 嘅車籠真係比倫敦的士窄好多，或者應該咁講，係倫敦的士闊，MG 嘅車籠其實同普通車差唔多嘅。
(3) 驗車問題 <--- 車主自己都擔心驗車中心嗰邊唔知批唔批，唔批真係大件事！所以就算我宜家決定咗租呢架車，佢都唔敢收我訂金住架！不過車主話佢會盡力，其實架車宜家都差唔多 OK，暫時會 7 月中去驗車，而呢架車嘅第一單 order 喺 9 月。咁 ..... 要擔心的話，應該都未輪到我嘅，萬一咁唔好彩驗車嗰度真係唔 pass，佢都仲有一年幾時間跟進返 d 問題，我諗到我結婚時點都批啦啩？
(4) 租金 <--- 唉，呢個問題真係冇計，又 out budget 啦！租倫敦的士已經 out budget 架啦，家吓仲要租古董車 MG，車主雖然仲未定價，不過佢話會貴倫敦的士一千蚊多 d，嘩 ....... 我大大話話當日由接新娘開始就用車用到去酒樓，8 個鐘喎，條數都幾襟計，要係要搵男朋友算賬先得！！！
(5) 車身顏色及車內 setting <--- 由於我見到架 MG 時，車身顏色同埋內籠（例如坐位）等等都仲未搞掂，不過車主話車身會用薰衣草白，至於坐位佢又未決定會買咩梳化等等 ..... 我坐過佢架倫敦的士嘅梳化，真係好舒服架，唔知佢會唔會搵到一樣嘅梳化呢？不過 ...... 我信得過車主嘅 taste，希望 OK 啦！
雖然我同紫色倫敦的士無緣，但係等咗咁耐終於見到佢嘅真身，我梗係要同架車影返張相啦！
唉，算啦，為咗男朋友，我就順佢意思租古董車 MG 啦！佢都講得啱嘅，倫敦的士成日都有人租嚟做花車，反而呢架 MG 全香港只得一架，而且結婚咁大件事，用返 d 特別嘅車襯返自己嘛！呢架倫敦的士已經有咁多人咁好奇，我諗當我哋坐住架 MG 時，應該仲更加矚目 ...... 真係期待 21-11-2009 嘅來臨！
沒有留言:
張貼留言